1 Samuelu 8
8
O le Mana‘o o Isaraelu i se Tupu
1‘Ua o‘o ‘ina toeaina o Samuelu, ‘ona tofia ai lea e ia o ona atali‘i e fai ma fa‘amasino ‘iā Isaraelu. 2O le igoa o lona atali‘i ulumatua o Ioelu, a o le igoa o lē aupito ane i ai o Avia; ‘ua fai i lā‘ua ma fa‘amasino i Peresepa. 3A ‘ua lē sāvavali ona atali‘i i lona ala, ‘ua la ō ‘ese ai i le fia fai ‘oloa, ‘ua tali fo‘i i mea alofa ma fa‘api‘opi‘o i le fa‘amasinoga.#Eso 18.21; 23.8; Teu 16.19; 1 Samu 2.12; Sala 15.5
4‘Ona fa‘apotopoto ai lea o toeaina uma lava o Isaraelu, ‘ua latou ō atu ‘iā Samuelu i Rama. 5‘Ua latou fai mai fo‘i ‘iā te ia, “Fa‘auta, ‘ua e toeaina oe, o ou atali‘i fo‘i la te lē sāvavali i lou ala; o lenei, ‘ia e tofia se tupu mo i matou e fa‘amasino ‘iā te i matou, pei o nu‘u uma.”#Teu 17.14 6A ‘ua leaga ‘iā Samuelu le ‘upu sa latou fai mai, “‘Aumai se tupu ‘iā te i matou e fa‘amasino ‘iā i matou;” ‘ona tatalo ai lea o Samuelu i le ALI‘I. 7‘Ua fetalai mai le ALI‘I ‘iā Samuelu, “Usiusita‘i ia i le ‘upu a le nu‘u i mea uma latou te fai mai ai ‘iā te oe; auā e lē o oe ‘ua latou lafoa‘iina, a ‘ua latou lafoa‘iina o a‘u, ‘ia lē fai a‘u ma tupu ‘iā te i latou;#Eso 16.8; Fa‘ama 8.23; 1 Samu 12.12 8pei o mea uma ‘ua latou faia talu le aso na ‘ou ‘aveina a‘e ai i latou nai Aikupito, e o‘o i le aso nei, ‘ua latou tu‘ulafoa‘i mai ‘iā te a‘u, ‘ae ‘au‘auna i atua ‘ese, e fa‘apea fo‘i ‘ona latou faia nei ‘iā te oe. 9O lenei, usiusita‘i ia ‘iā latou ‘upu; tau lava ‘ina e matuā ta‘utino ‘iā te i latou, ma fa‘asino atu ‘iā te i latou le amioga a le tupu e pule ‘iā i latou.”#1 Samu 10.25
10‘Ona ta‘u atu lea e Samuelu o ‘upu uma a le ALI‘I i le nu‘u na fa‘atoga mai ‘iā te ia i se tupu; 11‘ua fai atu, “O lenei le amioga a le tupu o le a pule ‘iā te ‘outou; o ‘outou atali‘i e ‘avea i latou e ia e fai mōna i ona kariota, e fai fo‘i māna ‘au e ti‘eti‘e i solofanua; latou te taufetuli fo‘i i luma o ona kariota.#Teu 17.16; 1 Samu 10.25; 14.52; 2 Samu 15.1; 1 Tu 1.5 12E tofi fo‘i e ia ‘iā te i latou e pule i ‘au e ta‘ito‘aafe ma pule i ‘au e ta‘ito‘alimagafulu; ma ‘ia suatia lona fanua, ma selesele i lana seleselegāsaito; latou te gaosi fo‘i ana ‘au‘upega o le tau‘a, ma mea e teu ai ona kariota. 13O ‘outou afafine fo‘i, e ‘ave ai latou e ia e fai mea manogi, e fai umu ma fai areto. 14O ‘outou fanua fo‘i ma ‘outou tōvine, ma ‘outou tōolive e sili ‘ona lelei, e ‘ave e ia, ma foa‘i atu i ana ‘au‘auna.#1 Tu 21.7; Eseki 46.18 15O a ‘outou fua ma ‘outou tōvine, e ‘ave mea e sefulua‘i ma foa‘i atu i ana ‘au‘auna sili ma ana ‘au‘auna. 16O a ‘outou ‘au‘auna tane ma a ‘outou ‘au‘auna fafine, ma o ‘outou taulele‘a ‘aulelei,#8.16 ‘outou taulele‘a ‘aulelei: O nisi fa‘aliliuga; ‘outou povi. ‘atoa fo‘i ma ‘outou asini, e ‘ave e ia e fai a‘i lana galuega. 17E ‘ave mea e sefulua‘i a ‘outou mamoe; o ‘outou fo‘i, e fai ‘outou ma ana ‘au‘auna. 18E ‘alalaga ‘outou i lea aso ‘ona o lo ‘outou tupu na ‘outou filifilia mo ‘outou, ‘ae lē fa‘afofoga mai le ALI‘I ‘iā te ‘outou i lea aso.”#Fa‘ata 1.28; Isai 1.15; Amo 8.12; Mika 3.4; Luka 13.25
19‘Ae lē mafafai le nu‘u ‘ona fa‘alogo i le ‘upu a Samuelu, ‘ua latou fai mai, “E leai lava, ‘ae fai lava so matou tupu; 20‘ia pei o nu‘u uma i matou, ‘ia fa‘amasino mai lo matou tupu ‘iā te i matou; ‘ia alu atu fo‘i o ia i o matou luma, ma ‘ia tau i o matou tau‘a.”#1 Samu 8.5 21‘Ua fa‘alogo Samuelu i ‘upu uma a le nu‘u, ‘ona ta‘u atu ai lea e ia i fofoga o le ALI‘I. 22‘Ona fetalai mai ai lea o le ALI‘I ‘iā Samuelu, “Usiusita‘i ia ‘iā latou ‘upu ma ‘ia e tofia se tupu mo i latou.” ‘Ua fai atu Samuelu i tagata o Isaraelu, “‘Ia ta‘itasi ma alu i lona nu‘u.”#Nume 11.18
Currently Selected:
1 Samuelu 8: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
