1 Timoteo 1
1
O ‘Upu Fa‘afeiloa‘i
1O Paulo, o le ‘aposetolo a Iesu Keriso, e tusa ma le poloa‘iga a le Atua lo tatou Fa‘aola, ma Iesu Keriso lo tatou fa‘amoemoe.
2‘Iā Timoteo lo‘u lava atali‘i i le fa‘atuatua; ‘ia ‘iā te oe le alofa tunoa, ma le alofa, ma le manuia mai le Atua le Tamā, ‘atoa ma Keriso Iesu lo tatou Ali‘i.#Galu 16.1; Tito 1.4
O Lapata‘iga i A‘oa‘oga Sesē
3Fa‘apei ‘ona ‘ou ‘ai‘oi atu ‘iā te oe, i lo‘u alu atu i Maketonia, ‘e te nofo i Efeso, ‘ia fa‘apea ‘ona e faia, ‘ina ‘ia e vavao atu i nisi, ‘aua fo‘i ne‘i latou a‘oa‘o i matā‘upu ‘ese.#1.3 matā‘upu ‘ese po o ‘upu sesē po o tala‘iga sesē po o a‘oa‘oga sesē. #Galu 20.1 4‘Aua ne‘i manatu i latou i tala o le vavau ma tala i gafa e leai ni ona gata‘aga, o mea ia e tupu ai finauga, ‘ae lē o le a‘oa‘oga mai le Atua o lo‘o i le fa‘atuatua. 5A o le i‘uga o lenei poloa‘iga, o le alofa lea ai le loto mamā, ma le loto fuatia ifo ‘ua lelei, ma le fa‘atuatua fa‘amaoni.#Roma 13.10; Kala 5.6 6‘Ua sesē ai nisi i ia mea, ‘ua latou liliu ane i ‘upu lē aogā;#1 Timo 6.4, 20 7‘ua manana‘o i latou e fai ma a‘oa‘o i le tulafono, a ‘ua latou lē iloa mea latou te tautalatala i ai, ma mea latou te fīnau fa‘amalosi i ai.
8‘Ua tatou iloa lava o le mea lelei le tulafono, pe ‘āfai e faia e se tasi o mea e tatau i ai. 9O lo‘o iloa lenei mea, ‘ua lē fa‘atūina mai le tulafono mo lē ‘ua amiotonu, a o ē fa‘alētaupulea ma ē soli i tulafono, o ē fa‘alēmata‘u ma ē agasala, o ē amio leaga ma ē ulavavale, o ē fasioti tamā ma ē fasioti tinā, o ē fasioti tagata, 10o ē faita‘aga, o ē fa‘asotoma, o ē gaoi tagata, o ē tala pepelo, o ē tautō pepelo; ma isi lava mea e fa‘atu‘i‘ese ai i le matā‘upu e ola ai.#1 Timo 6.15 11E tusa ma le tala lelei silisili a le Atua manuia, ‘ua tu‘uina mai ‘iā te a‘u.
O Amioga e Tusa ai ma le Alofa Tunoa o le Atua
12‘Ou te fa‘afetai atu fo‘i ‘iā Keriso Iesu lo tatou Ali‘i, o lē na fa‘amalosia a‘u, na ‘ia manatu ‘ua fa‘amaoni a‘u, i lona tofia o a‘u i lana galuega.#Galu 9.15; 1 Kori 15.9-10; Kala 1.13-16 13E ui ‘ina sa ‘ou mua‘i taufaifai, ma fa‘asauā, ma fa‘atautala; a ‘ua alofagia a‘u auā na ‘ou faia fa‘apea i lo‘u lē iloa ma le lē fa‘atuatua. 14‘Ua silisili fo‘i ‘ona tele o le alofa tunoa o lo tatou Ali‘i, ‘ua tupu mai ai lo‘u fa‘atuatua ‘atoa ma le alofa o lo‘o ‘iā Keriso Iesu. 15O le ‘upu moni lenei, e tatau lava ‘ona matuā talia, na maliu mai Keriso Iesu i le lalolagi na te fa‘aolaina o ē agasala; ‘ua sili musa a‘u nei ‘iā i latou.#1.15 ‘ua sili musa…‘iā i latou: po o ‘ua sili ‘ona ‘ou leaga ‘iā te i latou. #Luka 15.2; 19.10 16A o lenei lava le mea na alofaina ai a‘u, ‘ina ‘ia muamua ‘ona fa‘aalia mai ‘iā te a‘u e Iesu Keriso le ‘onosa‘i tele lava, ‘ia ‘avea a‘u ma fa‘ata‘ita‘i o ē a fa‘atuatua ‘iā te ia amulī, e maua ai le ola e fa‘avavau. 17O lenei, ‘ia i ai i le Tupu o le vavau, o lē o soifua pea lava, o lē lē o va‘aia, o le Atua e to‘atasi, ‘ia ‘iā te ia le mamalu ‘atoa ma le vi‘iga e fa‘avavau fa‘avavau lava. Amene.
18Lo‘u atali‘i e, Timoteo, ‘ou te tu‘uina atu lenei poloa‘iga ‘iā te oe, pei o mua‘i valo‘aga e uiga ‘iā te oe, ‘ina ‘ia e tau ai le tau‘a lelei.#1 Timo 6.12; Iuta 3 19O lo‘o ‘iā te oe le fa‘atuatua ma le loto fuatia ifo e lelei, ‘ua lafoa‘iina e nisi, o ē ‘ua fa‘ava‘atu‘ia i latou i la le fa‘atuatua; 20e i ai Umenaio ma Alesana, o ē ‘ua ‘ou tu‘uina atu ‘iā Satani, ‘ina ‘ia a‘oa‘oina i lā‘ua, ‘aua ne‘i ‘upu fāifai.#2 Timo 3.9
Currently Selected:
1 Timoteo 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.