Isaia 7
7
O le Tau‘a a Suria ma le Valo‘aga i le Mesia
1O ona po o Aasa le atali‘i o Iotama, o le atali‘i lea o Usia le tupu o Iuta, na ō a‘e ai i Ierusalema o Resina le tupu o Suria ma Peka le atali‘i o Remalia le tupu o Isaraelu, e tau ai le tau‘a, a ‘ua lē mafai ‘ona manumālō i ai.#2 Tu 16.5; 2 No 28.5-6
2‘Ua ta‘u atu fo‘i i le ‘āiga o Tavita, ‘ua fa‘apea atu: O lo‘o fesoasoani Efaraima ‘iā Suria. ‘Ona gatete ai lea o lona loto ma loto o lona nu‘u, pei ‘ona lūlūina o la‘au o le vao i le matagi.
3‘Ona fetalai mai ai lea o le ALI‘I ‘iā Isaia: Alu ia e fa‘afetaia‘i ‘iā Aasa, o oe ma lou atali‘i o Sarasopa,#7.3 sarasopa: O le igoa lenei i le gagana Eperu “e to‘a laiti i latou e toe fo‘i mai” (va‘ai 10.20-22). i le pito alāvai i le lepa aupito i luga, i le ala tele i le fanua o le tā‘ofu,#2 Tu 18.17; Isai 36.2 4ma ‘ia e fai atu ‘iā te ia: ‘Ia oe, ‘ia e fīfīlemū ‘aua ‘e te fefe, ‘aua ne‘i fa‘avaivai fo‘i lou loto ‘ona o ia i‘u aulama e lua ‘ua pupusa, o le ita tele lea o Resina ma Suria, ‘atoa ma le atali‘i o Remalia. 5Auā ‘ua taupulepule e fai se mea leaga ‘iā te oe e Suria, Efaraima, ma le atali‘i o Remalia, ‘ua fa‘apea ane, 6‘Ia tatou ō a‘e i Iuta ma fa‘aatuatuvale ‘iā te i latou, ‘ia tatou lepetia se ala mo i tatou ma ia tatou fa‘atūina ai se tupu, o le atali‘i o Tapala lea.
7O lo‘o fa‘apea ‘ona fetalai mai o le Ali‘i le ATUA:
E lē tu lea mea,
e lē o‘o lava.#Isai 8.10
8Auā o le ulu o Suria, o Tamaseko lea;
o le ulu fo‘i o Tamaseko, o Resina lea.
A o‘o fo‘i i le onogafulu ma le lima o tausaga,
‘ona lafoia ai lea o Efaraima, e lē toe fai ma nu‘u.
9O le ulu fo‘i o Efaraima o Samaria lea;
o le ulu fo‘i o Samaria o le atali‘i o Remalia ia.
‘Āfai tou te lē fa‘atuatua,
‘ona lē fa‘atumauina ai lea o ‘outou.#2 No 20.20
O le Fa‘ailoga o le Emanuelu
10‘Ua toe fetalai mai le ALI‘I ‘iā Aasa, ‘ua fa‘apea mai, 11‘Ia e fai mai se fa‘ailoga e faia e le ALI‘I lou Atua, ‘ia e fai mai se mea i lalō, po o se mea i lugā.
12‘Ona fai atu ai lea o Aasa, ‘Ou te lē fai atu lava, ‘ou te lē fa‘a‘ono‘ono i le ALI‘I.
13‘Ona fai atu ai lea o ia, “‘Inā fa‘alogologo mai ia le ‘āiga o Tavita, Se mea itiiti ‘ea ‘iā te ‘outou ‘ona fa‘atigāina o tagata, tou te fa‘atigāina ‘ea lo‘u Atua? 14O le mea lea e tu‘uina mai ai e le Ali‘i lava le fa‘ailoga ‘iā te ‘outou; fa‘auta, e tō le taupou ma fānau mai se tama tane; na te fa‘aigoa fo‘i ‘iā te ia o Emanuelu.#7.14 emanuelu: O le igoa lenei i le gagana Eperu “O le Atua ‘ua fa‘atasi ma i tatou.” #Isai 9.6; Mata 1.23; Luka 1.31, 34, 35 15E ‘ai e ia le suāsusu to‘a ma le meli, se‘ia iloa e ia ‘ona tete‘e atu i le leaga, ‘ae filifili i le lelei. 16Auā a o le‘i iloa e le tama ‘ona tete‘e atu i le leaga, mōna filifili i le lelei, e tu‘ua e ‘ona tupu e lua o le nu‘u ‘ua leaga ‘iā te oe.#Isai 6.12; 8.4 17E fa‘ao‘o mai e le ALI‘I ‘iā te oe ma lou nu‘u, ‘atoa ma le ‘āiga o lou tamā, o aso e le‘i fa‘apea ‘ona o‘o mai talu ona po na te‘a ‘ese‘ese ai Efaraima ma Iuta; o le tupu lea o Asuria.”#1 Tu 12.16; 2 No 28.19; Nee 9.32; Isai 8.7-8
18O lea aso fo‘i e mapumapu atu ai le ALI‘I i le lago o lo‘o i mulivai o vaitafe o Aikupito ma le lago meli o lo‘o i le nu‘u o Asuria. 19‘Ona latou ō uma mai ai lea ma nonofo i alia, ma māvaevae o papa ma la‘au tuitui uma, ‘atoa ma taaga uma lava.
20O lea aso e tafi ai e le Ali‘i, i le tafi ‘ua tauia, mai ona tala atu o le vaitafe, o le tupu o Asuria fo‘i lea, e tafia le ulu ma fulufulu o vae, e sala‘eseina fo‘i ‘atoa ma le ‘ava.#2 Tu 18.13-16; Isai 8.7
21O lea aso fo‘i e fafaga ai e le tagata o le povi fafine ta‘anoa ma mamoe e lua. 22E ‘aina e ia o le suāsusu to‘a ‘ona o le tele o le suāsusu e maua mai ai; auā e ‘a‘ai le suāsusu to‘a ma le meli e i latou uma o ē totoe i totonu o le nu‘u.#Isai 7.15
23O lea aso fo‘i e i ai o la‘au talatala ma la‘au tuitui i mea uma sa i ai vine e afe, e fa‘atatauina i tupe e afe. 24Latou te ō mai ai ma ū fanafana ma ‘aufana; auā e ‘avea le nu‘u uma ma la‘au talatala ma la‘au tuitui. 25O mauga uma fo‘i ‘ua galueaina i le suō, ‘e te lē alu atu i ai ‘ina ‘ua fefe i la‘au talatala ma la‘au tuitui, ‘ae ‘ave i ai povi, e tata‘a ai fo‘i mamoe.#Isai 32.13-14
Currently Selected:
Isaia 7: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
