Jus. 20
20
Uwemtai̱ pepru
1Uunt Yus Jusuin chicharuk 2“Israer shuar chicharainiakum ‘Wi Muisaisja̱i̱ atumín tímiaj nuja̱i̱ métek uwemtai̱ pepru tutai anaikiatarum 3aya aneachma mátaj táchayat maṉkartuattana nuna, maamu shuari̱ maattsa apapéam pisar nu péprunam uwemprattawai. 4Kame uwemtai̱ péprunam weanak wá̱i̱ti̱a̱i̱ri̱n pepru uuntri̱ pujuinia nuna warinia tunamak wekáa nuna etserkati. Tura nuna paant etsertumakmatai nu péprunam awayá̱war niji̱a̱i̱ pujusat tusar ni pujustintri̱n iwiarturartatui. 5Nuya̱ṉka mantamnania nuna shuari̱ maṉkartua nuna patatakuiṉkia pepru uuntri̱ ainia nusha maṉkartua nuka ni írutramuri̱n kajerak tura mátin enentáiji̱a̱i̱ machu asamtai mátniun tsaṉkatkachartatui. 6Tura iruntramunam nekarawar sumamtikruawarat tusa uwemtai̱ péprunam pujustatui. Núnisaṉ Yúsnan pujurniu uuntri̱ jáamam nui̱ṉ pujutniuiti. Nuyá̱ ukunam maṉkartua aentsua nuka ni je̱e̱ṉ tura tu péprunmaya̱ pisar tamia nui̱ṉ waketkimniaiti’ titiá” tímiayi Uunt Yus. 7Nuyá̱ Israer shuar maṉkartuawar uwemtai̱ anairarmia nuka Kariréanam Neptarí nuṉké̱ naintiar náintrauya̱ nui̱ Káatish pepru tura Eprainkia nuṉké̱ naintiar náintrauya̱ nui̱sha Sekim pepru nuyá̱ Jutá nuṉké̱ naintiar náintrauya̱ nui̱ Kiriat Arpa pepru ármiayi (Kiriat Arpa pépruka Eprunaiti). 8Nuyá̱ Jurtan amaini̱ Jirikiúncha etsa̱ jintiainmaani̱ Ruwinkia nuṉké̱ kampuntin atsunum pakanam Pisir pepru tura Kaat shuara nuṉke̱n Karaatnum Ramut pepru nuyá̱ Manasés shuara nuṉke̱n Pasannum Kuran pépruncha anaikiarmiayi. 9Tura maṉkartuawar uwemtai̱ péprun ju̱na anaikiarmiayi. Kame nuiṉkia Israer shuar tura yajaya̱ aents niji̱a̱i̱ matsamármia nu maṉkartuawarka nui̱ pisarártiniuyayi. Tura aya aneachma maṉkartuawarka nui̱ uwemprartin ármiayi. Nuka pepru uuntri̱ armia nu iruntrar nekaachmanumia̱ maamu shuari̱ maṉkartua nuna máwa̱i̱ṉ tusa nuní̱ iwiararmiayi.#20:9 Jus. 21:1-45; 22:1-34 Shuar chichamnum yapaji̱áchmaiti.
©2009 Avant Ministries in cooperation with Wycliffe Bible Translators, Inc. All rights reserved.