Teuteronome 27
27
O Tulafono ‘ia tusia i Ma‘a
1‘Ua fai atu Mose ma toeaina o Isaraelu i le nu‘u, ‘ua fa‘apea atu: ‘Ia ‘outou tausi i poloa‘iga uma lava ‘ou te fai atu ai ‘iā te ‘outou i le aso nei. 2O le aso fo‘i tou te sopo‘ia atu ai Ioritana, i le nu‘u ‘ua foa‘iina mai e le ALI‘I lou Atua ‘iā te oe, ‘ia e fa‘atūina ai mo oe ni ma‘a tetele, ma e valia i panisina;#Iosu 8.30-32 3‘ia e tusia fo‘i i ai o ‘upu uma lava o lenei tulafono, pe a e sopo‘ia atu, ‘ina ‘ia e alu atu ai i le nu‘u ‘ua foa‘iina mai e le ALI‘I lou Atua ‘iā te oe, o le nu‘u e tafe ai le suāsusu ma le meli; e pei ‘ona fetalai mai ai le ALI‘I o le Atua o ou tamā ‘iā te oe. 4Pe a ‘outou sopo‘ia atu Ioritana, ‘ona ‘outou fa‘atūina lea o na ma‘a, ‘ou te fai atu ai ‘iā te ‘outou i le aso nei, i le mauga o Evalu, ‘ia e valia fo‘i i panisina. 5‘Ia e ati a‘e fo‘i i lea mea le fatafaitaulaga mo le ALI‘I lou Atua, o le fata ma‘a; ‘aua ne‘i e talai ai i se u‘amea.#Eso 20.25 6O ma‘a ‘ato‘atoa ‘e te ati a‘i le fatafaitaulaga o le ALI‘I lou Atua ma e fai ai taulaga mū i le ALI‘I lou Atua i ona luga; 7‘ia e fai ai fo‘i taulaga fa‘afetai, ma e ‘ai ai i lea mea, ma ‘oli‘oli i luma o le ALI‘I lou Atua. 8‘Ia e tusi fo‘i i ma‘a o ‘upu uma lava o lenei tulafono, ‘ia togitogi lelei lava.
9‘Ona tautala atu lea o Mose ma le ‘au ositaulaga o sa Levī ‘iā Isaraelu uma lava, ‘ua fa‘apea atu: Isaraelu e, ‘ia e fa‘asaga mai ma e fa‘alogologo mai; o le aso nei ‘ua ‘avea ai oe ma nu‘u lilo o le ALI‘I lou Atua. 10‘Ia e fa‘alogo fo‘i i le si‘ufofoga o le ALI‘I lou Atua, ma ‘ia e faia ana poloa‘iga ma ana tulafono, ‘ou te fai atu ai ‘iā te oe i le aso nei.
O le Malaia ‘ona o le lē Usiusita‘i
11‘Ua fai atu fo‘i Mose i le nu‘u i lea lava aso, ‘ua fa‘apea atu: 12E tutū i latou nei i le mauga o Keresema e fa‘amanuia atu i le nu‘u, pe a ‘outou sopo‘ia atu Ioritana; o Simeona, ma Levi, ma Iuta ma Isakara, ma Iosefa, ma Peniamina.#Teu 11.29; Iosu 8.33-35 13E tutū fo‘i i latou nei i le mauga o Evalu e fa‘afano; o Reupena, o Kato, ma Asera ma Sepulona, o Tanu, ma Nafatali. 14E fai atu fo‘i sa Levī ma le leo tele, e fa‘apea atu i tagata uma lava o Isaraelu:
15“‘Ia malaia lava le tagata na te faia se tupua ‘ua ta, po o se tupua u‘amea, o le mea e ‘inosia e le ALI‘I, ‘ua faia i lima o le tufuga, ma tu‘u ai i se mea lilo.”#Eso 20.4; 34.17; Levi 19.4; 26.1; Teu 4.15-18; 5.8
‘Ona tali mai ai lea o le nu‘u uma lava, e fa‘apea mai, “Amene.”
16“‘Ia malaia lē na te fa‘alēaogāina lona tamā po o lona tinā.”#Eso 20.12; Teu 5.16
‘Ona tali mai ai lea o le nu‘u uma lava, “Amene.”
17“‘Ia malaia lē na te si‘i tuā‘oi o lē la te tuā‘oi.”#Teu 19.14
‘Ona tali mai ai lea o le nu‘u uma lava, “Amene.”
18“‘Ia malaia lē na te fa‘asesēina le tauaso i le ala.”#Levi 19.14
‘Ona tali mai ai lea o le nu‘u uma, “Amene.”
19“‘Ia malaia lē na te fa‘api‘opi‘oina le fa‘amasinoga i le tagata ‘ese, ma lē ‘ua aumatuā, ma le fafine ‘ua oti lana tane.”
#
Eso 22.21; 23.9; Levi 19.33-34; Teu 24.17-18
‘Ona tali mai ai lea o le nu‘u uma, “Amene.”
20“‘Ia malaia lē la te momoe ma le avā a lona tamā; auā e susu‘e e ia le ‘ie o lona tamā.”#Levi 18.8; 20.11; Teu 22.30
‘Ona tali mai ai lea o le nu‘u uma, “Amene.”
21“‘Ia malaia lē la te momoe ma se manu.”#Eso 22.19; Levi 18.23; 20.15
‘Ona tali mai ai lea o le nu‘u uma lava, “Amene.”
22“‘Ia malaia lē la te momoe ma lona tuafafine, o le afafine o lona tamā, po o le tama teine a lona tinā.”#Levi 18.9; 20.17
‘Ona tali mai ai lea o le nu‘u uma lava, “Amene.”
23“‘Ia malaia lē la te momoe ma le tinā o lana avā.”#Levi 18.17; 20.14
‘Ona tali mai ai lea o le nu‘u uma, “Amene.”
24“‘Ia malaia lē na te fasi fa‘alilolilo lē la te tuā‘oi.”
‘Ona tali mai ai lea o le nu‘u uma, “Amene.”
25“‘Ia malaia lē na te talia se taui e fasioti ai se tagata ‘ua lē sala.”
‘Ona tali mai ai lea o le nu‘u uma, “Amene.”
26“‘Ia malaia lē na te lē fa‘amauina ‘upu o lenei tulafono e faia.”#Kala 3.10
‘Ona tali mai ai lea o le nu‘u uma, “Amene.”
Currently Selected:
Teuteronome 27: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
