Isa. 2
2
Seun shiir awajnamu tura ashí nuṉkanam aṉkant átin
1Nuyá̱ Amusa uchirí̱ Isayas Jutanam tura Jerusaréṉnum túrunattana nuna ímiaja̱i̱k wainkiamiayi. 2Kame amúamu tsawantinkia Uunt Yus Shiir Awajtai̱ Je̱a̱ pujana nú naintkia chíkich naint ainia núja̱i̱ṉkia naṉkaamas páantin awajnástatui. Tura nu naint tépepra ainia núna naṉkaka uunt átatui. Túrunamtai ashí nuṉkanmaya̱ aents ti untsurí nin kauniartatui. 3Tura untsurí nuṉkanmaya̱ aents káunkar chichainiak “Winitiárum Uunt Yusa náintri̱n, Jakupa Yusri̱ Je̱e̱n wákarmi. Tura ni jinti̱n wekasatniun jintintrámawakrin Niin wekaasarmi” tiártatui. Warí akupkámu chichamka Seúnnumia̱ jiinkittiawai tura Uunt Yusa chichame̱nka Jerusaréṉnumia̱ antuukattawai. 4Tura ashí nuṉkanam Akupea asa ashí aentsun chicharkartatui. Tura aentska ni puya̱ri̱nkia nuṉka pukutai tura naṉkirí̱nkia trikiu tsupitiai̱ awajsártatui. Aentssha chíkich nuṉkanmaya̱ aentsja̱i̱ mesetan jurunáikchartatui. Nui̱ṉkia mániatin unuimiátratniusha peṉké atsuttawai. 5Maa, Jakup shuaraitrumna nútirmeka winitiárum Uunt Yusa tsáapnintri̱n wekasarmi.
Uunt Yusa tsawantri̱ ti ashammai átatui
6Kame etsa̱ jintiainmaani̱ pujuinia nuna túrutairi̱n ti unuimiátkarai núnisaṉ Jiristíu aentsja̱i̱ métek yajauch wakanja̱i̱ nekamin ajasárai ántsaṉ chíkich nuṉkanmaya̱ aentsu uchirí̱ji̱a̱i̱sha nawamnaikiar chichasar pujuiniawai. Túmainiakui ame shuarum, Jakup shuarka ti nekas nakitraruitme. 7Kame ni nuṉke̱nka kuri tura kuit ti írunui. Tura ni kuítriniamuri̱sha peṉké naṉkatkainiatsui. Núnisaṉ ni nuṉke̱nka kawái ti pampaṉ piákuiti tura ni káruri̱sha nekapmashtaiti. 8Nu arantcha ni nuṉke̱n ántar yus najankamu piakai. Túrawar ni najankamunak tikishmátainiawai. 9Kame áentsuitiat nuna tikishmátainia ásar aentscha núnikiarai. Tuma asamtai ni yajauch túrutairi̱sha tsaṉkuraraip. 10Kame Uunt Yusa winchari̱ tí tsuumai̱ ajakui kayá wá̱a̱nam tura nuṉkáa wá̱a̱nmasha wáinkiar ú̱mkartatui. 11Aents waantu enentáimtuma ainia nusha natsanmai̱ ajakártatui tura kajen ainia nusha péejchach ajasártatui. Túrunawarmatai nu tsawantinkia aya Uunt Yusak naṉkamantu awajnástatui.
12Kame Ashí Akupin Uunt Yusa tsawantri̱ átatna nu tsawantka wishikkiartin tura waantu enentáimtuma ainia nuna Yus ni kajetáiri̱n tura kakarmari̱ncha iniaktusartatui. Tuma asa natsanmai̱ awajnákartatui. 13Núnisaṉ Ríwianu nuṉkanmaya̱ séetur shauṉ tsakaru ainia tura Pasannumia̱ numi ensena ímianu enentáimtumainiana nunasha 14tura naint yakí̱ wájaku tura ashí naint tépepra páantniua ímianu ainia nunasha 15tura je̱a̱ kayaja̱i̱ yakí̱ je̱a̱mkamua tura kayaja̱i̱ wenuimiua ímianu ainia nunasha 16nuyá̱ Társesnumia̱ uunt kanu tura tí shiirmach kánua ímianu enentáimtuma ainia nunasha 17aentsu páantniuri̱ áiniayat ashí natsanmai̱ awajnákartatui. Tura aentsu naṉkamantu enentáimtairi̱sha péejchach awajnásartatui. Antsu aya Uunt Yusak naṉkamantu awajsamu átatui. 18Nuya̱ṉka najankamu yus ainia núnaka ashí amukártatui. 19Uunt Yuska aentsun asutiak nuṉkan umuchiakui tura Uunt Yus tsuumai̱ nuyá̱ ni kakarmari̱sha jíitsumir ajakui aentska kayá wá̱a̱nam tura nuṉká wá̱a̱nmasha ú̱mkartatui. YKan. 18:7; Isa. 13:11-13; Aji. 2:6-7 20Nu tsawantinkia aents najanamu yusan tikishmátrartai tusar kúriji̱a̱i̱ tura kuít jiruja̱i̱ najankamuncha katipin tura jéenchman utsaṉkartatui. 21Uunt Yus ashamái̱ tí wincha jíitsumir ajas nuṉkan umuchrataj tusa winiakui aents ashamianiak kayá wá̱a̱nam tura nuṉká wá̱a̱nmasha ú̱mkartatui. 22Warí ¿aents tuke iwiaaku pujuukait? ¿Urukamtai aentsush imiá enentáimtittiarum?
©2009 Avant Ministries in cooperation with Wycliffe Bible Translators, Inc. All rights reserved.