Rum. 7

Akupkámuja̱i̱ aṉkantaitji

1Enentáimpratarum yatsuru. Jákaka akupkachminiaiti. Aya iwiaakna nu akupkámniaiti. Nu paant nékatsrumek. 2Wats, nuwa̱ nuatkamu ni aishri̱ iwiaakai̱ niji̱a̱i̱ tsaniṉ pujustiniaiti. Tura aishri̱ jakamtai aṉkant ajawai. 3Tuma asamtai aishri̱ iwiaakai̱ṉ chíkich áishmaṉja̱i̱ tsaníakka tsanirmawai. Tura ni aishri̱ jakamtai chíkich áishmaṉja̱i̱ páchitsuk nuatnakminiaiti tura nuikia tsanirmatsui.

4Núnisrumek atumsha yatsuru, Kristu aya̱shí̱ muchitmari̱ ajasu asarum akupkámu emetachmin jaka áintsarum ajasuitrume. Túrakrum Krístuja̱i̱ nuatnaikiatniua áintsarum aṉkantaitrume. Nisha jakamunmaya̱ nantakniuiti. Yamaikia Krístunu ajasu asar Niji̱a̱i̱ tsaniṉkiar Yus wakeramu péṉker túratniuitji. 5Yaunchu wakerutai umirniuyaj nui̱ akupkámu enentáimtusar nuna naṉkaamas yajauchia nu wakerimji tura jákatniunam juramkimji. 6Antsu yamaikia akupkámu emetachmin jaka asar aṉkant ajasuitji. Túrunar akupkámu yaunchu aarma nu iniaisar yamaikia Yusa Wakaní̱ji̱a̱i̱ tsaníakur yamaram iwiaakmaja̱i̱ péṉker wekasamniaitji.

Winia enentái̱rui̱ tunáa ana nu

7Núnisaitkiuiṉkia “Akupkámu yajauchiti” ¿titiajiash? Atsá. Warí, akupkámuka tunaan ti paant awajeawai. Akupkámu “Chikichna wakerukaip” Jiin. 20:17; Muis. 5:21 táchakuiṉkia wakerukcha̱a̱jai. 8Tura nu akupkámun enentáimtakui winia enentái̱rui̱ tunáa ana nu ashí yajauchin ti wakerumtikrimiayi. Kame akupkámu atsakui tunaan ti enentáimtichaintjiai. 9Yaunchu akupkámun nékachkun náṉkamsanak enentáimniuyajai. Tura akupkámun nekaan tunaan nekaamjai tura jaka áintsanak ajasjai. 10Tuma asamtai akupkámuja̱i̱ péṉker wekasatniuitiatan umirkatniun tujintiakui aya jákatniunam jurukní̱. 11Kame tunáa wakerutaiṉkia nu akupkámuja̱i̱ anaṉkrua péṉker iwiaaku pujustinian surutsuk nu akupkámuja̱i̱ jákatniunam jurukmiayi.

12Tuma asamtai akupkámuka Yusna asa tí peṉkeraiti. Yajauchichuiti. 13Nuikia ¿péṉkera nu jákatniunam júrawak? Atsá. Antsu tunáa wakeruktin jákatniunam jurukmiayi. Nuna tura asa tunáa imiá yajauchia nu nekaamniaiti. Tura tunáa wakerutai péṉker akupkámuja̱i̱ jákatniunam jurukmiatai, nuja̱i̱ Yus “tunáa wakerutai imiá yajauchiti” tusa paant awajsámiayi. 14Akupkámuka Yúsnaiti. Nu paant nékaji. Antsu wikia aya̱shnia nuna súmameakun tunaan umireajai. 15Kame túrajna nuna itiurchat enentáimtajai. Péṉker túratniun wakeraj nuna túratsjai. Antsu nakitiaj nuna nekaska túriniaitjiai. 16Akupkámu péṉkeran nekaan umirkatniun wakerajai. Túrayatnak umirchaitjiai. 17Tuma asamtai wíchaitjiai tunaan wakerakun túrajna nuka. Antsu winia enentái̱rui̱ tunáa wakerutai pujá asa nu túrumtikriniaiti. 18Yaunchu enentáimtai̱ winia enentái̱rui̱ pujana nu peṉké yajauchiti. Nuna ti paant nékajai. Tuma asamtai péṉker túratniun wakerayatnak peṉké tujintiajai. 19Péṉker túratniun wakerayatnak túratsjai. Antsu tunaan nakitiaj nuna túrajai. 20Nu asamtai nakitiaj nuna túrakun wíchaitjiai antsu winia enentái̱rui̱ tunáa wakerutai pujana nu túriniaiti.

21Jú̱nisaiti. Péṉker túratniun wakerakun aya tunaan íṉkiuajai. 22Nekas enentáiji̱a̱i̱ Yusa akupkámuri̱n wakerajai. 23Tumai̱ yaunchu enentáimtai̱ winia enentái̱rui̱ pujurtak nupettawai tura nekas wakeraj nuna akirturui.

24Maa, tí waitiajai. Jú̱ aya̱sh wakeramuja̱i̱ jákatniunmaya̱ ¿yaki uwemtikrurat? 25Yuska ii Uuntri̱ Jesukrístuja̱i̱ túrutmamniaitji. Tuma asamtai Yusan tí yumiṉkiajai. Ayu. Winia enentái̱rja̱i̱ Yus akupkámun umirniuitjiai. Antsu winia aya̱shruja̱i̱ tunaan umireajai.

Currently Selected:

Rum. 7: jiv

Highlight

Copy

Compare