Esekielu 3
3
‘Ua Fa‘atonu mai ‘iā Esekielu lana Galuega e Fai
1‘Ua fetalai mai o ia ‘iā te a‘u: Le atali‘i e o le tagata, ‘inā ‘ai ia le mea ‘e te maua; ‘ai ia lenā tusi ta‘ai, i le e alu ma fai atu i le ‘āiga o Isaraelu.#Fa‘aa 10.9-10; Eseki 2.8-9
2‘Ona ‘ou fa‘amaga lea o lo‘u gutu, ‘ona ia fafaga lea ‘iā te a‘u i lenā tusi ta‘ai. 3‘Ua ia fetalai mai fo‘i ‘iā te a‘u, Le atali‘i e o le tagata, ‘inā tali o lou manava, ia mā‘ona ai lou alo i lenā tusi ta‘ai ‘ua ‘ou avatua ‘iā te oe. ‘Ona ‘ou ‘ai ai lea, ‘ua suamalie i lo‘u gutu e pei o le meli.
4‘Ua fetalai mai fo‘i o ia ‘iā te a‘u: Le atali‘i e o le tagata, alu ia oe, ‘inā alu i le ‘āiga o Isaraelu ma e tautala atu i a‘u ‘upu ‘iā te i latou. 5Auā e lē ‘auina atu oe i se nu‘u gagana ‘ese ma ‘upu faigatā, a o le ‘āiga o Isaraelu; 6e lē o nu‘u e tele ma gagana ‘ese ma ‘upu faigatā ‘e te lē mālagona ai a latou ‘upu. ‘Ana ‘ou ‘auina oe ‘iā te i latou, po ‘ua latou fa‘alogo lava ‘iā te oe. 7A o le ‘āiga o Isaraelu, e lē mafafai i latou ‘ona fa‘alogo ‘iā te oe, auā latou te lē mafafai ‘ona fa‘alogo mai ‘iā te a‘u; auā ‘ua muaulu mālō, ma loto ma‘a‘a le ‘āiga uma o Isaraelu.#Eseki 2.4; Ioane 15.20 8Fa‘auta, ‘ua ‘ou faia ou mata ia malosi, ‘ina ‘ia fesagai ma o latou mata ma lou muaulu ia mālō, ‘ina ‘ia fesagai ma o latou muaulu. 9‘Ua ‘ou faia lou muaulu ia pei o le samira ‘ua sili le mālō i le papa; ‘aua ‘e te fefe ‘iā te i latou, ‘aua fo‘i ‘e te mata‘u i o latou mata, e ui lava o le ‘āiga fouvale i latou.#Isai 50.7; Eseki 2.6
10‘Ua ia fetalai mai fo‘i ‘iā te a‘u: Le atali‘i e o le tagata, o a‘u ‘upu uma ‘ou te fai atu ai ‘iā te oe, ‘ia talia i lou loto ma fa‘alogo ai ou taliga. 11Alu ia, ‘inā e alu atu i le tāfeaga o tagata o lou nu‘u ma e tautala atu ‘iā te i latou ma e fai atu ‘iā te i latou, “O lo‘o fa‘apea ‘ona fai mai o le Ali‘i le ATUA,” pe latou te fa‘alogo mai, pe leai.
12‘Ona si‘itia lea o a‘u i luga e le Agaga, ‘ona ‘ou fa‘alogo atu lea i o‘u tua i le leo o le ta‘alili tele, ‘ua fa‘apea mai: ‘Ia vi‘ia le mamalu o le ALI‘I mai lona afio‘aga.#1 Tu 18.12; Eseki 8.3; Galu 8.39 13‘Ua ‘ou fa‘alogo fo‘i i le ta‘alili o ‘apa‘au o mea ola ‘ua fepa‘ia‘i ma le ta‘alili o mea ta‘avavale e lata ane i ai ma le leo o le ta‘alili tele. 14‘Ua si‘itia a‘u e le Agaga, ‘ua ia ‘ave ‘iā te a‘u, ‘ua ‘ou alu ma le tigā ma le ita o lo‘u loto; a ‘ua malosi mai le ‘a‘ao o le ALI‘I i luga ‘iā te a‘u. 15‘Ona ‘ou o‘o atu lea i le tāfeaga i Teleapipa i ē nonofo e lata ane i le vaitafe o Kepara, auā na latou nonofo i lea mea; na ‘ou nofo fo‘i ‘iā te i latou i aso e fitu e femēmēa‘i.#Iopu 2.13; Sala 137.1
‘Ua Tofia e le Ali‘i o Esekielu e ‘avea ma Tagata Va‘ai
(Eseki 33.1-9)
16‘Ua mavae aso e fitu, ‘ona o‘o mai lea o le afioga a le ALI‘I ‘iā te a‘u, ‘ua fa‘apea mai: 17Le atali‘i e o le tagata, ‘ua ‘ou faia oe ma tagata va‘ai i le ‘āiga o Isaraelu; o le mea lea ‘ia e fa‘alogo mai ai le ‘upu a lo‘u gutu ma e apoapoa‘i atu ‘iā te i latou mai ‘iā te a‘u. 18A ‘ou fai atu i lē ‘ua amio leaga, “E oti lava oe;” a ē le apoapoa‘i atu ‘iā te ia, ma ē le fai atu i ai e apoapoa‘i atu i lē ‘ua amio leaga ‘ia liliu ‘ese i lona ala leaga, ‘ina ‘ia ola ai o ia; e oti lenā tagata amio leaga i lana amioletonu, a o lona toto ‘ou te taui atu lea ‘iā te oe. 19‘Ae ‘āfai ‘e te apoapoa‘i atu i lē ‘ua amio leaga, a ē le liliu ‘ese o ia i lana amio leaga ma lona ala leaga, e oti o ia i lana amioletonu; a o oe, ‘ua lavea‘iina oe ‘iā te oe.#Eseki 14.14; 33.8-9; 1 Timo 4.16
20A liliu ‘ese fo‘i le ‘ua amiotonu i lana amiotonu, a ē fai le amioletonu, ‘ona ‘ou tu‘uina lea i ona luma se mea e tausuai ai, e oti o ia; e oti o ia i lana agasala ‘ona ‘ua e lē apoapoa‘i atu ‘iā te ia, e lē manatua ana amiotonu sa na faia; a o lona toto ‘ou te taui atu lea ‘iā te oe.#Iere 6.2; Eseki 3.18; 18.24; 33.18; 2 Pete 2.20 21A o oe, ‘āfai ‘e te apoapoa‘i atu i lē ‘ua amiotonu ‘ina ‘ia lē agasala le ‘ua amiotonu e le agasala fo‘i o ia, e ola lava o ia, ‘ina ‘ua apoapoa‘iina o ia; o oe fo‘i, ‘ua lavea‘i oe ‘iā te oe.
O le a Gūgū Esekielu e lē mafai ‘ona Tautala
22Na i luga fo‘i ‘iā te a‘u le ‘a‘ao o le ALI‘I i lea mea; na ia fetalai mai fo‘i ‘iā te a‘u: ‘Inā tula‘i ‘inā alu atu i le fanua laugatasi, ‘ou te fai atu ai ‘iā te oe i lea mea.
23‘Ona ‘ou tula‘i ai lea ma ‘ou alu atu i le fanua laugatasi; fa‘auta fo‘i, o le pupula o le ALI‘I ‘ua tu mai ai, pei o le pupula na ‘ou iloa e lata ane i le vaitafe o Kepara; ‘ona ‘ou fa‘apa‘ū faō ai lea.#Eseki 1.1, 28 24‘Ona ulu mai lea o le Agaga i totonu ‘iā te a‘u, na ia fa‘atūina mai a‘u i luga i o‘u vae, na ia fetalai mai fo‘i ‘iā te a‘u, ‘ua fa‘apea mai ‘iā te a‘u: ‘Inā alu ia oe, ‘inā puipui ia oe ‘iā te oe i lou fale. 25O oe na fo‘i le atali‘i o le tagata, fa‘auta, latou te fusifusi ‘iā te oe i maea, latou te nonoa ai lava ‘iā te oe, ‘e te lē alu atu fo‘i ‘iā te i latou.#Eseki 4.8 26‘Ou te fa‘apipi‘i a‘e fo‘i lou laulaufaiva i lou gutu, ‘ina ‘ia gūgū ai oe, e lē faia fo‘i oe ma tagata a‘oa‘i ‘iā te i latou; auā o le ‘āiga fouvale i latou. 27A ‘ou fai atu ‘iā te oe, ‘ona ‘ou fa‘agaganaina lea o oe, ‘e te fai atu fo‘i ‘iā te i latou, O lo‘o fa‘apea ‘ona fai mai o le Ali‘i le ATUA, “O lē fa‘alogo mai, ‘inā fa‘alogo mai ia o ia; a o le ‘ua leai, ‘ia leai pea ia; auā o le ‘āiga fouvale i latou.”#Eseki 3.11; 24; 27; 33.22; Fa‘aa 22.11
Currently Selected:
Esekielu 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.