2 Korinito 6
6
O le Fa‘amaoni o Paulo i le Tala‘iga o le Tala Lelei
1O lenei fo‘i, o i matou o faigaluega fa‘atasi ma ia, ‘ua matou ‘ai‘oi atu ‘iā te ‘outou, ‘ina ne‘i talia fua e ‘outou le alofa tunoa a le Atua. 2Auā ‘ua fa‘apea mai o ia,#Isai 49.8; Luka 4.19, 21
“O le tausaga e talia ai,
na ‘ou fa‘alogo ai ‘iā te oe,
o le aso fo‘i e fa‘aolaina ai,
na ‘ou fesoasoani ai ‘iā te oe.”
Fa‘auta, o lenei le tausaga e talileleia mai ai; fa‘auta, o lenei le aso e fa‘aolaina ai.
3‘Ua matou lē tu‘uina atu se mea e tasi e tausuai ai, ‘ina ne‘i ta‘uleagaina la matou galuega. 4A o mea uma lava ‘ua fa‘ailoa ai i matou o ‘au‘auna a le Atua i matou, i le ‘onosa‘i tele, i puapuagā, i malaia, i atuatuvale, 5i le matelaina i tu‘uina i fale puipui, i fa‘alētaupulea, i galuega, i mataala, i anapopogi,#2 Kori 11.23-27; Galu 16.23 6i le amio mamā, i le iloa, i le fa‘apalepale, i le agalelei, i le Agaga Pa‘ia, i le alofa moni, 7i le tautala i le ‘upu moni, i le mana o le Atua, e i ai fo‘i ‘au‘upega o le amiotonu i le itū taumatau ‘atoa ma le itū tauagavale, 8i le vi‘ia ma le fa‘aleagaina, i le ta‘uleagaina ma le ta‘uleleia. O i matou ‘ua peiseaī o ē fa‘asesē, ‘ae fa‘amaoni lava; 9peiseaī ‘ua lē iloa, a ‘ua lauiloa; peiseaī a oti, fa‘auta fo‘i, o lo‘o ola i matou; peiseaī ‘ua a‘oa‘iina, ‘ae lē fasiotia;#2 Kori 4.10; Sala 118.18 10peiseaī o fa‘anoanoa, a o lo‘o ‘oli‘oli pea; peiseaī o matitiva, a ‘ua matou fa‘atamao‘āigaina nisi e to‘atele; peiseaī e leai sina mea o ‘iā te i matou, a o lo‘o ‘iā te i matou mea uma.
11‘Outou Korinito e, ‘ua matou matuā tautala atu ‘iā te ‘outou, ‘ua tatala o matou loto ‘iā te ‘outou.#Sala 119.32 12E lē o tāofia ‘outou e i matou a o o ‘outou lava loto ‘ua tāofiofi ai ‘outou. 13O lea ‘ou te fai atu ‘iā te ‘outou pei o la‘u fānau, ‘ia ‘outou taui mai i lo ‘outou fo‘i loto mataala.
O le Lapata‘iga i Aga Fa‘apaupau
14‘Aua tou te amo fa‘alegatasi ma ē lē fa‘atuatua; auā pe fa‘apefea ‘ona fa‘atasi o le amiotonu ma le amio leaga? Pe fa‘apefea fo‘i ‘ona mafuta o le malamalama ma le pouliuli? 15Pe fa‘apefea fo‘i ‘ona loto gatasi o Keriso ma Pelialo? Pe fa‘apefea fo‘i ‘ona tofusia fa‘atasi o lē fa‘atuatua ma le ‘ua lē fa‘atuatua? 16Pe fa‘apefea fo‘i ‘ona feagai le malumalu o le Atua ma tupua? Auā o matou#6.16 matou: O nisi fa‘aliliuga; latou. o le malumalu o le Atua soifua, pei ‘ona fetalai mai ai le Atua,#1 Kori 3.16; 6.19; Levi 26.12; Eseki 37.27
“‘Ou te nofo i totonu ‘iā te i latou,
‘ou te savali fo‘i i totonu ‘iā te i latou;
e fai a‘u mo latou Atua,
e fai fo‘i i latou mo‘u tagata.
17O lea,#Iere 51.45; Eseki 20.34, 41; Isai 52.11; Fa‘aa 18.4
‘Ia ō mai ai ‘outou nai totonu ‘iā te i latou,
ma ‘ia ‘outou vavae mai, ‘ua fetalai mai ai le Ali‘i,
‘aua fo‘i tou te papa‘i atu i se mea leaga;
‘ona ‘ou talia ai lea o ‘outou.
18E fai fo‘i a‘u mo ‘outou Tamā,#2 Samu 7.8; Isai 43.6; Iere 31.9; 32.38; Hose 1.10; Amo 4.13
e fai fo‘i ‘outou mo‘u atali‘i ma o‘u afafine,
‘ua fetalai mai ai le Ali‘i e ona le malosi uma lava.”
Currently Selected:
2 Korinito 6: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
