Rum. 11

Ashí aents Yusa waitnenkartutariji̱a̱i̱ uwempramnia

1Tura Israer shuar Yusan uminiachkui ¿Yus nin ajapa iniaisashit? Péṉkea. Warí, wisha Israer shuarchakaitiaj. Wi Aprajámsha tura Piṉjiamín wea akiiniachukaitiaj. 2Yámankamtaikniumia̱ Yus Israer shuaran ni shuar ártí tusa achikiu asa yamaikia iniaisashtatui.

Ti yaunchu Yúsnan etserin Irías Israer shuaran pachis Yusan áujtak 3“Uuntru, Áminiun etserniuncha mash máwarai. Túruiniak taṉku awa̱sar Yus sútai̱ncha mash sá̱a̱kiarai. Tura wiki juakjai. Tura winiasha ‘mantuatai’ turutainiawai” 1 Akup. 19:10,14 tímiayi.

4Tura Yus aya̱k “Siati mir áishmaṉkan Israer shuarnumia̱ apujtumsaruitjiai. Nu shuar ántar yus Páaran tikishmátrachu áiniawai” 1 Akup. 19:18 timiai Yus.

5Núnisaṉ yamaisha Yus ti waitnentainia asa ashí Israer shuarnumia̱ ni shuari̱n achikiuiti. 6Yus ni enentái̱ji̱a̱i̱ṉ waitnentak túraiti. Nú shuar péṉker tura asamtai waitnentatsui. Yus aya péṉkernak waitnentakka ni waitneṉkratairi̱ áchainti.

7Ayu. Nuikia ashí Israer shuar péṉkeran e̱a̱karu ai̱ṉ aya Yus achikmia nú shuar wáinkiarmiayi. Antsu ni achikchamuka nuna naṉkaamas nekaachmin ajasár kusurua núnin awajnásarmiayi. 8Yus Chichamsha núnisaṉ tawai

“Yus enentáimchatai enentáin súsarmiayi.

Wáinmashtai ji̱ncha tura ántushtai kuíshniasha súsarmiayi.

Yamaisha núniskete.” Isa. 29:10

9Tawitcha yaunchu aak tímiayi

“Tuke tunáa túrin ásar namperan najanainiaksha achintkiar ti asutniáwarti.

10 Ni enentái̱n kusurarti tura wainmakcharti.

Itiurchat ana nusha kijin júkitniua áintsaṉ tuke áentskata.” YKan. 69:22-23

11Wátsek, Israer shuar kayá tukumkar ¿tuke iniaararuk ainia? Atsá. Antsu Israer shuar umirkachmaja̱i̱ Israer shuarcha yamaikia uwempratin jeainiawai. Túramu asa Israer shuarsha nuja̱i̱ métek uwempratniun wakerukartatui. 12Israer shuar umirkachmaja̱i̱ ashí shuar, Israercha ainia nusha, uwempramnia ajasármiayi. Nuna naṉkaamas Israer shuar atak Yusan enentáimtuiniak uwemprarmatai nuja̱i̱ ashí shuar tí peṉker ajasártatui.

13Israer shuarchatirmincha atumín uwempratin chichaman etserkatniun Yus akuptúku asamtai nu takatan ti takaajai. 14Nuna túrakun átum uwemprarmena núnisaṉ nisha, wí shuar ainia nu, nuna iisar uwemprarat tusan wakerajai. 15Kame Israer shuaran iniaisámuja̱i̱ ashí shuar Yusja̱i̱ shiir nawamnaikiarmataiṉkia nuikia atak nin achikmája̱i̱ jakamunmaya̱ nantaktinia áintsaṉ ti shiir átatui. 16Emka apatuk ana nu Yus súakur yumiṉsamuitkiuṉka nuikia ashí apatkunam Yus yumiṉsamuiti. Núnisaṉ numí kaṉkapé̱ péṉkeraitkiuṉka numi takamtsuk péṉkeraiti.

17Yuska chíkich chíkich Israer shuaran, numí kanawe̱n tsupik ajapniua áinis iniaisámiayi. Tura nuyá̱ atumín niisháa numinmaya̱ árumni̱ṉ nu numiniam anujtamkamarme. Nuja̱i̱ péṉker numiji̱a̱i̱ tsaniṉkrum nu kakarmaja̱i̱ iwiaakrume. 18Tura kanawe̱ tsupikmaja̱i̱ naṉkamantu enentáimtumasaip. Warí, ame kakarmarmiji̱a̱i̱ numi wajatsui antsu ni kakarmari̱ji̱a̱i̱ iwiaakme.

19“Túrasha wi anujnaktinian kanawe̱n tsupikchamka” tíchaintmeash. 20Nekasaiti, túmaitiat nisha Yusan enentáimtuiniachu ásar tsupinkiarmiayi. Amesha aya Yus nekas enentáimta asam anujnakuitme. Tuma asamtai naṉkamantu enentáimtumatsuk aya anearta. 21Yus nekas kanawe̱ péṉkercha túrawarun tsupikkia páchitsuk amincha tsupirmakchamniakait. 22Iistá, Yus atumji̱a̱i̱ ti tsáṉkaiti tura Israer shuar umichua nuna ti wari asutiáiti. Tura péṉker wáinmamkata. Yus tuke nekas enentáimtachkurminkia atumniasha páchitsuk tsupirmaktatrume. 23Núnisaṉ Israer shuar ataksha Yusan enentáimtuiniakui páchitsuk ataksha anujkachminkiait. Nekas túrattawai. 24Túram Israer shuarcha asam niisháa numinmaya̱ tsupikiar peṉké numiniam anujnakuitrume. Nuna tura asa nekas ni kanawe̱ tsupikia ajapamun páchitsuk atak anujkamniaiti.

Israer shuarsha uwempratin áiniawai

25Yatsuru, naṉkamantu enentáimtumara̱i̱rum tusan yaunchu nekaachman ujajrume. Ju̱i̱ti, Israer shuarnumia̱ṉka Yusan nekas enentáimtustinian nakimiainia írunui. Túrasha ashí Israer shuarcha Yus shuar ajastin ainia nu umikiarmatai 26nuyá̱ Israer shuarsha ashí uwemprartatui. Tuma asamtai Yus Papí tawai

“Seúnnumia̱ Uwemtikkiartin tátatui.

Israernumia̱ tunaan asakátrattawai. Isa. 59:20

27 Jú̱ Chichamnasha niji̱a̱i̱ najanattajai,

ni tunaari̱n asakturtatjai.” Isa. 27:9

28Uwempratin chicham atumsha nekaatarum tusa Israer shuaran Yus ni nemasri̱ awajsaruiti. Tura yaunchu ni we̱a̱trí̱n achikiu asa nincha tuke anenawai. 29Kame Yus amáa nuna ataksha ata̱a̱tsui. Shuaran achiksha atak iniaiyatsui. 30Átumka yaunchu Yus umirchauyarme. Tura yamaikia Israer shuar umirainiachkui Yus atumín waitnentramarme. 31Núnisaṉ ni yamaikia Yusan umirainiatsui. Tura atumín waitnentrampramarum núnisaṉ nincha waitnentrattawai. 32Nuja̱i̱ ashí métek Yus sumamtikiak métek waitnentrar uwemtikrattawai.

33Maa, Yus imiá shiirchakait. Tí nekachukait. Ni túramu peṉké nekaachminiaitji. 34“Uunt Yus enentáimmian ¿yaki neka? Tura ¿ya Nin unuiniaruit. Isa. 40:13 35Yaki Nin péṉkeran susa shiira nuja̱i̱ yapajniuit?” Juup 41:11 Tu áarmaiti. 36Ashí najanamu ainia nu Yus najanamu áiniak Niniu áiniawai. Tura Nin shiir awajsatin najanawarma áiniawai. Yus tuke iniaitsuk shiir awajnásti. Núnisaṉ atí.

Currently Selected:

Rum. 11: jiv

Highlight

Copy

Compare