1 Peteru 5
5
‘Ia Fagaina le Lafu Mamoe
1‘Ou te ‘ai‘oi atu i toeaina ‘iā te ‘outou, o a‘u fo‘i o le toeaina, ma le molimau i tigā o Keriso, ma le ‘ua tofusia fa‘atasi i le manuia o le a fa‘aalia mai. 2‘Ia ‘outou leoleo i le lafu mamoe a le Atua o ‘iā te ‘outou, ‘ia tausi i ai ma le loto, ‘ae lē o le fa‘atauānauina; ‘aua fo‘i ne‘i faia ma le fia fai ‘oloa, a o le loto fiafia.#Ioane 21.15-17; File 1.14; Tito 1.11; Galu 20.28; 1 Timo 3.2-7 3‘Aua fo‘i ne‘i fa‘apei o ē pule fa‘asauā i ē ‘ua tofia i ai ‘outou, a ‘ia fai ‘outou ma fa‘aa‘oa‘o i le lafu mamoe.#2 Kori 1.24; Tito 2.7; Fili 3.17; 1 Tesa 1.7 4Pe a fa‘aali mai fo‘i le Leoleo mamoe silisili, e maua e ‘outou le pale pupula e lē mamae lava.
5‘Ia fa‘apea o ‘outou o ē talavou, ‘ia usiusita‘i i toeaina; ma ‘ia ‘o‘ofu ‘outou uma i le loto maulalo o le tasi i le tasi; auā
“E tete‘e atu le Atua i ē fa‘amaualuluga,
‘ae foa‘iina mai le alofa tunoa i ē fa‘amaulalo.”#Fa‘ata 3.34; Efe 5.21; Mata 23.12; Ioane 13.4, 14; Iako 4.6
6O le mea lea ‘ia fa‘amaulalo ai ‘outou i lalo o le ‘a‘ao malosi o le Atua, ‘ina i‘a fa‘amaualugaina ‘outou e ia i ona pō e tatau ai.#Iopu 22.29; Iako 4.10 7‘Ia tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou.#Sala 55.22; Mata 6.25; Fili 4.6
8‘Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia.#1 Tesa 5.6; Luka 18.3; Iako 4.7 9‘Ia ‘outou tete‘e atu ‘iā te ia, ma ‘ia mausalī ‘outou i le fa‘atuatua, ‘ina ‘ua ‘outou iloa o lo‘o ‘o‘ono lo ‘outou ‘au uso o i le lalolagi i ia lava mea tigā. 10A o le Atua e ona le alofa tunoa uma lava, o lē na vala‘auina i tatou ‘ia i‘u atu i lona mamalu fa‘avavau o ‘iā Keriso, pe a tigāina ‘outou i nai aso, e fa‘a‘ato‘atoaina ‘outou e ia lava, ‘ia fa‘atumauina, ‘ia fa‘amalosia fo‘i ‘outou.#1 Pete 1.6; 1 Tesa 2.12 11‘Ia ‘iā te ia le mana e fa‘avavau fa‘avavau lava. Amene.
O le ‘Upu Mulimuli
12O Siluano, o lo‘u tāofi o le uso fa‘amaoni o ia, ‘ua ‘ou tusi atu ai nai ‘upu itiiti ‘iā te ‘outou, e apoapoa‘i atu ma ta‘utino atu ai, o le alofa tunoa moni lenei o le Atua ‘ua ‘outou tumau ai nei. 13O lo‘o alofa atu ‘iā te ‘outou le ekalesia i Papelonia na filifilia fa‘atasi ma ‘outou, ‘atoa ma lo‘u atali‘i o Mareko.#Galu 12.12, 25; 2 Timo 4.11; Kolo 4.10; File 24 14‘Ia fealofani ‘outou i le feasogi alofa.
‘Ia manuia ‘outou uma lava o ē o ‘iā Keriso.#1 Kori 16.20
Currently Selected:
1 Peteru 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.