Use. 11
11
Yus ni shuari̱n ántichunak anenawai
1Israer shuar uchichiya̱ nuiṉ anea asan
uchirun Ejiptunmaya̱n untsukmiajai.
2Túrasha chicháa chichareamsha
Wini̱ya̱ṉka nu arant kanakiármiayi.
Túrunawar najankamu yus Páaran enentáimtuiniak
taṉkuncha núnisaṉ kuṉkuinniasha áestiarmiayi.
3Túmainianak Eprain shuarnaka péṉker eṉkesan ewekámsarmajai
túrasha Wi tsuáran wáiniarmaj núnaka peṉké nekamacharmai.
4Wikia nuwa̱ ni uchirí̱n aneak miniakas
tura naṉkas áyurea nútiksan ayurawarmiajai.
Tura nin anena asan winí̱ winik tusan itiarmiajai.
5Winí̱ waketkitniun nakitraruiti.
Tuma ásar Ejiptunmasha waketkichartatui.
Antsu ni akupniúri̱ṉkia Asirianmaya̱ṉ átatui.
6Nuyá̱ ni pépruri̱nkia mesetja̱i̱ amukar
núnisaṉ ni ejamtairi̱ncha emestukartatui.
Kame jú̱nis túratniuitji tu enentáimiainiakui nuka túrunattawai.
7Tumai̱ Wi shuarka ántichu ajasár
umiktinniasha nakitiáiniak aya kájertuiniawai.
Nuyá̱ Naṉkamantu Yúsaitme turutainiayataṉ ishichkisha páantin awajtuiniatsui.
8Kame Eprainkiá tura Israerá ¿itiurak surukan
tura ajapan ikiuktiajrum?
¿Urukamtaik Atma tura Sepuimia nútikiancha ajapan iniaisaintjiarum?
Warí imiá aneancha ashí winia enentái̱rja̱i̱ enentáimsan
tura waitnentakun yáiṉtinian wakerajrume.
9Wikia áentschaitjiai antsu Úunt Yusaitjiai.
Tura Peṉké Tunaarincha asan ju̱ aentsja̱i̱ pujakun
péṉker enentáimpramaj nuna umíakun Eprainniaka asuttsuk iniaisattajai.
10Uunt Yusan nemarsartatui.
Tura niṉkia úunt ya̱wa̱ núnis júruur ajattawai,
ee nekas júruur ajattawai.
Tura etsa̱ akatainmaya̱ niniu ainia nuka kuraṉkiar tariartatui.
11Núnisaṉ Ejiptunmaya̱sha chiṉkia ántsar
tura Asirianmaya̱ṉka yámpitsa núnisar kuraṉkiar káutkartatui.
Túran ni je̱e̱ni̱ṉ matsasártatjai Uunt Yus tíniuiti.
Israera tunaarí̱
12Kame Eprainkia waitji̱a̱i̱
tura Israerka anaṉkartutaiji̱a̱i̱ téntatkarai.
Tura Jutaka Tunaarincha Yusan anaṉkartutsuk
tí peṉker wáinkiartinian nékayat
Yusai̱ya̱ kanakiar ní wakeramun túruiniawai.
Currently Selected:
Use. 11: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
