2 Korinito 13
13
‘Ia Latou Su‘esu‘e ‘iā te i Latou
1O le atu tolu lenei o le a ‘ou alu atu ai ‘iā te ‘outou. “E mautū ‘upu uma i le mau a le to‘alua po o le to‘atolu.”#Teu 19.15; Mata 18.16; 1 Timo 5.19 2Na ‘ou ta‘u atu anamua, ‘ou te mua‘i ta‘u atu fa‘alua nei fo‘i, (peiseaī ‘ua ‘ou i ai, a ‘ou te lē i ai fo‘i) ‘ou te tusi atu nei i ē na agasala anamua ma ē o totoe ‘atoa uma, pe ‘āfai ‘ou te toe alu atu, ‘ou te lē fa‘amāmā lava; 3‘ina ‘ua ‘outou sā‘ili mai i se fa‘ailoga, po ‘ua tautala Keriso i totonu ‘iā te a‘u, o lē ‘ua lē vaivai ‘iā te ‘outou, ‘ae malosi i totonu ‘iā te ‘outou. 4Auā e ui lava ‘ina ‘ua fa‘asatauroina o ia i le vaivai, ‘ae peita‘i ‘ua soifua ia i le mana o le Atua; auā o i matou fo‘i, ‘ua matou vaivai ‘ina ‘ua ‘iā te ia, a ‘ua matou ola fa‘atasi ma ia i le mana o le Atua ‘iā te ‘outou nā.#Fili 2.7-8
5‘Inā tofotofo ia ‘outou ‘iā te ‘outou, po ‘ua ‘outou i le fa‘atuatua; ‘inā su‘esu‘e ifo ia ‘iā te ‘outou; pe tou te lē iloa ‘ea o ‘outou loto, ‘ua i totonu ‘iā te ‘outou o Iesu Keriso, pe ‘āfai ‘ua lē pepelo ‘outou?#1 Kori 11.28 6A o lo‘u lea tāofi, e iloa mai i matou e ‘outou ‘ua lē pepelo i matou. 7O lenei, ‘ou te tatalo atu i le Atua ‘ina ne‘i tou faia se mea leaga; e lē ‘ina ‘ia iloa mai i matou ‘ua fa‘amaoni, ‘ae ui lava ‘ina peiseaī ‘ua pepelo i matou, ‘ina ‘ia ‘outou faia le mea lelei. 8Auā matou te lē mafaia se mea e lē tatau ma le ‘upu moni, a o mea e tatau ma le ‘upu moni.#1 Kori 13.6 9Auā matou te ‘oli‘oli pe a ‘ua vaivai i matou ‘ae malolosi ‘outou; o lenei fo‘i le mea ‘ua matou tatalo atu ai, ‘ina ‘ia fa‘a‘ato‘atoaina ‘outou. 10O le mea lava lea ‘ou te tusi atu ai na mea, o lo‘o le i ai a‘u ‘iā te ‘outou, ‘ina ne‘i ‘ou fai fa‘amalosi pe a ‘ou i ai ‘iā te ‘outou, e tusa ma le pule ‘ua tu‘uina mai e le Ali‘i ‘iā te a‘u o ati a‘e ai ‘iā te ‘outou, ‘ae lē ‘ina ‘ia lepetia i lalo.#2 Kori 2.3; 10.8, 11
O le ‘Upu Mulimuli ma Fa‘amanuiaga
11Le ‘au uso e, o le toe ‘upu lenei; ‘ia ‘outou manuia, ‘ia fa‘a‘ato‘atoaina ‘outou, ‘ia fa‘amafanafanaina ‘outou, ‘ia loto gatasitasi ‘outou, ‘ia ‘outou fīfīlemū; ‘ona ‘iā te ‘outou lea o le Atua e ona le alofa ma le manuia.#Fili 4.4; Roma 15.33
12‘Ia ‘outou fealofani i le feasogi pa‘ia. O lo‘o alolofa atu ‘iā te ‘outou le ‘au pa‘ia uma. #1 Kori 16.20
13‘Ia ‘iā te ‘outou uma lava le alofa tunoa o le Ali‘i o Iesu Keriso, ma le alofa o le Atua, ‘atoa ma le mafuta fa‘atasi ma le Agaga Pa‘ia. Amene.
Currently Selected:
2 Korinito 13: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.