1 Ioane 3
3
O le Alofa tele o le Atua ‘ua Fai ai i Tatou ma ana Fānau
1Fa‘auta i le silisili o le alofa ‘ua foa‘iina mai e le Tamā ‘iā te i tatou, ‘ina ‘ua ta‘ua i tatou o fānau a le Atua; o le mea lea e lē iloa ai i tatou e le lalolagi, auā na te lē iloa o ia.#Ioane 1.12 2Le ‘au pele e, o fānau i tatou a le Atua i nei ona po, a o le‘i fa‘aalia mai nei le uiga o i tatou a amulī; a ‘ua tatou iloa, pe a fa‘aali mai o ia, ‘ona foliga ai lea o i latou ‘iā te ia, auā tatou te iloa tino ai lava o ia. 3O i latou uma fo‘i o i ai lenei fa‘amoemoe ‘iā te i latou, ‘ua ta‘itasi ma fa‘amamāina o ia e ia, fa‘apei ‘ona mamā o ia.
4O i latou uma lava o ē fai le agasala, ‘ua latou soli fo‘i i tulafono; o le agasala o le solitulafono lava lea. 5‘Ua ‘outou iloa fo‘i na fa‘aalia o ia ‘ina ‘ia ‘ave‘eseina e ia a tatou agasala;#3.5 tatou agasala: O nisi fa‘aliliuga; agasala. e lē o ‘iā te ia fo‘i se agasala.#Ioane 1.29 6E lē agasala se tasi o ē tumau ‘iā te ia; o sē agasala ‘ua lē va‘ai o ia ‘iā te ia, ‘ua lē iloa fo‘i o ia e ia.
7Le fānau e, ‘aua ne‘i fa‘asesē se tasi ‘iā te ‘outou; o lē fai le amiotonu, o le amiotonu lea, fa‘apei ‘ona amiotonu o ia. 8O lē fai le agasala, mai le tiapolo lava ia; auā ‘ua agasala le tiapolo talu le amataga, o le mea lava lea na fa‘aalia mai ai le Alo o le Atua, ‘ina ‘ia fa‘aumatia e ia galuega a le tiapolo.#3.8 tiapolo: po o satani.
9O i latou uma o ē ‘ua fānau mai i le Atua, latou te lē faia le agasala; auā o lo‘o tumau i totonu ‘iā te i latou lona uiga; e lē mafai fo‘i ‘ona agasala, auā ‘ua fānau mai i latou i le Atua. 10O le mea lea ‘ua iloa ai fānau a le Atua ma fānau a le tiapolo. O i latou uma o ē lē fai le amiotonu, e lē mai le Atua i latou, ‘atoa ma ē lē alolofa i o latou uso.
‘Ia ‘Outou Fealofani
11Auā o le poloa‘iga lenei ‘ua ‘outou fa‘alogologo i ai talu le amataga, ia tatou fealofani.#Ioane 13.34 12E lē pei o Kaino nā i lē o lo‘o leaga, na fasioti fo‘i i lona lava uso; se a fo‘i le mea na ia fasioti ai ‘iā te ia? ‘Ona o lana amio ‘inā leaga, a o le amio a lona uso ‘ua tonu.#Kene 4.8
13O‘u uso e, ‘aua tou te ofo pe ā ‘ino‘ino mai le lalolagi ‘iā te ‘outou. 14O i tatou, ‘ua tatou iloa ‘ua o‘o i tatou i le ola sa i le oti, auā o lo‘o alolofa i tatou i le au uso; o sē lē alofa i le uso, o lo‘o tumau ia i le oti.#Ioane 5.24 15O i latou uma o ē ‘ino‘ino i o latou uso, o fasioti tagata i latou; ‘ua ‘outou iloa fo‘i e leai sē fasioti tagata e tumau ‘iā te ia le ola e fa‘avavau. 16O le mea lava lenei ‘ua tatou iloa ai le alofa, ‘ina ‘ua tu‘uina atu e ia o lona lava soifua e sui a‘i i tatou; e tatau fo‘i ‘ona tatou tu‘uina atu lo tatou ola e sui a‘i le ‘au uso. 17O sē ‘ua i ai le ‘oa a le lalolagi nei, pe a iloa atu e ia lona uso ‘ua mativa, ‘ae punitia lona loto alofa ‘iā te ia, pe fa‘apefea ‘ona tumau o le alofa i le Atua i lea tagata? 18La‘u fānau e, ‘aua ne‘i tatou alolofa tau o le ‘upu ma le gutu, a o le amio ma le fa‘amaoni.
‘Ia ‘Outou Loto Tetele i luma o le Atua
19O le mea fo‘i lea ‘ua tatou iloa ai ‘ua i le ‘upu moni i tatou, e mautinoa fo‘i o tatou loto i ona luma. 20Auā pe ‘āfai e fa‘asala o tatou loto ‘iā i tatou, ‘ua sili lava le Atua i o tatou loto, ‘ua silafia fo‘i e ia mea uma. 21Le au pele e, ‘āfai e lē fa‘asala o tatou loto ia i tatou, e maua ai e i tatou le loto tele i luma o le Atua. 22O mea uma fo‘i tatou te ole atu ai, e maua mai ‘iā te ia, auā ‘ua tatou tausi i ana poloa‘iga tatou te faia fo‘i mea e lelei i ona luma. 23O lenei fo‘i lana poloa‘iga, ‘ia tatou fa‘atuatua i le suafa o lona Alo o Iesu Keriso, ma ‘ia tatou fealofani, fa‘apei ‘ona tu‘uiina mai e ia o le poloa‘iga ‘iā i tatou.#Ioane 13.34; 15.12, 17 24O lē tausi fo‘i i ana poloa‘iga, o lo‘o tumau lea i totonu ‘iā te ia, o ia fo‘i o i totonu ‘iā te ia; o le mea fo‘i lenei ‘ua tatou iloa ai o lo‘o tumau o ia i totonu ‘iā i tatou, auā o le Agaga ‘ua ia foa‘iina mai ‘iā te i tatou.
Currently Selected:
1 Ioane 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.