Isa. 44
44
Uunt Yus Niṉki Yúsaiti
1Yamaikia Winia takartin Jakupá antukta, Israerá Wi ámin achikmajme. 2Ámin Najatma Uunt Yus jú̱nis tawai. Nukú aya̱shí̱ya̱ najatmamia nu yaintmaktatui. Winia takartin Jakupá ashamkaip. Kame ame Jesurunká Wi achikmajme. 3Wi nuṉka kuchachnum entsan ukartatjai túran nuṉka ju̱ju̱ptinnium entsa waa ajastatui. Núnisnak Winia Wakantrun ame shuarumin ukartatjai tura péṉker yumiṉkran ame tiraṉkrumnia̱sha jé̱e̱rartatjai. 4Kame nisha ajanam nupa̱ tsapá núnis tí tsapakartatui tura numi entsá yantam wajana núnikiartatui. 5Ju̱na títiatui “Wikia Uunt Yúsnaitjiai, chíkichkia Jakup anaikiattawai tura chíkich uwejnum aak Úunt Yusnaitjiai tura Israera náari̱ji̱a̱i̱ anaikiamu átatui” títiatui. 6Uunt Yus Israera úunt akupniuri̱ tura ni Uwemtikin Ashí Akupin Uunt Yus jú̱nis chichaak “Witjiai Émkanka tura Náṉkatkancha. Kame chíkich Yuska atsawai aya Wíkitjiai. 7Tura ukunam átatna nunasha ¿yaki etserak paant awajsat tura Wi pujamunmasha pekak métek apujsat? Tura ¿yaki Wi yáunchuya̱ aentsun matsakun itiurkamiaj nútikiat? Winiana nu tura winittsa pujana nu ujakárti. 8Ashamkaip tura sapijmiatash sapijmiakaip. ¿Yaunchu núnaka ántumtikiachmakjarum? Warí átumketrume Winia nékarutirmeka. Chíkich yus ¿áminkiait? Antsu Wíkitjiai. Kakarmantka chikichniaka peṉké nékatsjai.”
Najankamu yus ántraiti
9Numin ántar yusan najanniuka ashí ántar najanin áiniawai. Núnisaṉ ni tí shiirmach najanamusha peṉké ántar áiniawai. Wáinmachun tura nékachun imia niṉki nékainiayat najanainiawai. 10Ya yusa núninian nájanuk iminiar nájana nuka ¿peṉké ántar najanchakait? 11Nekaata, ashí nuna najanin ainia nuka natsa̱a̱rartatui. Warí ju̱na najanin ainia ju̱ka aents áiniawai. Ashí iruntrar ashamkartatui túrunawar iniatsántrartatui.
12Jiruja̱i̱ takakma nuka jinium jírun jia takakmawai tura martiyuja̱i̱ nekear nájanui. Tsukamak kakarmachu nekapeawai entsancha úmatsui túmak mayai̱ ashiniui. 13Numiji̱a̱i̱ takáa nuka numi nekapmatai̱ takakui. Tura áatai̱ji̱a̱i̱ tesawai tura numin sepiyuja̱i̱ tamer nájanui. Kumpasja̱i̱ nakumar tura aentsua nuní̱ iira shíirmach najana ni je̱e̱n takakui. 14Sétrun tsúpiniawai tura seprisan nuyá̱ ensenan araawai. Kampunniunmaya̱ numiji̱a̱i̱ tsakainiawai, píniun araawai tura yumi tsakamtikiui. 15Jinia ikiapáiniawai. Tura anamainiawai nuyá̱ jinia ikiapár páṉkan iniaráiniawai nuya̱sha yúsaiti tusan najana shiir awajainiak nuyá̱ tikishmátainiawai. 16Ji ampiniárunka nuja̱i̱ namaṉken iniaráiniawai tura yuruma ejemainiawai. Tura anama chichaak “Maa, ju̱ jinia anamájai” tawai. 17Tura ampintráṉka ní yusri̱n najanak tikishmátar seak “Aṉkant awajtusta. Warí ámeka winia yúsruitme” tawai.
18Ju̱ aentska ji̱ epetkamu asar wáinmainiatsui tura enentáimias nekaawai tusar enentái̱ akirtuamu áiniawai. 19Ampintrán jinium áesamjai. Kaí̱ji̱a̱i̱ páṉkan namaṉken iniarán yuamjai. Peṉké enentáimiainiatsui, peṉké nékainiatsui. Nuna tíntiajtai tuusha enentáimiainiatsui. ¿Nuna tiáruri̱nkia mui̱jmiainian najanattajak tura numi ajiṉkiári̱n eem tikishmátrattajak? 20Yuṉkunmin yuíniawai, ni enentáinkia anaṉka yajá pemperayi. Ni wakaní̱ṉkia aṉkant awajtatsui tutancha tatsui. ¿Untsuur uwejrui̱ takakjana nuka wáitchakait? 21Jakupá, ame Israerá ju̱ enentáimturta. Warí ámeka winia takartiniaitme Wi najanamajme, ámeka winia takartiniaitme, Israerá kajinmátrukip. 22Ame tunaarumnia̱ka yuraṉmia nútikian Wi emenkátkamajme tura tunaarumnia̱ka yuraṉkim nuṉká utsanar meṉkana nútikiamjai. Winí̱ waketkitia. Warí Wi aṉkant awajsámajme. 23Maa nayaimpí, Uunt Yus ámin najatmamna nu kantampruata. Nuṉka initri̱yá̱ warasam untsumkata, náintirmesha tura kampunniunam numi írunna núurtiuk shiir awajkuram chichaktarum. Warí Uunt Yus Jakupan aṉkant awajsaiti tura ni winchari̱ Israer shuarnum shiir awajsaiti.
Síruka Jerusaréṉ ataitniun akiniaiti
24Ame nukú waké̱ ínitia̱ṉ najatma nu Uunt Yus ámin aṉkant awajtámsa jú̱nis túramui “Wi Uunt Yus ashí nájanjai. Aya nayaimpiniak ayapá̱jai nuṉkancha Wiki ayapá̱jai. 25Nekamin ainia nuna iniakmamuri̱ncha Wi tsurintiainiajai. Túran uwishniuncha wáurmamtikiainiajai. Nekamin ainia nunasha úkumur awakenajai túran ni nekatairi̱ncha peṉké antar awajtuiniajai. 26Winia takarniu chichame̱nka umikian ni ‘Ju̱ka túrunattawai’ takui̱ ‘Nekas uminkiati’ tajai Yus asan. Warí, Yúsnan etserin ‘Ju̱ka naṉkamnattawai’ takui̱ Wisha ‘Túrunati’ tajai. Nuyá̱ Wikia Jerusaréṉkan áujmakun untsurí aentsja̱i̱ piaku ajastatui tura Jutá pépruri̱nkia áujmatkun pépruka atak je̱a̱mma ártatui. Jutanam emeskamu ainia nuna atak je̱a̱mkattajai. 27Nayantsa kunari̱n kukach ajasta tana nuka Witjiai tura ame entsarmin kukach awajtústatjame. 28Tura Wisha Sírun áujmakun ‘Winia shuar wáinniuka níyaiti. Wi wakerajna nuna mash umiktatui. Siru Ists. 1:2 Jerusaréṉkan títinkia ju̱i̱ti, je̱a̱ je̱a̱mma átatui tura Yusa Je̱e̱nka tépakmari̱nkia aeprukma átatui.’ ”#44:28 Isa. 45:1-19 Shuar chichamnum yapaji̱áchmaiti.
©2009 Avant Ministries in cooperation with Wycliffe Bible Translators, Inc. All rights reserved.