2 Samuelu 17
17
‘Ua Fa‘alēaogāina le Pule a Aitofele e Usai
1‘Ona fai ane lea o Aitofele ‘iā Apisaloma, “So‘u filifilia tagata e sefulu afe ma afe e lua, ma a‘u tula‘i atu ma tuliloa ‘iā Tavita i le po nanei; 2‘ona ‘ou o‘o atu lea ‘iā te ia manū o vaivai ma lē lavā o ia, ma ‘ou fa‘amata‘u ‘iā te ia; ‘ona sōsōla ai lea o le nu‘u uma ‘ua ‘iā te ia ‘ona ‘ou fasia lea na o le tupu lava.#2 Samu 16.14; 1 Tu 22.31; Ioane 11.50 3‘Ona a‘u fa‘afoisia mai lea o le nu‘u uma ‘iā te oe; o le tagata o lo‘o e sā‘ilia e peiseaī ‘ua fo‘i uma mai ai; o le nu‘u uma e filemū i latou.” 4‘Ua tonu lava le ‘upu i le manatu o Apisaloma, ma manatu o toeaina uma o Isaraelu.
5‘Ua fai ane Apisaloma, “Se‘i vala‘au fo‘i ‘iā Usai le Araki, tatou te fa‘alogologo pe se a sana fetalaiga.”#2 Samu 16.16-18 6‘Ona alu ane lea o Usai ‘iā Apisaloma, ‘ua fai mai Apisaloma, ‘iā te ia, ‘ua fa‘apea, “‘Ua fa‘apea mai le fetalaiga a Aitofele; pe tatou te faia ‘ea lenā mea? a leai, fetalai mai ia oe.?”
7‘Ua fai atu Usai ‘iā Apisaloma, “E lē lelei le pule na pule ai Aitofele i lenei mea.” 8‘Ua fai atu fo‘i Usai, “‘Ua e silafia lava lou tamā ma ona tagata, o toa i latou; o lo‘o tigā o latou loto, pei o le urosa i le vao ‘ua ‘avea lana toloa‘i; o lou tamā fo‘i o le tagata tau o ia, e lē moe o ia fa‘atasi ma le nu‘u;#Fa‘ata 17.12; Hose 13.8 9fa‘auta, o lo‘o lafi nei o ia i se tasi lua, po o se tasi mea; a o‘o ‘ina fasia ni o latou i le amataga, ‘ona fa‘apea ane ai lea o i latou o ē fa‘alogo i le tala, ‘‘Ua tō le fasi o le nu‘u ‘ua mulimuli ‘iā Apisaloma.’ 10O le tagata malosi fo‘i, o lona loto ‘ua pei o le loto o le leona, e liu suāvai o ia auā ‘ua iloa e Isaraelu uma, o le toa lava lou tamā, o tagata malolosi fo‘i i latou o lo‘o ‘iā te ia. 11O lenei, o lo‘u nei manatu, ‘ia matuā fa‘apotopotoina ‘iā te oe Isaraelu uma lava, e pau mai i Tanu e pau mai i Peresepa, e pei o le oneone o le sami ‘ona to‘atele; ma ‘ia e afio atu lava oe i le tau‘a.#2 Samu 3.10 12‘Ona tatou o‘o atu lea ‘iā te ia i se tasi mea e maua mai ai o ia, tatou te o‘o atu ‘iā te ia, e pei ‘ona totō ifo o le sau i le ‘ele‘ele; ‘ona lē fa‘asaoina ai lea o se to‘atasi, o ia ma tagata uma o lo‘o ‘iā te ia. 13‘Ae ‘āfai ‘ua o‘o atu ia i se ‘a‘ai, ‘ona avatua lea e Isaraelu uma i lea ‘a‘ai o maea, tatou te tosoina i le alia, se‘ia o‘o ‘ina lē maua ai lava sina ma‘a.”
14‘Ona fai ane lea o Apisaloma ma tagata uma o Isaraelu, “E sili ‘ona lelei o le pule a Usai le Araki i le pule a Aitofele,#2 Samu 15.31, 34 auā ‘ua finagalo le ALI‘I e fa‘alēaogāina le pule lelei a Aitofele, ‘ina ‘ia fa‘ao‘o e le ALI‘I le malaia ‘iā Apisaloma.”
‘Ua Fefe Tavita ma ‘ua toe Sola
15‘Ona fai atu lea o Usai ‘iā Satoka ma Aviata o ositaulaga, “‘Ua fa‘apea ‘ona pule o Aitofele ‘iā Apisaloma ma toeaina o Isaraelu, ma ‘ua fa‘apea la‘u pule.#2 Samu 15.35-36 16O lenei, ‘ia ‘a‘au fa‘ata‘alise atu nisi, ma ta‘u atu ‘iā Tavita, ‘ia fa‘apea, ‘‘Aua le aoina oe i le ‘ele‘ele laugatasi i le vao; a ‘ia vave ‘ona e alu atu, ne‘i fa‘aumatia le tupu, ma le nu‘u uma o lo‘o ‘iā te ia.’”
17Sa nonofo Ionatana ma Aimaasu i Enerokelu, ‘ua alu atu ai le ‘au‘auna fafine e ta‘u atu ‘iā te i lā‘ua; ‘ona la ō atu lea e ta‘u atu i le tupu o Tavita; auā e lē mafai ‘ona la fa‘ailoa atu o i lā‘ua i le ‘a‘ai.#Iosu 15.7; 18.16; 2 Samu 15.27, 36; 1 Tu 1.9 18A ‘ua iloa i lā‘ua e le tasi taule‘ale‘a, ‘ona ia ta‘u atu lea ‘iā Apisaloma; a ‘ua la vave atu, ma la ō i le fale o le tagata Pauri, sa ‘iā te ia le vai‘eli i lona lotoā, ‘ua la ō ifo ai. 19‘Ona avatu lea e le fafine, ma na fofola se mea e ufiufi a‘i le gutu o le vai‘eli, ‘ona folafola lea i ona luga o saito ‘ua oloina; ‘ua lē iloa e se tasi le togafiti.#Iosu 2.6 20‘Ona o‘o atu lea o ‘au‘auna a Apisaloma, i le fafine i le fale, ‘ua latou fai mai, “O i fea Aimaasu ma Ionatana?”
‘Ua fai mai le fafine ‘iā te i latou, “‘Ua sopo‘ia atu i lā‘ua i le vaitafe.”
‘Ua latou sā‘ilia, a ‘ua lē maua, ‘ona latou fo‘i lea i Ierusalema. 21‘Ua o‘o ‘ina ‘ua ō i latou, ‘ona ō a‘e lea o i lā‘ua a‘i le vai‘eli; ‘ua la ō ma ta‘u ane i le tupu o Tavita; ‘ua la fa‘apea mai fo‘i ‘iā Tavita, “Tula‘i ia ma ‘outou vave atu i le itū vai, auā na fa‘apea ‘ona pule o Aitofele ‘iā te ‘outou.” 22‘Ona tula‘i lea o Tavita ma le nu‘u uma sa ‘iā te ia, ‘ua latou sopo‘ia atu Ioritana. ‘Ua o‘o ‘ina malama a‘e le taeao, ‘ua lē toe ai lava se tasi ‘ua lē sopo‘ia atu Ioritana.
23‘Ua iloa e Aitofele ‘ua lē faia lana pule, ‘ona ia fa‘anofoaina lea o lana asini, ‘ua tula‘i ma alu atu i lona fale i lona lava nu‘u; na tofi e ia ana mea i lona ‘āiga, ‘ona noa ai lea o ‘iā te ia,#17.23 ‘ona noa ai lea o ia ‘iā te ia: po o ‘ona nofo lea o ia ma sisi o ia. ‘ua oti ai ‘ona tanu ai lea o ia i le tu‘ugamau o lona tamā.#2 Samu 15.12; Mata 27.5
24‘Ua o‘o atu Tavita i Maanaima ‘ua sopo‘ia atu fo‘i Apisaloma i Ioritana, o ia ‘atoa ma tagata Isaraelu uma fa‘atasi ma ia. 25‘Ona tofia lea o Amase e Apisaloma, ‘ia pule i ‘au e sui a‘i Ioapo; o Amase fo‘i o le atali‘i o le tasi tagata e igoa ‘iā Ietero, o le sa Isaraelū, o lē na alu atu ‘iā Apikaila le afafine o Naasa, le uso o Seruia, le tinā o Ioapo.#2 Samu 19.13; 20.9, 12; 1 Tu 2.5, 32; 1 No 2.13, 16-17 26‘Ua tolauapi Isaraelu ma Apisaloma i le nu‘u o Kiliata.
27‘Ua o‘o atu Tavita i Maanaima, ‘ona avatu lea e Sopi le atali‘i o Naasa (mai Rapa, o le ‘a‘ai a le fānauga a Amoni), ma Makira le atali‘i o Amueli mai Lotapara, ma Pasili le Kiliata mai Rokeli,#2 Samu 9.4; 10.1-2; 12.26; 19.31-32; 1 Tu 2.7 28o moega, ma ipu, ma ipu ‘omea, ma saito, ma karite, ma falaoa, ma saito tunu, ma fua o fue, ma atasema, ma karite tunu, 29ma meli, ma suāsusu to‘a, ma mamoe, ma suāsusu ma‘a‘a o povi, ma ‘aumaia mā Tavita ma le nu‘u ‘ua ‘iā te ia, latou te ‘a‘ai ai; auā na latou fa‘apea ane, “‘Ua fia ‘a‘ai le nu‘u ma ‘ua vaivai ma fia inu i le vao.”#2 Samu 16.2
Currently Selected:
2 Samuelu 17: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
