Isa. 65
65
Yúsnan etserin seam Yus ai̱kma
1Uunt Yus chichaak “Kame Winia pachitiainiatsna nu e̱a̱tkarti tura e̱a̱tainiatsna nu wáitkiarti tusan iniaisarmajai. Nu nuṉkanmaya̱ aents Winia náarun pachisar untsurainiachunak chicharainiakun ‘¡Ju̱i̱ pujajai! ¡Ju̱i̱ pujajai!’ tiármajai. 2Tura nu aents umichu ásar ni enentáimmiari̱ji̱a̱i̱ṉ ni wakeramun túruiniak péṉkerchanum wekainianak takamtsuk tsawant untsusan pujursarmajai. 3Nu aentska Wisha íimiai̱ṉ ajanam taṉkun maa áesainiak tura nuwe iniarkar irumpramunam kuṉkuinian áesainiak tuke akajtuiniawai. 4Túmainiak shuar iwiarsamunam pujuiniawai tura káshikia ú̱mak pujuiniawai. Kame kuchí namaṉké̱ncha yuíniawai tura ni ichiṉnari̱ṉkia mui̱jmiai̱ yúchatai yumiri̱ pimiasuá wéarainiawai. 5Tura nisha chichainiak ‘Weantúrkaip íkiaṉ wajasta. Warí iikia ámiji̱a̱i̱ naṉkaamas tí peṉker tunaarinchaitjiai’ tuíniawai. Nuka Winia nuji̱rui̱ṉkia mukuintiua núnis áiniak tsawant takamtsuk ji tí keak tuke kapa̱a̱na núnin áiniawai. 6Nekaata. Wi íimmianum ashí aarma awai. Peṉké takamátsashtatjai antsu ni súsatniua núnaka súsartatjai. Nekasaiti, súsatniua núnaka imiá níniak súsartatjai. 7Atumí yajauchiri̱ni̱ṉ tura atumí aparí̱ naint ántar yusan kuṉkuinian áestuawar wishikruiniak yajauchin túrawaru ásarmatai nuna ashí iruran yaunchu ni túrawarua nuja̱i̱ métek ashí asutiátajrume” tawai Uunt Yus.
Uunt Yus shiir matsamtan tsaṉkateawai
8Túrasha Uunt Yus chichaak “Shuar chikichik nantaṉnumia̱nak ishichik neré̱ péṉkeran wainiak chichaak ‘Ju̱i̱ṉkia péṉker yumirtin íruneak aentsun shiir awajsámnia asamtai tsupikiairap’ tíchattawak. Wisha núnisnak Winia takartin ainia núnaka mash emesrara̱i̱j tusan túrattajai. 9Jakupa shuari̱nkia untsurí awajsartatjai tura Jutá shuarnumia̱ winia náintrun nérentin ajastinniaka jí̱i̱ktiatjai. Tura Wi anaikiamu ainia nu nuṉkanka nérentin ajasártatui. Nuyá̱ Winia takartin ainia nusha nui̱ matsamsartatui. 10Sarunka sa̱a̱kⁱ murik yurumtai̱ ajastatui. Tura Akura pakarí̱ṉkia Wi shuar e̱a̱tú yujarmia nuna waakari̱ matsamtai̱ ajastatui.
11Túrasha átumka Uunt Yus iniaisarum tura Winia náintrusha kajinmátkirum najanamu yus Purtuna yurumkari̱ iwiartiniaitrumna núnaka núnisaṉ najanamu yus Tistiniu winiu pachimpramu ukatniuitrumna nunasha 12puya̱ja̱i̱ mantamnati Wi títiatjarme. Tura átumka sué̱run tsupirtukarti tusarum ashí tikishmartatrume. Warí untsuamsha peṉké ái̱rkachmarme tura chicharmasha peṉké anturtukchamarme. Antsu Wi iismasha áyatik yajauch túrakrum Wi nakitiajna nu túramarme.” Isa. 66:4#65:12 Purtuna aya aneachma waitmakar warastin taku tawai. Tistiniu ii warí itiurkatnuitiaj nu taku tawai. 13Tuma asamtai Ashí Akupin Uunt Yus chichaak “Wats nekaatarum, Winia takartin ainia nuka yurumáiniamunam átumka tsukamtiatrume. Winia takartin ainia nuka úmuiniamunam átumka kitiamtiatrume. Winia takartin ainia nuka warainiamunam átumka natsan awajnáktatrume. 14Nekaatarum. Winia takartin áiniaka enentáiji̱a̱i̱ warainiak kantamáwartatui túrasha átumka enentáim najaimiakrum kakaram úttiatrume. Núnisrumek atumí wakaní̱ncha jakamnia nekapeakrum wáitsattarme. 15Antsu Ashí Akupin Uunt Yus atumniaka amutmaktatrume. Wi achikma ainia nu yajauchiji̱a̱i̱ yumiṉkrar atumí náari̱ṉkia asakárartatui antsu Yus Ní shuari̱ náari̱nkia yapajtiuáwartatui.
16Yaaksha ju̱ nuṉkanam shiir pujutnum yumiṉkramua nuka nekas chichawa nu Yusa náari̱ji̱a̱i̱ yumiṉkramu átatui. Tura yaaksha ju̱ nuṉkanam nekas tajai tákusha nekas chichawa nu Yusa náari̱ji̱a̱i̱ nekas tajai títiatui. Warí yaunchu wáitsamuka kajinmátkimiu ártatui núnisnak Winia jí̱ruja̱i̱sha atakka íischattajai.
Nayaimpisha tura nuṉkasha yamaram najanawarma
17Tura nekaatarum. Wikia nayaimpincha tura nuṉkancha yamarman najankartatjai. Nuiṉkia emka najankamu armia nuka peṉké kajinmátnaktiatui núnisaṉ enentáimtutcha enentáimtuntsashtatui. 2 Pit. 3:13; Apu. 21:1 18Antsu Wi najankattajna nuja̱i̱ nekaska iniaṉnatsuk ti shiir enentáimsarum warastarum. Warí Jerusaréṉnaka warastinian tura nui̱ matsatainianka ti shiir enentáimsar pujusárat tusan najanattajai. 19Tura Wikia Jerusaréṉkan shiir enentáimtakun wí aentsnaka wararsartatjai. Nui̱ṉkia útmasha najaimiatniusha atakka peṉké antunkashtatui. 20Warí nuiṉkia uchi aya ishichik tsawant iwiaaku pujaaka atsuttawai. Núnisaṉ úuntach ainia nusha tsawantri̱ jeatsa̱i̱ṉkia jákachartatui. Tuma asa aya sian uwí takaku jaakka úchichik átatui antsu sian uwí ejetsuk jaaka yajauchiji̱a̱i̱ yumiṉkramu timia átatui. 21Tura je̱a̱n je̱a̱mkar nui̱ṉ pujusártatui núnisaṉ úwan arakaar nuya̱nak neren yurumiartatui. 22Tura je̱a̱mainiaksha chíkich pujustinian je̱a̱mkachartatui núnisaṉ arakmainiaksha chíkich yurumátniun arakmachartatui. Antsu Wi shuarka numi wajana timianú uwí iwiaaku pujusártatui. Tura Wi shuar ainia nuka ni takatrí̱ya̱n péṉkeran wainiainiak warasar pujusártatui. 23Tura takatan takainiaksha ántar takaschartatui núnisaṉ ni uchirí̱sha itiurchatnum pujuschartatui. Warí nu shuarka Uunt Yus ti shiir awajsamu áiniawai tura ni tiraṉki̱sha nuja̱i̱ métek Uunt Yus ti shiir awajsamu ártatui. 24Tura untsurainiatsa̱i̱ṉ Wikia ái̱kiartatjai núnisnak Wikia chicháa pujuiniai̱ṉ anturkartatjai. 25Nuiṉkia rúpu ya̱wa̱sha̱ murikji̱a̱i̱ métek sa̱a̱kin yuáwartatui tura úunt ya̱wa̱sha waaka áintsaṉ sa̱a̱kin yútatui. Nuyá̱ napisha nuṉkan ju̱yu̱ri̱n yútatui. Tura yajauch awajnáikiatniusha núnisaṉ emesnaikiatniusha Winia akantúkma náintrui̱ṉkia atsuttawai” tawai Uunt Yus.
©2009 Avant Ministries in cooperation with Wycliffe Bible Translators, Inc. All rights reserved.