Isa. 46
46
1Piirka tekem iniantuiti núnisaṉ Nepusha túrunaiti. Nu yus nakumkar najanawarma núnaka entsauyarmena nu yamái kijin aentstai̱ yajasma entsáu áiniawai. Tura káruja̱i̱ kijinian juíniakui yajasman ipimpikiainiawai. 2Mái̱ metek natsanmai̱ awajnákararmai. Túmainiak ayamprumaktinniasha tujintkiar imia niṉki yajá júkiarma armai.
3Maa, Jakup shuartirmesha kame Israer shuara nu iwiaaku juákutirmesha akiintsurmini̱ṉ nukuí̱ eṉketrumni̱ṉ Wi achikma asarun antuktarum. 4Átum weampra jempée puju ajasákrumnisha Wiki átatjai tura Wiki wainkiattajrume. Wikia núnisan túraitjiai tura Wiki ewekámsattajrume. Wiki wainkian aṉkant awajsattarujme.
5¿Yája̱i̱ṉ méteksha awajtústarum tura métekeashit tusarmesha yája̱i̱ṉ apatka íirsatarum? 6Pitiakrí̱ya̱n kurin júsar kuit jiruncha kijin nekapmatai̱niam nekapmainiawai. Nuyá̱ kuít jiruja̱i̱ najanin ainia nuna nakumak yusan najatrukat tusar suíniawai. ¡Tura najanamtai tikishmátrar shiir enentáimtuiniawai! 7Nuyá̱ yanak juíniawai tura pujutái̱ri̱n apujainiawai. Tura ni pujamunmaya̱nka peṉké muchitiatsui. Yáakesh untsuamash peṉké ántichuiti núnisaṉ wáitsatniunmaya̱sha aṉkant awajkartichuiti.
8Ántichutirmesha nu nekaatarum tura kakaram ajasrum ujakmarumna nu atak enentáimpratarum. 9Ti yaunchu túramu naṉkaamasu ainia nusha enentáimturtarum. Warí Wikia Yúsaitjiai tura chíkichkia atsawai. Witjiai Yúsnaka tura chíkichkia Wiji̱a̱i̱ métekka peṉké atsawai. 10Tura ukunam túrunattana nunasha tí yaunchuya̱ṉ yama naṉkammanumia̱ṉ juárkin etserkin winiajai. Wi iwiaramua núnaka Wi itiurkatniuna wakeraj tímiatrusnak umiktatjai. 11Ántsaṉ etsa̱ tatainmaya̱n yukartin nanamtin tura yajaya̱ aentsun Wi iwiaramun umikiat tusan Wi untsúajai. Wi chichaku asan núnaka tímiatrusnak túrattajai. Kame Wi iwiaramuiti tuma asan núnaka núnisnak umiktatjai. 12Atumí enentái̱ kátsuram asamtai nekasa nuja̱i̱ métek túrichutirmesha antuktarum. 13Wi nekasa nuja̱i̱ métek túrutair atumín weantúrmaktatrume. Winia uwemtikkiartutai̱rka naṉkankashtatui. Seúnnumsha uwempratniunka ejettajai tura Israer shuarnaka Winia páantniur átatui.#46:13 Isa. 47-48 Shuar chichamnum yapaji̱áchmaiti.
©2009 Avant Ministries in cooperation with Wycliffe Bible Translators, Inc. All rights reserved.