2 Samuelu 14
14
‘Ua Toe ‘Amia Apisaloma
1‘Ua iloa e Ioapo le tama a Seruia, ‘ua loto atu le tupu ‘iā Apisaloma;#2 Samu 12.20; 20.16; 2 No 20.20; Amo 1.1 2‘ona avatu lea o le fe‘au a Ioapo i Tikoa, ‘ua ‘a‘ami mai ai le fafine poto, ‘ua fai atu ‘iā te ia, “‘Ia e fa‘atagā fa‘anoanoa, ma e ‘ofu i ‘ofu fa‘anoanoa, ‘aua fo‘i ‘e te u‘u oe, a ‘ia e fa‘apei o se fafine ‘ua fa‘anoanoa i aso e tele ‘ona o lē ‘ua oti. 3‘E te alu atu fo‘i i le tupu, ma e fai atu ‘iā te ia i ‘upu fa‘apenei.” ‘Ona tu‘utaliga atu lea e Ioapo o ‘upu ‘iā te ia.#2 Samu 14.19
4‘Ua fai atu le fafine Tikoa i le tupu, ma fa‘apa‘ū faō i le ‘ele‘ele, ‘ua ifo ‘iā te ia, ma fai atu, “Fesoasoani mai ia, le tupu e!”
5‘Ua fai mai le tupu ‘iā te ia, “O lea ‘ea?”
‘Ua fai mai o ia, “O a‘u lava le fafine nofo fua, ‘ua oti la‘u tane.#2 Samu 12.1 6Sa i lau ‘au‘auna fafine tama tane e to‘alua, sa la femisa‘i i le vao, ‘ua leai sē na te pupulu i‘a te i lā‘ua; ‘ona fasia lea o le tasi e le tasi, ‘ua fasioti lava ‘iā te ia. 7Fa‘auta mai fo‘i, ‘ua tutū mai le ‘āiga uma i lau ‘au‘auna fafine, o lo‘o fa‘apea mai i latou, ‘Tu‘u mai ia o lē na fasia lona uso, ‘ina ‘ia matou fasiotia o ia e sui a‘i lona uso na ia fasia; matou te fasiotia lava lē ‘ua i ai le tofi;’ ‘ona latou tineia lea o la‘u malala ola o lo‘o toe, e le tu‘u mai i la‘u tane se igoa ma se toe tagata i le fogā‘ele‘ele.”#2 Samu 21.17; Mare 12.7
8‘Ua fai mai le tupu i le fafine, “Alu ia oe i lou fale; a o a‘u, ‘ou te fai atu ‘iā te i latou i lau mea.”
9‘Ua fai mai le fafine Tikoa i le tupu, “Lo‘u ali‘i e, le tupu, ‘ia ‘iā te a‘u le sala ‘atoa ma le ‘āiga o lo‘u tamā, a ‘ia sao le tupu ma lona nofoāli‘i.”#1 Samu 25.24
10‘Ona fai atu lea o le tupu, “‘Ai sē fai atu ‘iā te oe, ‘aumai o ia ‘iā te a‘u, ‘ona lē toe tago atu lea o ia ‘iā te oe.”
11‘Ua fai mai le fafine, “‘Ia manatu le tupu i le ALI‘I lou Atua, ma ‘ia lē fa‘aopoopo i lē na te taui i le toto e fa‘aumatia ai, ‘ina ‘ia latou lē fasioti i la‘u tama.”
‘Ua fai atu o ia, “O lo‘o soifua le ALI‘I, e lē pa‘ū lava i le ‘ele‘ele se lauulu o lau tama.”#Nume 35.19, 21; Teu 19.12; 1 Samu 14.45; Galu 27.34
12‘Ua fai mai le fafine, “Se‘i fai atu le ‘upu a lau ‘au‘auna fafine i lo‘u ali‘i le tupu.”
‘Ua fai atu o ia, “‘Inā fai mai ia.”
13‘Ona fai mai lea o le fafine, “O le a le mea ‘ua e manatu fa‘apea i le nu‘u o le Atua? ‘Ua fetalai mai fo‘i le tupu i lenei mea peiseaī o lē ‘ua sesē, ‘ina ‘ua lē fa‘afoisia mai e le tupu o lē na tulia e ia. 14Auā e oti lava i tatou, e tusa fo‘i ma le suāvai ‘ua fa‘amaligiina i le ‘ele‘ele, e lē ma fa‘apotopotoina; e le‘i fasiotia fo‘i o ia e le Atua, a ‘ua na manatua se mea ‘ia lē tulia ai nai ‘iā te ia lē ‘ua tulia.#1 Samu 26.19; Iopu 7.9; 14.10; Sala 88.5; Fai 3.19-21; 8.8; Iako 4.14 15O lenei, ‘ua ‘ou sau e tautala atu i lo‘u ali‘i le tupu i nei mea, auā na fa‘amata‘u le nu‘u ‘iā te a‘u, ‘ona fai atu lea o lau ‘au‘auna fafine, ‘‘Ou te tautala atu lava i le tupu; atonu e faia e le tupu le mea e fai atu ai lana ‘au‘auna fafine. 16Auā e fa‘afofoga mai le tupu, na te lavea‘i mai i lana ‘au‘auna fafine a‘i le lima o le tagata ‘ua fia fa‘aumatia a‘u ‘atoa ma la‘u tama a‘i le tofi o le Atua.’ 17Na fa‘apea fo‘i lau ‘au‘auna fafine, ‘E fai ma fa‘amatalaloto le fetalaiga a lo‘u ali‘i le tupu;’ auā e pei o se agelu a le Atua, o lo‘o fa‘apea lo‘u ali‘i le tupu e fa‘afofoga i le lelei ma le leaga; ‘ona i ai lea ‘iā te oe le ALI‘I lou Atua.”#2 Samu 19.27
18‘Ona fai atu ai lea o le tupu, ‘ua fa‘apea atu i le fafine, “‘Aua lava ‘e te na ‘iā te a‘u le mea ‘ou te fesili atu ai ‘iā te oe.”
‘Ua fai mai le fafine, “Se‘i fetalai mai ia lo‘u ali‘i le tupu.”
19‘Ona fai atu lea o le tupu, “E le ‘au ‘ea ‘oulua ma Ioapo i lenei mea uma?”#2 Samu 14.3
‘Ua tali mai le fafine, ‘ua fa‘apea mai, “‘Ua e soifua oe lo‘u ali‘i e, le tupu, e le ‘alo se tasi i le itū taumatau, po o le itū tauagavale#14.19 e le ‘alo se tasi…itū taumatau…tauagavale: po o e sa‘o ma fa‘amaoni mea uma o lo‘o e fetalai mai ai. a‘i mea uma ‘ua fetalai mai ai lo‘u ali‘i le tupu; auā o lau ‘au‘auna o Ioapo, o ia lava na fai mai ‘iā te a‘u, o ia fo‘i na tu‘utaliga nei ‘upu uma i lau ‘au‘auna fafine. 20‘Ua saunia ai nei ‘upu e lau ‘au‘auna o Ioapo, ‘ina ‘ia fa‘ao‘o ai i lenei matā‘upu, ‘ua poto fo‘i lo‘u ali‘i, pei ‘ona poto o se agelu a le Atua, e silafia ai mea uma i le lalolagi.”
21‘Ona fai atu lea o le tupu ‘iā Ioapo, “Fa‘auta ‘ea, ‘ua ‘ou faia lenei mea; alu ‘iā oe, ma e ‘amia le taule‘ale‘a o Apisaloma.”
22‘Ona fa‘apa‘ū faō ai lea o Ioapo i le ‘ele‘ele, ‘ua ifo, ma fa‘afetai i le tupu; ‘ua fai mai fo‘i Ioapo, “O le aso nei ‘ua iloa ai e lau ‘au‘auna ‘ua alofagia a‘u e oe lo‘u ali‘i le tupu, ‘ina ‘ua faia e le tupu le mea na fai atu ai lau ‘au‘auna.” 23‘Ona tula‘i lea o Ioapo, ‘ua alu atu i Kasuri, ‘ua na ‘aumaia Apisaloma i Ierusalema.#2 Samu 13.38 24‘Ua fai ane le tupu, “Alu ane ia i lona fale, ‘ae ‘aua ne‘i ma feiloa‘i.” ‘Ona alu ane ai lea o Apisaloma i lona fale, a ‘ua lē feiloa‘i ma le tupu.
O le Fa‘aleleiga a Apisaloma ma Tavita
25Sa leai se tagata i Isaraelu uma e pei o, Apisaloma ‘ona ‘aulelei; sa matuā vi‘ia ai lava o ia; e āfua mai i ona alofivae e o‘o i lona tumua‘i, e leai se ponā ‘iā te ia. 26A sele lona lauulu, (auā o le gata‘aga o tausaga fai so‘o na ia sele ai; auā sa mafatia ai o ia, ‘ona sele ai lea,) na ia fuatia le lauulu o lona ulu, e lua selau sekeli i le fua a le tupu. 27Na fānau atali‘i o Apisaloma e to‘atolu, ma le afafine e to‘atasi, o lona igoa o Tamara; o ia le fafine lālelei lava.#2 Samu 18.18
28‘Ua nofo Apisaloma i Ierusalema i tausaga e lua, ‘ae la te le‘i feiloa‘i lava ma le tupu. 29‘Ona fe‘auina lea e Apisaloma o Ioapo, ‘ina ‘ia na ‘auina atu o ia i le tupu; ‘ae lē mafai ‘ona sau o ia ‘iā te ia. ‘Ona toe fe‘au fa‘alua lea ‘iā te ia, ‘ae lē mafai ‘ona sau o ia. 30‘Ona fai atu lea o ia i ana ‘au‘auna, “Fa‘auta, o le fanua o Ioapo o lo‘o tatou tuā‘oi; o i ai fo‘i ana karite, ō ia ‘outou, ‘inā fa‘amū ai i le afi.” ‘Ona fa‘amūina lea e ‘au‘auna a Apisaloma o le fanua i le afi.
31‘Ona tula‘i lea o Ioapo, ‘ua alu ane ‘iā Apisaloma i lona fale ‘ua fai mai ‘iā te ia, “O le a le mea ‘ua fa‘amū ai e au ‘au‘auna lo‘u fanua i le afi.”
32‘Ona fai atu lea o Apisaloma ‘iā Ioapo, “Fa‘auta, na ‘ou fe‘au atu ‘iā te oe, ‘ua fa‘apea, ‘Sau ia, ‘ou te ‘auina atu oe i le tupu, ia fa‘apea, Se a le mea na ‘ou sau ai nai Kaseri? e lelei lava ana a‘u i ai pea;’ o lenei se‘i ma feiloa‘i ma le tupu; ‘āfai fo‘i o ‘iā te a‘u se agasala, ‘ia fasiotia a‘u e ia.”#2 Samu 13.38
33‘Ona alu atu lea o Ioapo i le tupu, ‘ua ta‘u atu ai ‘iā te ia; ‘ona ‘a‘ami ai lea e ia o Apisaloma, ‘ua ia alu atu i le tupu, ma ifo to‘ele i luma o le tupu; ‘ona sogi atu lea o le tupu ‘iā Apisaloma.#Luka 15.20
Currently Selected:
2 Samuelu 14: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
