1 Samuelu 11
11
‘Ua Lavea‘iina Iapese e Saulo
1‘Ua alu a‘e Naasa le sa Amonī, ‘ua tolauapi i Iapese-Kiliata. ‘Ona fai mai lea o tagata uma o Iapese ‘iā Naasa, “‘Inā fai ia sa tatou mavaega, ‘ona matou ‘au‘auna lea ‘iā te oe.”#Eso 23.32; Fa‘ama 21.8; 1 Samu 12.12; 31.11; 2 Samu 10.1-2; 1 Tu 20.34; Eseki 17.13
2‘Ua fai atu Naasa le sa Amonī ‘iā te i latou, “O le mea lenei e fai ai sa tatou mavaega; ‘ou te sali i o ‘outou mata taumatau uma, ‘ou te fa‘alumaina ai Isaraelu uma.”
3‘Ona fai mai lea o toeaina o Iapese ‘iā te ia. “Tu‘u mai ia ‘iā te i matou ni aso se fitu, se‘i matou tu‘u atu ni sāvali i nu‘u uma o Isaraelu; ‘āfai e leai sē fa‘aola mai ‘iā te i matou, ‘ona matou ō atu ai lea ‘iā te oe.”
4‘Ua o‘o atu le sāvali i Kipea le ‘a‘ai o Saulo, ‘ua ta‘u atu nei ‘upu i le nu‘u, ‘ona fētāgisi ai lea o le nu‘u uma, ‘ua leo tetele.#Fa‘ama 2.4; 21.2; 1 Samu 10.26 5Fa‘auta fo‘i, ‘ua sau Saulo nai le vao, o lo‘o mulimuli ia i povi; ‘ua fai ane Saulo, “Se a le mea ‘ua o‘o i le nu‘u ‘ua latou fētāgisi ai?” ‘Ona tala mai lea ‘iā te ia o le tala a tagata Iapese. 6‘Ona osofia lea o Saulo e le Agaga o le Atua, ‘ina ‘ua fa‘alogo o ia i lenei tala; ‘ona tupu tele ai lea o lona ita.#1 Samu 10.6, 10 7‘Ua ia ‘ave povi e lua ma vaevaea, ‘ua avatu ai i nu‘u uma o Isaraelu i lima o sāvali, o lo‘o fa‘apea, “O sē le mulimuli mai ‘iā Saulo ma Samuelu, e fa‘apea ‘ona faia i ana povi.”
‘Ua o‘o i le nu‘u le fefe i le ALI‘I; ‘ona latou ō atu ai lea pei se tagata e to‘atasi. 8‘Ua ia faitaulia i latou i Peseka, ‘ua tolu selau o afe o le fānauga a Isaraelu ia, ‘ae tolu sefulu o afe o tagata o Iuta ia.#Fa‘ama 1.5; 20.15-17; 2 Samu 24.9 9‘Ua latou fai atu i le sāvali na sau, “‘Ia fa‘apea ‘ona ‘outou fai atu i tagata o Iapese-Kiliata, ‘o a taeao pe a vevela le lā, e ‘iā te ‘outou le fa‘aolataga.’” ‘Ua alu le savali, ma ta‘u atu ai i tagata o Iapese, ‘ona latou fiafia ai lea. 10‘Ua fai atu tagata Iapese, “O a taeao matou te ō atu ai ‘iā te ‘outou, tou te faia ‘iā te i matou mea uma tou te loto i ai.”#1 Samu 11.3
11‘Ua o‘o i le taeao, ‘ona tofia lea o le nu‘u e Saulo i ‘au e tolu; ‘ona ō ane lea i totonu o le vā o ‘au i le leoleoga o le taeao, ‘ua fasi fo‘i ‘iā Amoni, ‘ua o‘o i le itū aso e vevela ai le la; o ē na sao ‘ua fa‘ata‘ape‘apeina i latou, ‘ua lē toe fa‘atasi se to‘alua o i latou.
12‘Ona fai mai lea o le nu‘u ‘iā Samuelu, “O ai ‘ea ‘ua fai ane, ‘Pe fai Saulo ma tupu ‘iā te i tatou?’ Tu‘u mai ia o ia tagata, matou te fasioti ‘iā te i latou.”#1 Samu 10.27; Luka 19.17
13‘Ua fai atu Saulo, “E le fasia se tagata i lenei aso; auā o le asō na faia ai e le ALI‘I le fa‘aolataga mo Isaraelu.” 14‘Ona fai atu lea o Samuelu i le nu‘u, “Ō mai ia, ‘inā tatou ō i Kilikala, tatou te toe fuata‘iina ai le mālō.” 15‘Ona ō lea o le nu‘u uma i Kilikala, ‘ua tofia ai Saulo e fai ma tupu i luma o le ALI‘I i Kilikala; ‘ua latou fai ai taulaga fa‘afetai i luma o le ALI‘I. ‘Ua fiafia tele Saulo ‘atoa ma tagata uma o Isaraelu i lea mea.#1 Samu 10.8; 13.4; 15.33
Currently Selected:
1 Samuelu 11: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
