Mat. 14

Imiakratin Juaṉ jakamu

(Mar. 6:14-29; Ruk. 9:7-9)

1Kariréanam Irutis akupniuyayi. Tura Jesus túramuncha antukmiayi. 2Tura ni írutramuri̱n chichaak “Nuka imiakratin Juaṉ jakamunmaya̱ nantaki̱ túrawai. Tuma asa aents tujintiamun túraiti” tímiayi. Kame Irutis Juáṉkan maa asa tímiayi.

3-4Akupin Irutis ni yachí̱ Jirip nuwe̱n Jirutíasan akintrukmatai Juaṉ Irutisan chichaak “Ame yatsumi nuwé̱ akintrukchatniuitme” tímiayi. Tutai Irutis Juáṉkan achik jiruja̱i̱ jiṉkiá sepunam eṉkeatarum tusa akupkámiayi. 5Nisha Juáṉkan mátaj tukamá aentsun ashamiarmiayi. Ashí aents “Juaṉ Yúsnan etserniuiti” enentáimtuiniakui ashammiayi. 6Tura akupin Irutis akiiniamu tsawantri̱ jeamtai nú nampertin Jirutíasa nawantri̱ ashí ipiaamu pujuiniamunam jantsemámiayi. Túramtai Irutis shiir enentáimtak 7“Ame ashí wakeram nu seattiá. Nekasan amastatjai, Yussha iirui” tímiayi. 8Tutai nu nuwa̱ch emka ni nukurí̱ akatrámu asa Irutisan chicharuk “Imiakratin Juaṉka muuké̱ tsupikiam amamkunam eṉkeram surusta” tímiayi. 9Tutai Irutis wake mesekmiayi. Túrasha “nekas Yus iirui” tiniu asa tura ni amikrí̱sha antukaru asamtai umikmiayi. 10Ni suntari̱n sepunmaya̱n Juaṉka muuke̱n tsupik itiarti tusa akupkámiayi. 11Tura amamkunam itiar nuwa̱chin súsarmiayi. Tura nisha ni nukurí̱n susamiayi.

12Nuyá̱ Juaṉka írutramuri̱ tariar aya̱shí̱ jukiar iwiarsarmiayi. Túrawar Jesusan ujaktaj tusar wéarmiayi.

Jesus seṉku mir áishmaṉnasha tura nuwa̱ncha uchincha ayurkamu

(Mar. 6:30-44; Ruk. 9:10-17; Jṉ. 6:1-14)

13Jesus nuna antuk Niṉki kanunam eṉkemár arant aents atsamunam wémiayi. Túrasha nuna aents nekaawar Jesusan kúkarak weriarmiayi. 14Kanunmaya̱ jíiniaj tukamá untsurí aentsun wainkiamiayi. Tura wainiak waitnentrarmiayi. Tura jáiniancha tsuararmiayi. 15Kí̱akui̱ ni unuiniamuri̱ Nin tariar chichainiak “Uuntá kí̱awai. Tura shuar tíjiu̱ch pujaaka atsawai. Ju̱ aents akupkarta. Péprunam wéar sumak yurumáwarti” tiármiayi. 16Tutai Jesus chichaak “¿Urukamtaik wéarat? Antsu atumek ayuratarum” tímiayi. 17Tutai “Iikia takaktsuji. Antsu seṉku páṉchik nuyá̱ jimiará namakchik takakji” tiármiayi. 18Tuíniakui Jesus “Wats, nu itiartitiarum” tímiayi. 19Tinia aents chírichriniam pujusárti tusa akupkámiayi. Nuyá̱ seṉku páṉchin tura jimiará namakchin achik nayaimpiniam íimias Yusan yumiṉsamiayi. Tura puur ni unuiniamuri̱n aents ayuratarum tusa súsarmiayi. 20Ashí yurumáwar ejemararmiayi. Tura nuya̱sha puunaruka tuse chaṉkin tiármiayi. 21Nui̱ yurumáwarmia nuka nuwa̱sha uchisha nekapmatsuk aya áishmaṉkak seṉku mir ármiayi.

Jesus entsá pátatek wekasamu

(Mar. 6:45-52; Jṉ. 6:16-21)

22Nuyá̱ Jesus ni unuiniamuri̱n kanunam eṉkemprarum amain émaa ajatarum tusa akupkarmiayi. Nisha aentsun akupkarmiayi. 23Akupkársha naint waka Yusan áujumiayi. Káshisha nui̱ Niṉki tuke pujumiayi. 24Tura antumiaṉ tí waṉkaram asamtai kanu ajapén ajasmatai nase tukumam entsa tamparukmiayi. 25Tsawa̱a̱na ai̱ tuke wenai̱ Jesus entsá pátatek wekaikí̱ pujuiniamunam jeamiayi. 26Tura ni unuiniamuri̱ entsá pátatek wekaan wáinkiar ti sapijmiakarmiayi. Tura ashamainiak “wakanchashit” tiármiayi. 27Tuíniakui Jesus chicharuk “Kakaram ajastarum. Witjiai. Ashamprukairap.” 28Takui̱ Pítiur chicharuk “Uuntá, nekas Ámetkumka Ame wajamna nui̱ entsá pátatek wekaiki̱n jeataj untsurkata.” 29Takui̱ Jesus chichaak “Winitiá” tutai Pítiur kanunmaya̱ akaikí̱ Jesus wajana nui̱ jeataj tusa entsá pátatek wekaikí̱ wémiayi. 30Tura tí nasentun nekáa ashamkamiayi. Ashama asa entsá wá̱i̱miayi. Túmak “Uuntá, achirkata” tusa untsumkamai. 31Nu chichamtaik Jesus uwejnum achik júak “Maa, ¿urukamtai Yus imiá ishichkichiksha enentáimtusumea?” tímiayi. 32Tura kanunam eṉkemáwarmatai nasesha meṉkakamiayi. 33Túramtai kanunam eṉkemármia nusha Jesusan tikishmátrar chicharuk “Nekas Ámeka Yusa Uchirí̱nme” tiármiayi.

Jesus Jinisarítniumia̱ shuaran tsuarma

(Mar. 6:53-56)

34Tura amaini̱ katia̱rar Jinisarítnium jearmiayi. 35Tura nuyá̱ aents Jesusan nekaawar nu nuṉkanam ashí ujanairarmiayi. Túrawar jáiniancha ni pujamunam itiariármiayi. 36Ni pushiri̱nkisha antiṉtai tusar seawarmiayi. Tura antiṉkiaruka péṉker ajasármiayi.

Currently Selected:

Mat. 14: jiv

Highlight

Copy

Compare