Jus. 24
24
Jusuí jasattuk ajas Israeran chicharma
1Jusuí Israer shuaran Sekimnum ashí irurmiayi. Tura Israera uuntri̱ armia nunasha ni úuntri̱ncha sumamtikniuncha tura suntara úuntri̱ncha ashí ujarmiayi. Tura Yusai̱ naka wajasármiayi. 2Tura nui̱ Jusuí ashí aentsun irur chicharuk “Kame Israer shuara Uunt Yusri̱ jú̱nis tawai ‘Tarái uchirí̱ Aprajám tura Nakur atumí apachrí̱nkia amaini̱ matsamin ármiayi tura najankamu yus ainia nuna umirin ármiayi. 3Tumá matsamin áinian atumí apachrí̱n Aprajáman amaini̱ pujan itiamiajai túran Kanaan nuṉkanam itian apujsamiajai tura Aprajámnaka Isakan susamiajai túram pampaṉmiayi. 4Tura núnisnak Isaknasha Jakupja̱i̱ Esaun súsarmiajai. Núnisnak Esaunka Sair nuṉkan naintiar náintran nui̱ pujusat tusan susamiajai tura Jakupka uchirí̱ji̱a̱i̱ Ejiptunam pujusármiayi. 5Nuya̱ṉka Muisaisan Araunja̱i̱ akupkarmiajai. Túran Ejiptunmaya̱n wi túramaj nuja̱i̱ métek asutiáwarmiajai nuya̱ṉka jí̱i̱rmiajrume. 6Atumí apachrí̱n Ejiptunmaya̱ ji̱i̱rarmiajai tura átumka nayantsanam támiarme. Tura Ejiptunmaya̱ aents atumí apachrí̱n káruja̱i̱ tura kawainium eketra armia núurtiuk pataatuk Kapantin Nayantsa ímianai ejewarmiayi. 7Túram Israer shuarka Uunt Yusan yaintkratkata tusa untsukarmiayi. Tura iini̱ṉkia kirit awajsámiayi. Túrunamtai Ejiptu aentsnaka nayants tukumar init emeṉkárarmiayi. Kame atumí jí̱ji̱a̱i̱ṉ Ejiptunam túrunamia nu wainkiamiarme. Nuyá̱ átumka untsurí uwí kampuntin atsunum pujumiarme. 8Amur aentsu nuṉke̱n Jurtan amain matsatainiamunam ikiankarmiajai. Niṉkia atumji̱a̱i̱ mánikiarmiayi. Tura wi nupetmakuk tusan tsaṉkatkam núnisaṉ ayampram ni nuṉke̱sha ataṉmiarme. 9Nuyá̱ Sépura uchirí̱ Parak Muapa úunt akupniuri̱ mesetan najana Israer shuarja̱i̱ mánikmiayi. Tura nuya̱ṉka Piura uchirí̱ Paraam Israer shuaran yajauchiji̱a̱i̱ yumiṉkrat untsukrum utitiarum tusa akuptúkarmiayi. 10Túrasha wikia Paraam táman antuktinian nakitrurmiajai antsu tumá shiir pujutnum yumiṉkramiayi. Nuya̱ṉka niiya̱ wi aṉkant awajsámiajrume. 11Nuya̱ṉka Jurtan katitkirum Jirikiú péprunam támiarme. Tura Jirikiúnmaya̱ aents atumji̱a̱i̱ mánikiarmiayi. Kame Amur aents, Píris aents, Kanaan aents, Jet aents, Jírjis aents, Jep aents, Jípius aents núnisaraṉ atumji̱a̱i̱ mánikiarmiayi. Túrasha wi amuktárum tusan tsaṉkatkamiajrume. 12Tura átumka wéatsrumni̱ṉ Wi eten eem akuptúkam jimiará úunt akupin Amur aents armia nuka jíintrarmiayi. Túrunamtai átumka puya̱ja̱i̱sha tura tíshimkiuja̱i̱sha nupetmakchamiarme. 13Átumka waitsa takakmascha árumni̱ṉ nuṉkancha amasmiajrume. Núnisaṉ uunt pepru átumka je̱a̱mkachu árumni̱ṉ nui̱ pujusuk tusan susamiajrume. Tura uwa ajancha núnisaṉ uriwiu ajancha átumka arakmachiatrumek yuak tusan amasmiajrume.’
14Nekas enentáiji̱a̱i̱ ashamakrum Úunt Yusai̱ya̱ kanatsuk nekas umirkatarum. Atumí we̱a̱tri̱ Ejiptunmasha tura Yúpratis entsa pakarí̱ncha matsamsar najankamu yusan tikishmátin armia nuka iniaisarum Uunt Yus nekas enentáimtustarum. 15Tura Uunt Yus nekas umirkatin nakitiakrumka ¿warí yusa umirkatarum? ¿Atumí we̱a̱tri̱ Yúpratis entsa pakarí̱n matsamsar enentáimtin armia nú yusak nuíchuka tuke nuṉkentin Amur aentsu yusri̱n umirkatarum? Yamaik turutiarum. Antsu wikia wí shuarja̱i̱ nekas Uunt Yusan umirkattajai” tímiayi.
16Tutai ashí aents chichainiak “Atsá, ishichiksha Úunt Yusai̱ya̱ṉka kanaktsuk najanamu yuska enentáimtutsuk ii Uunt Yusri̱ṉ enentáimtustatji. 17Warí Úunt Yuschak iin tura ii we̱a̱trí̱ji̱a̱i̱ Ejiptunmaya̱ tí waitkiasma matsatrin ji̱i̱rmarmiaji núnisaṉ ni kakarmari̱ iniakmak wáinchatain túramusha wáinkiachmakajⁱ. Nu arantcha ayamprutmak tura untsurí nuṉkanam aents matsatainia nu naṉkaratniuncha yaintmakmiaji. 18Tura iisha íimprini̱ṉ jintiá aents matsatainiancha nuyá̱ Amur aents ju̱i̱ pujuiniancha ji̱i̱r akupkacharmakia. Warí ii Úunt Yusri̱ṉkia níṉkichukait. Nuna tura asamtai iisha nútiksarik ii Uunt Yusri̱ṉ enentáimtustatji” tiármiayi.
19Túrasha Jusuí chicharuk “Átumka Uunt Yus shiir enentáimtustin jeashtatrume. Niṉkia tunaarincha akasmau Uunt Yusaiti. Tuma asa atumí tunaarincha tura yajauch túramurmincha katsuntrashtatui. 20Ni shiir umirat iniaisarum najankamu yus umirkurminkia péṉker waitnentramprayataṉ kajertamak amutmaktatrume” tiármiayi.
21Nu tutai Jusuin chicharainiak “Nuka túrashtatji antsu Uunt Yus nekas enentáimtusar umirkattaji” tiármiayi. 22Nu tutai Jusuí áiniak “¿Átumchak iikia Uunt Yus enentáimtustatji tárum? Nu asamtai atumek tau asakrumin Yus atumín iirmasarti” tímiayi. Tutai nu chichamaik aimiainiak “Ee, Yus íirmakrin nekas umiktatji taji” tiármiayi. 23Nuyá̱ Jusuí ataksha chicharainiak “Nuiṉkia najankamu yus átum enentáimtarmena nuka iniaisarum Israer shuara Uunt Yusri̱ṉ nekas enentáiji̱a̱i̱ enentáimtustarum” tímiayi. 24Nu tutai ashí aents matsamármia nu Jusuin chicharainiak “Ii Uunt Yusri̱ ni tana tímiatrusrik túrakur umirkattaji” tiármiayi. 25Tuíniakui nu tsawantak Sekim nuṉkanmaṉ Jusuí Israer shuarja̱i̱ Uunt Yusak enentáimtustatji tuíniamu chichaman najanamiayi. Núnisaṉ akupkámu umiktin chichamnasha súsarmiayi. 26Tura Jusuisha Uunt Yus akupkámu umiktin chichame̱ áarmauya nui̱ ashí aents nekas umiktáji tiarmia nu chichaman áarmiayi. Tura Uunt Yus Shiir Awajtai̱ Je̱e̱n ayaam numi uunt wajamunam nekaska ju̱í̱yayi tiarmi tusa uunt kayan apujamiayi. 27Tura nui̱ Jusuí ashí Israer shuaran chicharainiak “Ashí Uunt Yus iin chichartamma antukjinia nu, ukunmasha nekas antukuitji tusar tuke kajinmatkichmin atí tusar jú̱ kayaka ápujeamuiti. Atumí Yusri̱ya waitruar anaṉmamawa̱i̱j tusarum ju̱ kaya wáinkiuram tuke enentáim wétatrume” tímiayi.
28Nuna tinia Israer shuaran Jusuí aṉkant aṉkant ni nuṉke̱n súsarmia nui̱ akuprarmiayi.
Jusuí jakamu
29Nuna ashí tura umik Jusuí Nuuna uchirí̱ Uunt Yusa takarin siantu tias uwí takaku jakamiayi. 30Tura jakamtai ni nuṉke̱ni̱ṉ Tímnat Seranam Eprainnium mura írunmanum Kaas nainnium arakaani̱ iwiarsarmiayi. 31Jusuisha tura uuntri̱ armia nusha Uunt Yus ni kakarmari̱ji̱a̱i̱ túramun wáinkiaru iwiaaku pujuarmia nui̱ṉ Israer shuarka Uunt Yusan péṉker umirkarmiayi.
Jusuí ukunchí̱ Sekim nuṉkanam iwiarsamu
32Israer shuarsha Jusé ukunchi̱n Ejiptunmaya̱n itiamun Sekimnum Jamura aentsri̱ nuṉke̱n Jakup sian kuitji̱a̱i̱ sumakmia nui̱ iwiarsarmiayi. Jamurka Sekima aparí̱yayi. Tura ukunam nu nuṉkanmaṉka Jusé uchirí̱ matsamkarmiayi.
Iriasár jakamu
33Núnisaṉ Arauna uchirí̱ Iriasár jakamtai ni uchirí̱ Pinias Eprain mura írunmanum susamuya nui̱ iwiarsarmiayi.
©2009 Avant Ministries in cooperation with Wycliffe Bible Translators, Inc. All rights reserved.