Isa. 41
41
Yus Israer shuaran yáiṉtatui
1“Nayantsa yantametirmesha mitia ajasrun Winia anturtuktarum. Ashí aentstirmesha kakaram ajasrum weantkarum chichaktarum. Súmamtiktainiam métekrak wajasarmi. 2Uunt akupin tuke awakmauncha etsa̱ jintiainmasha ¿ya iwiainiakma? Uunt akupniun wishikmai awajkar tura ni puya̱ri̱ji̱a̱i̱ ju̱yu̱ awajás núnisan tíshimkiuri̱ji̱a̱i̱ṉkia chiruntkan tsakiṉma nútikiat tusasha ¿uunt nuṉka tépaku ainia nunasha ya íiktussha iniaisama? 3Niiṉkia pataatukmai tura nu jintianmaṉka peṉké wekaichaitiat itit awajsachma aṉkant naṉkaamakmiai. 4¿Yaki najanait tura yaki jítikiama? ¿Tura yámankamtaikniumia̱sha aentsnasha yaki untsúa? ‘Wi Jiuwá émkaitjiai núnisnak ukunam ártatna núja̱i̱sha Wíkitjiai.’” Apu. 1:11; 22:13
5Tura nayantsa yantamén matsatainiasha wáinkiarmai tura ashamkarmai. Tura nuṉka náṉkatra tímianaisha sapijmiakar iruntrarmai tura káunkarmai. 6Aṉkant aṉkant ní shuari̱n yáiṉkiarmai tura yachi̱ncha “Kaka̱rta” tiarmai. 7Numiji̱a̱i̱ takakmau kuít jiruja̱i̱ takakmaun ikiakáimiai. Tura martiyuja̱i̱ nekeṉ péṉker awajin jirunam awaṉ nekean chicharuk “Mai̱ jiruk íkiam nuka péṉkeraiti” timiai. Tutai muchitki̱a̱i̱ṉ tusa najankamu yúsnaka jiruja̱i̱ ajintruamai.
Uunt Yus Israer shuaran yáiṉtatui
8“Túrasha ámeka Israerá, Winia amikiur Aprajáma shuari̱ya̱ Jakupan achikmiajna nu Wi wakeramu takartiniaitme. 9Wikia nuṉka náṉkata ímianiaṉ Winia aminiam tusan áminkia untsukmiajme. Tura asan ‘Wikia winia takarniúr átatme tímiajme. Tura Wi anaikia asan áminkia peṉké iniaisachuitjiame. 10Sapijmiakaip. Warí Wi ámiji̱a̱i̱ pujajai. Ashamkaip. Warí Wikia ame Yúsrumetjai. Tuma asan tuke yáiṉtatjame núnisnak Winia kakarmarja̱i̱ ikiaká̱rtatjame. Tura winia náka túrutair untsuuruja̱i̱ péṉker apujsattajme’ tímiayi. 11Nekaata, ámiji̱a̱i̱ kajernia nuka enentáimmiari̱ pachimprukaram natsanmai̱ ajakártatui. Ámiji̱a̱i̱ mániaka peṉké ántar ajasár amukártatui. 12Ámiji̱a̱i̱ kajernaiya e̱a̱kmesha atakka peṉké wáinkiashtatme. Ámin mesetan najatramainia nuka peṉké ántar ajasár ukunmasha peṉké atsuartatui. 13Warí, Wíkitjiai Jiuwanka ame Yúsrumetjana nuka. Ame untsuurmin emeta achirmakna nu chichartamuk ‘Sapijmiakaip, warí wi yaya̱jme’ túramui. 14Ashamkaip Jakupa akari̱yá, maa, átumka Israer shuartirmeka wárumchikitrume. Ámin yáintmaaka Wíkitjiai ámin Uwemtikramin, Tunaari̱ncha Israera Yusri̱ Jiuwá tawai. 15Nekaata, saep pákatia nútiksan apujsaitjiame, pakatai̱ yamaram nai̱ tsarawé̱arma núnisaitme. Tuma asam naintkia saep pakarma nútiksam tsai̱ tsai̱ awajsaram naint tépepra ainia nuka ju̱yu̱ awajsarta. 16Núnaka nase awajtiur yaruaktatui tura uunt nase tsakiṉmaktatui. Túram ámeka Jiuwái̱ warastatme, warí, Israera Yusri̱ Tunaari̱ncha nu shiir awajsattame.
17Kuítrincha tura atsumainia nu ni iniái̱ ju̱ju̱ptin ajasármatai kitiakén entsan atsumainiak e̱a̱iniawai túrasha atsawai. Wi Jiuwá asan susattajme, Wi Israera Yusri̱ asan ajapa iniaisashtatjame. 18Naint ainia nui̱sha entsa waa ártatui núnisaṉ nuṉka paka tépakmanumsha entsa iruntiatui. Kampuntin atsú nuṉkanmasha entsa pajamtai̱ irunin awajsattajai. Núnisnak nuṉka ju̱ju̱ptin ámanumaṉ ashints waa ártatui. 19Kame kampuntin atsunumsha sétrun, akasia numin tura mirtu numin nuyá̱ uriwiuncha tsakatmaktatjai. Tura nuṉka nainaikmirtinniunmaṉ sépris nuyá̱ piniu numi tura chíkich numisha iruntiatui. 20Ashí aents nuna iis nekaawarat tura núnisaṉ esetar métek enentáimsarat tusa Jiuwá uwejé̱ja̱i̱ ju̱na nájaneawai. Warí, Israera Tunaari̱ncha Yusri̱ya nu najankaiti.”
Yus najankamu yusan súmamtikma
21Jiuwá chicharuk “Paant awajmamsakia. Átum nekapnastin takakrumna nu paant etserkatarum Jakupa Úunt Akupniuri̱ tawai. 22Najankamu yus asarum winirum túrunattana nu ujakratkam yama naṉkamtaik túrunamia nusha etserkatarum. Nusha antukar enentáimtitiai. Tura ukunam átatna nu ujakratkata ame náṉkatkamuram iincha nekamtikkiartuatarum. 23Ukunam átatna nu tukartitiarum. Nuja̱i̱ iisha átum yúsaitrumna nu nekaattaji. Yajauchiksha nuí̱chuka péṉkersha túratarum. Iisha nu iisar chikitcha ujainiakur ¡ausháa áiniawa! titiái. 24Maa nekaatarum, átumka peṉké ántraitrume núnisaṉ atumí takatri̱ atsawai. Tura atumín achirmákuitrumna nuka muí̱jmiainti.
25Wi chikichkiniak arakaani̱ya̱ iniantkímiu winittiawai tura aents etsa̱ jintiainmaani̱ya̱ Winia náarun pachis untsurkattawai. Nisha uunt ainia núnaka nuwé najanin tsakusan amuuta nútikias amutúrtatui.” 26Yama naṉkamtaik ii nekaatniuncha ¿yaki etserkait? Núnisaṉ ii títinniasha “Niṉkia nekas tíniuiti” túrunchamunmaṉsha ¿yaki tíniuit? Tí nekas tíminkia atsawai núnisaṉ etserkamniasha atsawai. Atumí chichame̱ncha yaaksha antukmiṉkia atsawai. 27“Wi émkaka ju̱na Seúnan ujakmajai ‘Nekaata ju̱i̱ti’ tímiajai. Núnisan Jerusaréṉnaka ‘Wará warat chichaman etserniun akuptúktatjai.’ 28Tura iismasha chikichkisha peṉké atsumai. Ni matsatna nuyá̱ chicharkartin atsá asamtai ¿yanak iniasar ái̱kiarat? 29Nekaata, ashí ántar áiniawai núnisaṉ ni takatri̱ṉkia peṉké ántar áiniawai. Imintrar najanamu yus ainia nuka peṉké ántar áiniawai” tímiayi.
©2009 Avant Ministries in cooperation with Wycliffe Bible Translators, Inc. All rights reserved.