Mat. 4

Iwianchi uuntri̱ Jesusan anaṉkataj timia

(Mar. 1:12-13; Ruk. 4:1-13)

1Nu túrunamtai Yusa Wakaní̱ Jesusan iwianchji̱a̱i̱ nekapmamtiksattsa aents atsamunam jukimiayi. 2Nui̱ kuaraintia tsawant káshisha tsawai̱sha yurumtsuk pujak tsukarmiayi. 3Nui̱ iwianchi uuntri̱ Jesusan nekapsataj tusa tarí chichaak “Nekas Yusa Uchirí̱nkiumka ju̱ kaya apatuk najanata” tímiayi.

4Tutai Jesus chicharuk “Yus Papinium áarmaiti ‘Aents aya apatkuja̱i̱ṉ iwiaaku pujuschamniaiti. Antsu Yus táman enentáimtuiniak nekas iwiaaku pujusártatui’ tawai” tímiayi.Muis. 8:3

5Tutai iwianchi uuntri̱ Jerusaréṉnum jukí̱ Yusa Uunt Je̱e̱ taṉkiri̱ pakarí̱n iwiak 6“Nekas Yusa Uchirí̱nkiumka ju̱yá̱ akaikim iniaata. Kame Yus Papinium áarmaiti ‘Yus ni suntari̱n akatar akuptúrmakmatai kayanam ajiintsumni̱ṉ weṉkurmaktatui’ tawai” tímiayi.YKan. 91:11-12 7Tutai Jesus chicharuk “Núnisaṉ Yus Papinium áarmaiti ‘Ame úuntrum Yus “nekapsataj” tiip’ tawai” tímiayi.Muis. 6:16

8Ataksha iwianchi uuntri̱ naint yakí̱ wájakmanum iwiakmiayi tura nuyá̱ ashí nuṉkanmaya̱ péprun shiira nuna iniaktusmiayi. 9Tura chicharuk “Winia tikishmátrurakminkia ju̱na mash amastatjai.” 10Tutai Jesus chichaak “Werumta iwianchi uuntri̱yá. Yus Papinium aarma awai ‘Ame Úuntrum Yusak tikishmátrata tura Niṉki shiir awajsata’ tawai” tímiayi.Muis. 6:13

11Tutai iwianchi uuntri̱ Jesusan ikiuak wémiayi. Túramtai Yusa suntari̱ tariar atsumamuri̱n súsarmiayi.

Jesus Kariréanam etserkamu

(Mar. 1:14-15; Ruk. 4:14-15)

12Juaṉ sepunam eṉketui táman antuk Jesus Kariréanam wémiayi. 13Tura Nasarétnum pujutsuk Kapernáumnum we pujusmiayi. Kapernáumsha Kariréa antumiaṉka kaanmatkari̱n pujumiayi. Tí yaunchusha Jakupu uchirí̱ Sapurúncha tura Neptarísha nu nuṉkanak nui̱ pujustaitsar achikiáruyayi. 14Jesus nuna túramtai yaunchu Yúsnan etserin Isayas aarmia nu uminkiamiayi. Ju̱na áarmiayi

15 “Sapurúncha Neptarísha nayantsanam tíjiu̱ch Jurtan amaini̱ni nuṉkan achikiármiayi.

Nuka Kariréaiti Israer shuarcha matsatainia nui̱.

16 Nu aents kiritniunam pujuiniayataṉ ti tsáapninian wáinkiarmiayi.

Jákatniunam pujuiniai̱ tsáapin tsáapnirmiayi.” Isa. 9:1-2

17Nuyá̱ Jesus étseruk “Yajauch túrutairam nekas enentáiji̱a̱i̱ enentáimsarum iniaisarum iwiarnartarum. Nayaimpinmaya̱ akuptai̱ tsawant jeatémayi” tímiayi.

Jesus namakan achinian unuiniamuri̱ awajsamu

(Mar. 1:16-20; Ruk. 5:1-11)

18Jesus Kariréa antumiaṉka kaanmatkari̱n wesa jimiará aentsun nuamtak yáchinniun wainkiamiayi. Chikichik Antresauyayi, chikitcha Semuṉnauyayi. Nu Semuṉ núnisaṉ Pítiur náartiniuyayi. Namakan achin ásar namakan nekaja̱i̱ naṉkíak yujarmiayi. 19Nuna Jesus wáinkiar chicharainiak “Nemartustarum. Nemartakrumin yamái namak achia̱rmena nútiksanak shuar Yusna ártí tusan achin awajsatjarme.” 20Tutai ni nekari̱n ikiukiar Nin nemariarmiayi.

21Nuyá̱ ishichik wésaṉ ataksha nuamtak yachinniun wainkiamiayi. Jakupu Juaṉja̱i̱ mai̱ Sepetéu uchirí̱ ármiayi. Nisha kanunam eṉkemsar ni nekari̱n ni aparí̱ji̱a̱i̱ iwiarainiak pujuriarmiayi. Tura Jesus “Nemartusta” tutai 22nu chichamaik kanuncha tura aparí̱ncha ikiukiar Jesusan nemariarmiayi.

Jesus untsurí shuaran jintinma

(Ruk. 6:17-19)

23Ashí Kariréanam Jesus Israer shuar iruntai̱niam etserki̱ wémiayi. Yus ju̱ nuṉkanam akupkatin chichaman etserkamiayi. Tura untsurí suṉkurja̱i̱ jáinian ashí tsuármiayi. 24Ashí Siria nuṉkanam Jesus tsuákratman nekaawar ashí náṉkamas suṉkurja̱i̱ wáitin armia nuna Jesusan tsuarti tusa itiariármiayi. Ashí jáiniancha, najaimiancha, iwianchrukuncha, wáuruncha, emearuncha Jesus tsuármiayi. 25Tura untsurí shuar Jesusan nemariarmiayi. Kariréanmaya̱sha, Tekapurisnumia̱sha, Jerusaréṉnumia̱sha, Jutanmaya̱sha, Jurtan amaini̱ya̱sha Jesusan nemariarmiayi.

Currently Selected:

Mat. 4: jiv

Highlight

Copy

Compare