Isaia 24
24
O le Malaia o Iuta ma le Manuia e Mulimuli ane Ai
1Fa‘auta, o lo‘o sasa‘aina e le ALI‘I le nu‘u ‘ia uma, na te fa‘afaōina, na te fa‘ata‘ape‘apeina fo‘i ē o nonofo ai. 2E i‘u ‘ina tutusa o le nu‘u ma le ositaulaga; e tutusa le ‘au‘auna ma lona ali‘i; e tutusa le ‘au‘auna fafine ma lona matai fafine; e tutusa lē ‘ua fa‘atau atu ma lē ‘ua fa‘atau mai; e tutusa lē ‘ua avatu mea ma le ‘ua ‘aitalafu; e tutusa lē ‘ua talia le totogi fa‘asili ma lē ‘ua avatu le totogi fa‘asili.#Eseki 7.12; Hose 4.9 3E matuā sasa‘aina le nu‘u, e matuā vetea lava; auā ‘ua fetalai mai le ALI‘I lenei fetalaiga.
4‘Ua fa‘anoanoa le lalolagi, ‘ua mamae; ‘ua fa‘avaivai le atu laulau, ‘ua mamae; ‘ua fa‘avaivai ali‘i sili o le nu‘u.#Hose 4.3 5‘Ua leaga le nu‘u i ē o nonofo ai; auā ‘ua latou solia tulafono; ‘ua latou liliu ‘ese le sauniga; ‘ua latou solia le feagaiga e fa‘avavau.#Levi 26.15; Nume 35.33; Isai 2.6, 8 6O le mea lea e fa‘aumatia ai le nu‘u i le fa‘afano, ‘ua fa‘asalaina fo‘i ē o nonofo ai; o le mea lea ‘ua susunuina ai ē o nonofo i le nu‘u; e to‘aitiiti fo‘i tagata na totoe. 7‘Ua fa‘anoanoa le sua vine, ‘ua fa‘avaivai le vine; ‘ua mapuitigā i latou uma e sa ‘oli‘oli o latou loto. 8‘Ua mavae le fiafia o topa; ‘ua uma le pisa o ē na ‘oli‘oli; ‘ua mavae le fiafia o le kitara.#Iere 7.34 9‘Ua latou le toe inu uaina ma pepese; e ‘o‘ona le ‘ava ‘iā te i latou o ē feinu ai. 10‘Ua lepetia le ‘a‘ai gaogao; ‘ua punitia fale uma, e lē uia. 11O i ala le ‘alaga i le uaina; ‘ua mavae atu le ‘oli‘oli uma; ‘ua alu ‘ese le fiafia o le nu‘u.#Ioe 1.12 12‘Ua toe i le ‘a‘ai na o le fa‘atafunaina, ‘ua tu‘ipalaina le puipui. 13Auā e fa‘apea ‘ona fai i le lau‘ele‘ele i totonu o le nu‘u, e pei ‘ona sasaina ifo o le olive, e pei o nai toe fuifui vine pe a uma le tauga vine.#Isai 17.6
14Latou te leo tetele, latou te ‘alalaga fiafia, ‘ona o le mamalu o le ALI‘I, latou te ‘alalaga mai le sami. 15O le mea lea ‘ia ‘outou vivi‘i atu ai i le ALI‘I i le afi, i nu‘u tuloto i le sami, o le suafa lava o le ALI‘I o le Atua o Isaraelu.#Isai 45.6
16‘Ua tatou fa‘alogo i pese mai le tulu‘iga o le lalolagi; o le vi‘iga i lē ‘ua amiotonu; a ‘ua ‘ou fai atu,
‘Ua malaia a‘u nei! ‘ua malaia a‘u nei! Auē a‘u nei! O ē fa‘asauā ‘ua latou fa‘asauā, o lē sauā lava ‘ua fa‘asauā mai ai ē ‘ua fa‘asauā. 17‘Ua ‘iā te oe le nofo i le nu‘u le mata‘u ma le lua, ma le mailei fa‘asauā.#Kene 7.11; Sala 18.17; Iere 48.43-44 18O lē ‘ua sola i le leo o le mea e fa‘amata‘u a‘i, e pa‘ū o ia i le lua; o lē ‘ua alu a‘e fo‘i i le lua e lavea o ia i le mailei; auā ‘ua fa‘aavanoa pupuni i lugā, e lūlūina fo‘i fa‘avae o le lalolagi. 19‘Ua matuā gaugauina le nu‘u, ‘ua matuā nutilili‘i le nu‘u, ‘ua matuā lūlūina le nu‘u. 20‘Ua tautevateva le nu‘u e pei o le tagata ‘onā, ‘ua feluea‘iina e pei o le moega tautau; ‘ua mamafa lona fouvale i luga ‘iā te ia; e pa‘ū ai o ia, e lē toe tu lava.#Isai 24.5, 6; 29.9
21O lea aso fo‘i e fa‘asala ai e le ALI‘I i ‘au i lugā i le mea maualuga, ‘atoa ma tupu o le lalolagi i le lalolagi.#Sala 76.12; Isai 10.12 22E fa‘apotopotoina i latou pei ‘ona fa‘apotopotoina ē ‘ua fusifusia i le lua; e puipuia fo‘i i latou i le fale puipui; a mavae fo‘i aso e tele, ‘ona asiasia ai lea o i latou. 23E fa‘amāina le masina, e māsiasi fo‘i le lā, auā e fai ma tupu le ALI‘I o ‘au i le mauga o Siona ma Ierusalema, i luma fo‘i o ona toeaina ma le mamalu.#Isai 13.10; Mika 4.7
Currently Selected:
Isaia 24: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
