Rum. 6

Krístuja̱i̱ jaka asar Níji̱a̱i̱sha iwiaakuitji

1Núnisaitkiuiṉkia Yus naṉkaamas waitnentrampratai tusar ¿tunáa túrattajik? 2Péṉkea. Warí, iikia tunáa túrashtin jákaitji. Jákaka ¿itiurak tunaan túramniait? 3Imianniutikia Krístuja̱i̱ tsaniṉkiu asar imianir Niji̱a̱i̱ métek jaka áintsar aji. 4Tura imianir Krístuja̱i̱ jaka áintsar métek iwiarnasuitji. Tura Yus ti kakaram asa Krístun jakaan iniantkímia núnisaṉ iincha nu kakarmaja̱i̱ yamaram enentáiji̱a̱i̱ péṉker wekasatniun iniantamkimiaji.

5Krístuja̱i̱ tsaniṉkiu asar Niji̱a̱i̱ métek jaka áintsaṉketji. Tura núnisaṉ Niji̱a̱i̱ métek nantaktiniaitji. 6Yaunchu enentáimtai̱ṉkia Krístuja̱i̱ métek jaka asamtai ii yajauch wakerutain emeṉkátrutmakuitji. Tuma asamtai yamaikia peṉké umirkashtiniaitji. 7Kame ¿jákaka itiurak tunaan túrat? Yamaikia aṉkant ajasuitji. 8Iisha nekas Krístuja̱i̱ jákaitkiurkia Niji̱a̱i̱ métek tuke iwiaaku pujustin enentáimji. 9Kame Krístuka chikichkí jaka nantakin asa atakka jákashtatui. Túmaitkiui atakka ajakrachminiaiti. 10Kristu chikichkí jaka asa ashí tunaaja̱i̱ itit awajsachmin ajasuíti. Tura yamaikia iwiaaku pujá asa Yusan shiir awajsatniun pujawai. 11Atumsha núnisrumek jaka áintsarum tunáa túrachmin enentáimtumastarum. Antsu ii Uuntri̱ Jesukrístuja̱i̱ tsaniṉkiu asarum iwiaaku pujakrum Yus shiir awajsatarum.

12Nu asamtai tunaaka aya̱shmíin akuptámkashtiniaitrume. Aya̱shí̱ wakeramuri̱ umirkashtiniaitrume. Aṉkantaitrume. 13Atumí aya̱shí̱ tunaan túrat tusarum tsaṉkatkairap. Antsu jakamunmaya̱ nantakin asarum Yus wakeramu túratin surumaktarum. Tura aya̱shmisha aya péṉkernak túrati tusarum Yus íktustarum. 14Akupkámu umirkatniuja̱i̱ iwiaaku pujatsrume. Antsu atumín Yus ti anenma asa yamaram iwiaakman suramsaitrume. Tuma asamtai yamaikia tunaaka nupettamkachminiaiti.

Umireajnia nuna takarniúri̱ntji

15Nuikia akupkámu umirtsuk antsu Yus ti anenma asakrin iwiaaku pujakur “¿Páchitsuk tunaan túramniaitjiai” títiatjik? Péṉkea. 16Tuke umireajnia nuna takarniúri̱ntji. Nuka nékatsrumek. Tura ni takarin ajasam umirkatniuitme. Tuma asamtai tunáa umirkurkia ni takarniúri̱ntji tura umirkar jakattaji. Tura Yus umirkurkia péṉker wekasattaji. 17Atumsha yáunchuka tunáa umirniuitiatrum ikiukrum yamaikia nekas chicham antukurmena nu nekas atumí enentái̱ji̱a̱i̱ umirkaitrume. Tuma asamtai Yus ti yumiṉsatniuiti. 18Yamaikia tunaanumia̱ aṉkant ajasu asarum tí peṉker wekasatniunam pachinkiaitrume. 19Paant nekaak tusan takarniun pachisan tájarme. Wats, yaunchu atumí aya̱shi̱ mui̱jmiainian tura ashí yajauchin túrat tusarum tsaṉkamakmarme. Núnisrumek yamaikia atumí aya̱shi̱ péṉkeran túrat tusarum tura tuke Yusja̱i̱ shiir wekasat tusarum tsaṉkamaktarum. 20Atumsha tunáa umirniuyarme nuikkia péṉker wekaichauyarme. 21Tura núja̱i̱sha ¿warí péṉkerna yaintmakmarum? Iistá, yamái natsanmainchakait. Nusha jákatniunam júawai. 22Antsu yamaikia tunaanumia̱ uwempra asarum Yus umirniuitrume. Antsu ju̱ka Yusja̱i̱ shiir wekasatniunam júawai tura nuyá̱ tuke iwiaaku pujustatrume. 23Tunáa takarkumka tuke jákatniun akirmáktatui. Antsu Yuska iikia takaatsrini̱ṉ peṉké ántar tuke iwiaaku pujustinian suramsattaji. Ii Uuntri̱ Jesukrístuja̱i̱ tsaniṉkia pujá asakrin nuna túrutmattaji.

Currently Selected:

Rum. 6: jiv

Highlight

Copy

Compare