Neka. 22
22
1Kuítji̱a̱i̱sha naṉkaamas nekaska nuamtak shiir enentáimtunaistinkia imiá péṉkeraiti.
Nuka shuar kúrin tura kuítian tí nukap takakua áintsaiti.
2Kuítrinniusha tura kuítrinchasha mái̱ metekete
warí nunasha Uunt Yusak najankamu áiniawai.
3Shuar péṉker enentáimkiaka warí itiurchatan nekáa íkian ajawiti
tura péṉker enentáimkiachuka nui̱ wayá̱ yajauch awajmamas wáitniuiti.
4Uunt Yusan ashamak péejchach ajasáinia nuka
kuítriniatniunmasha núnisaṉ shiir awajnas iwiaaku pujustinnium akinkiáttawai.
5Yajauch shuara enentáimtairi̱ṉkia jintia jáṉkinmaṉ tura ajatkampramu írunmanumaani̱ wétinia núnisaiti.
Antsu enentáimias wekainniua nuka nuya̱ṉka árantak ajawiti.
6Uchi péṉkera nu jintintiakum chicharkam tsakatmarta.
Nu túramuitkiuṉka uunt ajassha núnaka kajinmátkishtatui.
7Kuítrinniuka kuítrincha uuntri̱ ajawiti
tura kuítian íkiamna nuka kuítrinniun takarniúri̱ ajawai.
8Aya yajauchiniak pujurniuka wáitsatniun wainkiattawai.
Tuma asamtai nu shuar kajenaitkiuisha Uunt Yus asutiáttawai.
9Shuar waitneakua nuka shiir awajsamu átiniaiti,
tsukái wáitian yurumkan ajamin asa.
10Shuar wishikkiartinkia ji̱i̱ki̱ awemata.
Nu túramka katsumnaikiatniusha núnisaṉ emesmaktincha atsuttawai túram nuya̱ṉka aṉkant pujustatme.
11Péṉker enentáimniunka úunt akupniusha anenaiti.
Tura péṉker chichamtinniaka ni chichame̱ imiá shiir asamtai ni amikri̱ awajsattawai.
12Uunt Yus ti neka asa ashí nékaiti
tuma asa yajauch shuara túratniuri̱n pachimpriniaiti.
13Shuar nakia nuka “Jintiá weai̱ úunt ya̱wa̱ wekáa yuruattawai” tíniuiti.
14Tsanirmatai nuwa̱ chichame̱ṉka wa̱a̱ áseṉka init taurma núniniaiti
tuma asamtai Yus yajauchiniam yumiṉkramuka nu wa̱a̱nam akaikí̱ iniattawai.
15Uchí wáurtairi̱ṉkia enentáinmaya̱iti.
Kame numiji̱a̱i̱ asutiár netse enentáimtairi̱ṉkia emeṉkátkamniaiti.
16Kuítrintin ikiauntumkataj tusa kuítrinchan anaṉka atanteana nuka
nuíchusha kuítrinniun sua nusha nekas kuítrincha ajastatui.
Neka nu jintinkratma 30 áiniawai
(22:17; 24:22)
17Ti neka ainia nuna chichame̱ esettsam péṉker anturkata
tura nékakun tájamna nuja̱i̱ métek enentáimsam túrata.
18Nu túrakmeka kajinmáttsuk enentáimtakum shiir átatme
tura chichaakmesha anturú ajat chichattame.
19Uunt Yus nekas enentáimtusta tusan
yamái amincha nékamtikjiame.
20Chichareakun tura jintintiakun
nekas péṉker chichaman traintia ¿áatrachmakjam?
21Nuja̱i̱ nekas chichama nu nekaam
chíkich ámin ininmainiakuisha nekasana nu ujakmíniam tusan túraitjiame.
-1-
22Shuar kuítrincha nu túkeneasam kasarkaip kuítrincha asamtai
ántsaṉ ayamprumakchamnia nusha úunt akupniunam jukim wáitkiasaip.
23Warí kuítrinchan tura ayamprumakchamnian ayamprak
Uunt Yus kasamniun tura waitnenkartichua nuna iwiaakmari̱n amutkattawai.
-2-
24Shuar suir nekapniuja̱i̱ tsaniṉkiaip
tura núnismek shuar kajen ainia núja̱i̱sha nawamnaikiap.
25Ni túruiniakui iisam wisha áinkiataj tiip,
túrakmeka jurumakin kuntujnum chapikji̱a̱i̱ jiṉkiamua núniktatme.
-3-
26Shuar ántar “jú̱naka wi nekas umiktatjai” tiniu ainia nu aip,
nu arantcha tumashrumin wi akikmatkattajme tiip.
27Táyatam takakchamsha ¿wariji̱a̱i̱ṉ akikmaktam?
akikmaktin tujintkiakmiṉkia warí ame kanutairmin ¿atantramkichartatuak?
-4-
28Ame we̱a̱trum nuṉkan nakak
yaunchu ikiurtámainiak shuken akunáwarmia nuyá̱ ékekam awajáwaip.
-5-
29Shuar takatrí̱n péṉker enentáimtur takakmawa nu ¿wáiniukaitiam?
Nu shuarka úunt akupniui̱ pujustatui
kame shuar imiancha ainia nui̱ṉkia pujuschamniaiti.
©2009 Avant Ministries in cooperation with Wycliffe Bible Translators, Inc. All rights reserved.