Sak. 9
9
Israera nemasri̱ asutniáwartin étserma
1-5 Kame Atraka nuṉkan tura Tamasku péprun kajerkar Uunt Yus chichakma ju̱i̱ti. Núnisaṉ Amatcha Tírusha nuyá̱ Setuncha ti neka áiniayataṉ nuja̱i̱ métek emesnakartatui. Tíruka wénuimi pujus kuitji̱a̱i̱ tura kuriji̱a̱i̱ ti kuítriniaiti. Túrasha Uunt Yus Tírunka takamtsuk ekemáktatui. Kame Askarúncha Káasasha tura Ikruncha ju̱na ashí iisar ashamkartatui. Túrunamtai Káasanmaṉka úunt akupniuka atsuttawai tura Askarún pépruka mashiaru juáktatui.
6Kame Astutnumka yajaya̱ nuṉkanmaya̱ aents matsamsartatui. Núnisnak Jiristíu aentsu waantu enentáimtumatairi̱ncha emestukartatjai. 7Kame namaṉ numpaja̱i̱ yuíniak núnaka ni wene̱ya̱ jusattajai. Tura mui̱jmiai̱ yurumkancha nai̱ri̱ya̱ jusattajai. Nisha juákartatna nu núnisaraṉ íi Yusri̱niu ártatui. Túrawaran Jutá aentsua úuntri̱n nútikiawartatjai. Tura Ikrunnumia̱sha Jípius aentsu núnikiartatui. 8Winia je̱a̱rui̱ ayamach pujusan jintia iin awajsamua núnisan aents jíinkiara̱i̱ṉ tura waya̱wara̱i̱ṉ tusan íistatjai. Túramtai Wi wáitkiakratniuka atakka Winia ainia nuna wayá̱ wáitkiachartatui. Warí, yamaikia Wikia niin péṉker wáinniuitjiai.
Úunt Akupin tátin étserma
9Seuna nawantri̱yá ti warastarum. Jerusaréṉka nawantri̱ya ti shiir warasrum untsumkatarum. Warí, atumí Úunt Akupniuri̱ péṉkernak túrin tura uwemtikrin peejcha asa umpuru uchirí̱n eketka winitrámprume. Mat. 21:4-5; Jṉ. 12:15 10Wikia Eprain nuṉkanmaya̱ mánitiai̱ kárun tura Jerusaréṉnumia̱ kawairi̱ncha emeskartatjai. Tura mesetnum mánitiai tíshimkiusha emesnak amukáttawai. Túramtai Niṉkia uunt nuṉka mátsatkamu ainia nuna aṉkant shiir matsamsatniun chichampruktatui. Tura nayantsar nayantsar nuyá̱ Yúpratis entsanmaya̱ naṉkama nuṉka náṉkata ímianai akupin átatui.
11Núnisaṉ Wi ámiji̱a̱i̱ chícham najanamua nú numpaja̱i̱ áminiu ainia nuna uwempraitjiai. Tura áminiu sepunam wá̱a̱nam entsa ku̱yu̱á eṉkeamu pujuiniancha aṉkant awajsartatjai. Jiin. 24:6-8; 1 Kur. 11:25 12Maa, sepunam pujá asarum aṉkant ajastin nákarmena nútiram atumín ayamprutmakminia nui̱ waketkitiarum. Nui̱ṉkia yaunchu matsamiarum núja̱i̱sha naṉkaamas péṉker matsastatjarme tusan yamái ujajrume. 13Warí, Jutanka winia tíshimkiurua núnisaṉ awajsájai. Túran Eprainnaka naṉkia núnisaṉ najanajai. Maa, Seuná uchirminkia kakarma puya̱ri̱ya núnin awajsan Kresia uchirí̱ji̱a̱i̱ mámtikiattajai. Uunt Yus jú̱nis tíniuiti.
14-17 Uunt Yus aents matsatainia nui̱ wantinkiattawai. Ni naṉkirí̱sha pema núnis jíitsumir átatui. Uunt Yus kachun umpuak nuṉkaani̱ uunt nasenam wétatui. Nuyá̱ ni ejamtairi̱nkia Ashí Akupin Uunt Yus átatui. Ni Yusri̱ Uunt Yus murikiu wáinin nútikias ni shuari̱n ayamprúktatui. Niṉkia Yusa nuṉke̱n pujusár péṉker iwiarmamka ímianis wínchar ajartatui tura imiá peṉker shíirmach ártatui. Tura tríkiuncha nuyá̱ wíniuncha tí nukap ni takaku asamtai ni uchirí̱sha tura nawantri̱sha shíirmach tsakakártatui.
Currently Selected:
Sak. 9: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
