Galuega 24

O le Moliaga o Paulo ma Lana Tali

1‘Ua mavae aso e lima, ‘ona alu ifo lea o le ositaulaga sili o Anania, ‘atoa ma toeaina, ma le tasi fai lauga o Titulo le igoa, ‘ua latou fa‘aali atu i le ali‘i mea ‘ua ia Paulo. 2‘Ua ‘amia o ia, ‘ona āfua lea e Titulo ‘ona molia o ia, ‘ua fa‘apea atu,

“Le ali‘i e Filiki, o lo‘o ‘iā te i matou le filemū tele ‘ona o oe, o lo‘o faia fo‘i mea e au tonu lelei i lenei nu‘u i lau sauniga poto, 3‘ua matou tali lelei atu ai i aso uma, ma nu‘u uma, ma le fa‘amanū tele atu. 4‘Ae peita‘i ‘ina ne‘i ‘ou fa‘alavelave pea ‘iā te oe, ‘ou te ‘ai‘oi atu, se‘i e fa‘afofoga mai i nai ‘upu itiiti ‘ona o lou agalelei. 5Auā ‘ua maua, e i matou lenei tagata o le fa‘asoesā, ma le fa‘atupu le fouvale i tagata Iutaia uma i le lalolagi uma, ma le ta‘ita‘i i le itū‘āiga o le ‘au Nasareta; 6na taumafai fo‘i o ia e soli i le malumalu; ‘ua matou pu‘e atu fo‘i ‘iā te ia.#24.6 O nisi o fa‘aliliuga e fa‘aopoopo i ai le fuai‘upu 6-8: na fai a matou fa‘amasino ‘iā te ia e tusa ma la matou tulafono, 7 a ‘ua o‘o ane Lusia le ali‘i a pule i ‘au, ma ‘ave ‘iā te ia ma le fa‘amalosi tele nai o matou lima. 8 Na poloa‘i atu o ia ‘iā te i latou ē na molia o ia e ō mai ‘iā te oe. 8O lou fa‘amasino ‘iā te ia e mafai ai ‘ona e silafia lelei mea uma lava ‘ua matou molia ai o ia.” 9‘Ua ‘au fa‘atasi ai tagata Iutaia, ‘ua fai atu, ‘ua fa‘apea lava na mea.

O Paulo i luma o Filiki

10‘Ua geno mai le ali‘i ‘iā Paulo e fai mai, ‘ona tali atu lea o ia,

“‘Ua ‘ou iloa ‘ua tele tausaga o ē fa‘amasino ai i lenei nu‘u, ‘ua atili ai lo‘u fiafia e fa‘atonuina atu a‘u mea; 11auā ‘ua mafai ‘ona e silafia, ‘ua na o aso e sefulu ma le lua talu ‘ona ‘ou alu a‘e i Ierusalema e tapua‘i. 12Na lē maua fo‘i a‘u e i latou i le malumalu, po o sunako, po o le ‘a‘ai, o finau ma se tasi, po o fa‘anunununu i le motu o tagata; 13latou te lē mafaia fo‘i ‘ona fa‘amaoni o ia mea ‘ua latou molia ai a‘u. 14A ‘ou te ta‘utino atu lenei mea ‘iā te oe, ‘ou te ‘au‘auna i le Atua o matou tamā, e tusa ma le Ala ‘ua ta‘ua e i latou o le lotu ‘ua vavae; o lo‘o talitonu i mea uma lava ‘ua tusia i le tulafono ‘atoa ma le ‘au perofeta; 15o lo‘o ‘iā te a‘u le fa‘amoemoe i le Atua, ‘ua tāofia fo‘i e i latou nei, o le a toe tutū mai o ē ‘ua amiotonu ‘atoa ma ē ‘ua amioletonu. 16O le mea lea ‘ou te taumafai ai a‘u, ‘ina ‘ia maua e a‘u le loto fuatia ifo e lelei i le Atua ‘atoa ma tagata e lē aunoa.

17“‘Ua mavae tausaga e tele, ‘ona ‘ou alu lea e avatu mea alofa i lo‘u nu‘u ‘atoa ma taulaga.#Galu 21.17-28 18A o faia ia mea, ‘ua iloa a‘u ‘ua fa‘amamāina a‘u i le malumalu; ‘ua lē nunu mai tagata, ‘ua leai se pisaō. 19E tusa pe ana ‘i‘inei o i latou i ou luma, ia molia a‘u, pe a ‘ua i ai sa latou mau ‘iā te a‘u. 20A leai, se‘i fai mai lava i latou nei, pe na iloa e i latou sa‘u amioletonu, ‘ina o ou tu i luma o le fono. 21Pe na o lea ‘upu e tasi, na ‘ou ‘alaga atu ai ‘ina o ‘ou tu i o latou luma. ‘O le toetū mai o ē ‘ua oti ‘ua fa‘amasinoina ai a‘u e ‘outou i le aso nei.’”#Galu 23.6

22‘Ua fa‘alogo Filiki i nei ‘upu, ‘ona fa‘atuai mai lea o ia ‘iā te i latou, ‘ina ‘ua iloa lelei e ia le uiga o le Ala, ‘ua fa‘apea atu, “Pe a maliu mai le ali‘i e pule i ‘au, o Lusia, ‘ou te matuā su‘esu‘e ‘iā ‘outou mea.” 23‘Ua na poloa‘i atu fo‘i i le ta‘ita‘i o le to‘aselau e leoleo atu ia Paulo, a ‘ia fealualua‘i, ‘ina ‘ia ‘aua le vavao atu i se tasi o le ‘au uso ē ‘au‘auna atu ‘iā te ia.

O Paulo i luma o Filiki ma Tusila

24‘Ua mavae isi aso, ‘ona ō mai lea o Filiki ma Tusila lana avā, o le fafine Iutaia, ma ‘ua ‘a‘ami mai ‘iā Paulo, ‘ia fa‘alogo mai ‘iā te ia i le fa‘atuatua ‘iā Keriso. 25‘Ua finau atu o ia i le amiotonu, ma le amio mamā, ma le fa‘amasinoga atalī, ‘ona gatete ai lea o Filiki, ‘ua fai mai, “Se‘i e alu atu i le aso nei, se‘ia ‘ou maua fo‘i se aso e aunoa, i lo‘u toe ‘a‘ami atu ‘iā te oe.” 26‘Ua fa‘amoemoe fo‘i o ia i ni tupe e foa‘iina atu e Paulo mā ia, ‘ina ‘ia tu‘u atu ai ‘iā te ia e alu; o le mea lea ‘ua atili ai ‘ona ‘a‘ami so‘o ‘iā te ia, ma tautala ma ia.

27A ‘ua mavae tausaga e lua, ‘ona suia lea o Filiki e Pokio Feso; ‘ua loto fo‘i Filiki e fa‘afiafia ia Iutaia, ‘ona tu‘u lea e ia ‘iā Paulo o fusifusia.

Currently Selected:

Galuega 24: RSCB

Highlight

Copy