1 Tupu 2
2
O Fautuaga Mulimuli a Tavita ‘iā Solomona
1‘Ua latalata ona po e oti ai Tavita; ‘ona fai ai lea o mavaega ma lona atali‘i o Solomona, ‘ua fa‘apea atu: 2“O le a ‘ou alu i le ala o le lalolagi uma; ‘ia e fa‘amalosi ma ‘ia e fa‘atamatane; 3‘ia e tausia fo‘i sauniga a le ALI‘I lou Atua, ‘ina ‘ia e savali i ona ala, ‘ia tausi i ana sauniga ma ana poloa‘iga ma ana fa‘amasinoga ma ana tulafono e pei ‘ona tusia i le tulafono a Mose, ‘ina ‘ia manuia oe i mea uma ‘e te faia ma mea uma ‘e te fa‘asagasaga i ai;#Teu 17.18-20; 29.9; 1 No 22.12, 13; 28.9 4‘ina ‘ia fa‘atumauina e le ALI‘I lana afioga na ia fetalai mai ai ‘iā te a‘u, ‘ua fa‘apea mai, ‘Pe ‘āfai e tausia e au fānau lo latou ala, ‘ia sāvavali i o‘u luma ma le fa‘amaoni ma o latou loto ‘atoa ma lo latou manatu ‘atoa, ‘ua fa‘apea mai o ia, ‘ona lē motu lea o lou gafa i le nofoāli‘i o Isaraelu.’#2 Samu 7.12, 16, 25; 1 Tu 3.6; 8.25; 9.4, 5; 11.11-13; Sala 132.12
5“‘Ua e iloa fo‘i le mea na faia e Ioapo le tama a Seruia ‘iā te a‘u, o le mea na ia faia ‘iā i lā‘ua o ē na pule i ‘au a Isaraelu o Apineru le atali‘i o Neru ma Amase le atali‘i o Ietero, na ia fasia, ‘ua ia fa‘amaligiina o la toto fa‘atagataotau‘a ‘ina o leai se tau‘a; ‘ua ia tu‘u fo‘i le toto o ē na fasi fa‘atagataotau‘a i lona fusi sa i lona sulugātiti ma ona se‘e sa i ona vae.#2 Samu 3.27; 20.10; 1 Tu 2.32 6‘Ia e faia fo‘i e tusa ma lou poto, ‘ae ‘aua ne‘i alu ifo lona ulusinā ma le filemū i le tu‘ugamau. 7A ‘ia e agalelei i atali‘i o Pasili o le Kiliata, ‘ia i ai latou fa‘atasi ma ē o ‘a‘ai i lau la‘o‘ai; auā na fa‘apei ‘ona latou ō mai ‘iā te a‘u, ‘ina o sola ‘ese a‘u ‘iā Apisaloma lou uso.#2 Samu 17.27-29; 19.31-38
8“Fa‘auta mai fo‘i, o lo‘o ‘iā te oe Semi le atali‘i o Kira o lo sa Peniaminā mai Pauri, o lē na fetu‘u ‘iā te a‘u i le fetu‘u leaga lava i le aso na ‘ou alu atu ai i Maanaima; a ‘ua alu ifo o ia e fa‘afetaia‘i ‘iā te a‘u i Ioritana, ‘ona ‘ou tautō lea ‘iā te ia i le ALI‘I, ‘ua fa‘apea atu, ‘‘Ou te lē fasioti ‘iā te oe i le pelu.’#2 Samu 16.5-13; 19.16-23 9O lenei, ‘aua ‘e te fa‘asaoina o ia; auā o oe o le tagata poto, ‘ua e iloa fo‘i le mea e tatau ‘ona e fai ‘iā te ia, a ‘ia e fa‘ao‘o lona ulusinā ma le toto i le tu‘ugamau.”
O le Oti o Tavita
10‘Ua ta‘oto fo‘i Tavita fa‘atasi ma ona tamā; ‘ona tanumia lea o ia i le ‘a‘ai a Tavita. 11O aso fo‘i na fai ai Tavita ma tupu o Isaraelu e fagafulu o tausaga ia; e fitu tausaga na fai ai o ia ma tupu i Heperona; o tausaga e tolu sefulu ma le tolu na fai ai o ia ma tupu i Ierusalema.#2 Samu 5.4-5; 1 No 3.4 12‘Ona ti‘eti‘e ai lea o Solomona i le nofoāli‘i o lona tamā o Tavita; ‘ua matuā fa‘atumauina fo‘i lona mālō.#1 No 29.23; 2 No 1.1
O le Oti o Atonia
13‘Ua alu atu Atonia le tama tane a Akita ‘iā Patesepa le tinā o Solomona; ‘ona fai mai lea o ia ‘iā te ia, “Po ‘ua e sau ‘ea ma le filemū?”
‘Ona tali atu lea o ia, “‘Ua filemū lava.” 14‘Ua fai atu fo‘i o ia, “O la‘u fe‘au ‘iā te oe”
‘Ona fai mai ai lea o ia, “‘Inā fai mai ia.”
15‘Ona fa‘apea atu lea o ia, “‘Ua e iloa sa ‘iā te a‘u le nofoa‘iga, na fa‘asagasaga mai fo‘i Isaraelu uma ‘iā te a‘u ‘ia fai a‘u ma tupu; a ‘ua liua le nofoa‘iga, ‘ua ‘avea ma lo‘u uso, auā ‘ua fai ai mōna mai le ALI‘I.#1 Tu 1.5, 25; 1 No 22.9-10; 28.5-7 16O lenei, ‘ou te fa‘atoga atu ‘iā te oe i le mea e tasi, ‘aua ne‘i ‘alo ou fofoga ‘iā te a‘u.”
‘Ona fai mai ai lea o ia ‘iā te ia, “‘Inā fai mai ia.”
17‘Ona fai atu lea o ia, “Se‘i e fai atu i le tupu o Solomona, (auā na te lē ‘alo ona fofoga ‘iā te oe,) na te ‘aumai ‘iā te a‘u o Apiseka o le Sunema e fai ma a‘u avā.”#1 Tu 1.3-4
18‘Ona fai mai lea o Patesepa, “‘Ua lelei, ‘ou te fai atu ai lava i le tupu ‘ona o oe.”
19‘Ona alu atu lea o Patesepa i le tupu o Solomona e tautala atu ‘iā te ia ‘ona o Atonia. ‘Ona tula‘i mai lea o le tupu e fa‘afetaia‘i ‘iā te ia, ma ‘ua ifo mai i ai; ‘ona ti‘eti‘e lea o ia i lona nofoāli‘i, ‘ua fai ane fo‘i o ia e ‘aumai se nofoa mo le tinā o le tupu; ‘ona ti‘eti‘e ai lea o ia i lona itū taumatau. 20‘Ona fai atu lea o ia ‘iā te ia, “‘Ou te fa‘atoga atu ‘iā te oe i le mea itiiti e tasi; ‘aua ne‘i ‘alo ou fofoga ‘iā te a‘u.”
‘Ona fai mai lea o le tupu ‘iā te ia, “Sena e, fai mai ia, auā ‘ou te lē ‘alo lava ‘iā te oe.”
21‘Ona fai atu lea o ia, “Se‘i avatua Apiseka le Sunema ‘iā Atonia lou uso e fai māna avā.”
22‘Ona tali mai lea o le tupu o Solomona, ‘ua fa‘apea mai i lona tinā, “Se a ‘ea le mea ‘e te fa‘atoga mai ai ‘iā Apiseka le Sunema e fai ma avā a Atonia? ‘Inā e fa‘atoga mai fo‘i i le nofoa‘iga e fai mōna, auā o ia o lo‘u uso e matua, ia ‘iā te ia, ‘atoa ma Aviata le ositaulaga ma Ioapo le tama a Seruia.”#1 Tu 1.6-7 23‘Ona tautō lea o le tupu o Solomona i le ALI‘I, ‘ua fa‘apea mai, “‘Ia fa‘apea lava ‘ona faia e le Atua ‘iā te a‘u, ma ‘ia fa‘aopoopo i ai, pe ‘āfai ‘ua lē fai mai e Atonia lenā ‘upu e fai ma mea e oti ai o ia. 24O lenei, o lo‘o soifua le ALI‘I o lē ‘ua fa‘atumauina a‘u, ma fa‘anofoina a‘u i le nofoāli‘i o lo‘u tamā o Tavita, o lē ‘ua faia fo‘i se ‘āiga mo‘u, e pei ‘ona ia fetalai mai ai, e fasiotia lava Atonia i le aso nei.”#Ruta 3.13; 2 Samu 7.11; 1 No 22.10
25‘Ona ‘auina atu lea e Solomona le tupu ‘iā Penaia le atali‘i o Ieoiata, ‘ua ia fasia o ia, ‘ua oti ai.
O le Tulia o Aviata ma le Oti o Ioapo
26‘Ua fai atu fo‘i le tupu ‘iā Aviata le ositaulaga, “‘Inā alu ia oe i Anatota i lou fanua; auā e tatau ‘ona e oti; a ‘ou te lē fasiotia oe i nei ona po; auā na e ‘ave le ‘atola‘au a le Ali‘i le ATUA i luma o lo‘u tamā o Tavita; auā fo‘i na e tigā i mea uma lava na tigāina ai lo‘u tamā.”#1 Samu 22.20-23; 2 Samu 15.24; Iosu 21.18; Sala 132.1 27‘Ona tulia lea o Aviata e Solomona, ‘aua ne‘i toe fai o ia ma ositaulaga a le ALI‘I; ‘ina ‘ia taunu‘u ai le afioga a le ALI‘I na ia fetalai mai ai i le ‘āiga o Eli i Sailo.#1 Samu 2.27-36; 1 Tu 2.35
28‘Ua logo atu fo‘i le tala ‘iā Ioapo; ‘ona sola ai lea o Ioapo i le fale fetāfa‘i o le ALI‘I, ma na tago atu i nifo o le fatafaitaulaga; auā e ui lava ‘ina le‘i liliu o Ioapo e mulimuli atu ‘iā Apisaloma na ia liliu ma mulimuli atu ‘iā Atonia. 29‘Ua ta‘ua fo‘i i le tupu o Solomona, “‘Ua sola Ioapo i le fale fetāfa‘i o le ALI‘I; fa‘auta fo‘i, o lo‘o i tafatafa o le fatafaitaulaga.” ‘Ona ‘auina atu lea e Solomona o Penaia le atali‘i o Ieoiata, ‘ua fa‘apea atu, “Alu ia oe, ‘inā fasi ‘iā te ia.” 30‘Ona alu atu lea o Penaia i le fale fetāfa‘i o le ALI‘I, ‘ua ia fai atu fo‘i ‘iā te ia, “O lo‘o fa‘apea ‘ona fetalai mai o le tupu, ‘‘Inā sau ia oe i fafo.’”
‘Ona tali mai lea o ia, “E leai, ‘ou te oti lava ‘i‘inei.”
‘Ona toe ta‘u atu lea e Penaia lenā ‘upu i le tupu, ‘ua fa‘apea atu, “‘Ua fa‘apea ‘ona tautala mai o Ioapo, ‘ua fa‘apea fo‘i ‘ona tali mai o ia ‘iā te a‘u.”#2 Tu 11.15
31‘Ona fai mai lea o le tupu ‘iā te ia, “‘Ia e faia e fa‘apei ‘ona fai mai ai o ia, ‘ia e fasi fo‘i ‘iā te ia, ma tanu ‘iā te ia; ‘ina ‘ia e ‘ave‘esea ‘iā te a‘u ma le ‘āiga o lo‘u tamā, le toto na fa‘amaligifuaina e Ioapo. 32E taui atu e le ALI‘I lona toto i lona lava ulu, ‘ina ‘ua fasia e ia o tagata e to‘alua sa sili ‘ona amiotonu ma amio lelei ‘iā te ia, na fasiotia i lā‘ua e ia i le pelu, na lē silafia fo‘i e lo‘u tamā o Tavita; o Apineru le atali‘i o Neru o lē na pule i ‘au a Isaraelu, ma Amase le atali‘i o Ietero, o lē na pule i ‘au a Iuta.#Fa‘ama 9.24; 2 Samu 3.27; 20.9-10; 1 Tu 2.5 33E tauia lava lo la toto i le ulu o Ioapo, ma ulu o ana fānau e fa‘avavau; a o Tavita ma lana fānau, ma lona ‘āiga ma lona nofoāli‘i e i ai le manuia mai le ALI‘I e fa‘avavau.”
34‘Ona alu a‘e lea o Penaia le atali‘i o Ieoiata ma fasi ‘iā te ia, ‘ua oti ai; ‘ua tanumia fo‘i o ia i lona fale i le vao. 35‘Ona tofia lea e le tupu o Penaia le atali‘i o Ieoiata e fai mōna sui e pule i ‘au; ‘ua tofia fo‘i e le tupu o Satoka le ositaulaga e sui a‘i Aviata.#1 Tu 2.27; 4.4; 1 No 29.22
O le Oti o Semi
36‘Ua ‘a‘auina atu fo‘i e le tupu nisi e ‘a‘ami ‘iā Semi; ‘ona fai atu lea o ia ‘iā te ia, “‘Ia e faia se fale mo oe i Ierusalema, ma e nofo ai, ‘aua lava ne‘i e alu ‘ese i se tasi mea; 37auā o le aso ‘e te alu ‘ese atu ai ma sopo‘ia atu le alia o Ketarono, ‘ia e matuā iloa, ‘e te oti ai lava; e i lou ulu lou lava toto.”#2 Samu 1.16; 15.23
38‘Ona fai mai lea o Semi i le tupu. “‘Ua mālie lau afioga; e pei ‘ona fetalai mai o lo‘u ali‘i le tupu, e fa‘apea ‘ona faia e lau ‘au‘auna.” ‘Ua nofo fo‘i Semi i Ierusalema ‘ua tele aso.
39A ‘ua o‘o ‘ina ‘atoa o tausaga e tolu, ‘ona sōsōla ai lea o ‘au‘auna e to‘alua a Semi ‘iā Akisa le atali‘i o Maaka, o le tupu o Kata. ‘Ua tala mai fo‘i nisi ‘iā Semi, ‘ua fa‘apea mai, “Fa‘auta, o lo‘o i Kata au ‘au‘auna.”#1 Samu 27.2 40‘Ona tula‘i atu lea o Semi, ma fa‘anofoa lana asini ma alu atu i Kata ‘iā Akisa e sā‘ili‘ili ai ana ‘au‘auna; ‘ua alu atu Semi ma ‘aumaia ana ‘au‘auna mai Kata. 41‘Ua ta‘uina mai fo‘i ‘iā Solomona, na alu Semi nai Ierusalema i Kata ma ‘ua toe fo‘i mai o ia. 42‘Ona fe‘au atu lea nisi e le tupu e ‘a‘ami ‘iā Semi, ma na fai atu ‘iā te ia, “Na ‘ou le fai atu ‘ea ‘iā te oe ‘e te tautō i le ALI‘I, ma a‘u ta‘utino atu ‘iā te oe, ‘ua fa‘apea atu, ‘O le aso ‘e te alu ‘ese atu ai ma e alu i se tasi mea, ‘ia e matuā iloa ‘e te oti ai lava?’ Na e fai mai fo‘i ‘iā te a‘u, ‘‘Ua mālie le ‘upu ‘ua ‘ou fa‘alogo atu ai.’ 43Se a ‘ea le mea na e lē tausi ai le tautoga i le ALI‘I, ma le poloa‘iga na ‘ou fai atu ai ‘iā te oe?” 44‘Ua fai atu fo‘i le tupu ‘iā Semi, “‘Ua e iloa le leaga uma ‘ua iloa ai lava i lou loto, na e fai i lo‘u tamā o Tavita. O lenei, e taui atu e le ALI‘I lou leaga i lou ulu;#1 Samu 25.39; 2 Samu 16.5-14; 19.23 45‘ae manuia le tupu o Solomona, e fa‘atumauina fo‘i le nofoāli‘i o Tavita i luma o le ALI‘I e fa‘avavau.”
46‘Ona fai atu lea o le tupu ‘iā Penaia le atali‘i o Ieoiata; ‘ona alu atu lea o ia i fafo, ma fasi ‘iā te ia, ‘ua oti ai o ia. ‘Ua fa‘atumauina lava le nofoa‘iga ‘iā Solomona.#1 Tu 2.12, 25, 34; 2 No 1.1
Currently Selected:
1 Tupu 2: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
