Naṉ. 45

Jusé ni yachi̱n paant awajmámsamu

1Maa, nuja̱i̱ Jusesha aneṉkratamuri̱n katsunteachuk ni takarniúri̱ matsamármia nuna kakantar chicharainiak “Ju̱ya̱ṉka mash jíintrarum wetarum” tiármiayi. Nu tutai ni takarniúri̱ chikichkisha Juseja̱i̱ṉkia juákchamiayi. Aya yachi̱ji̱a̱i̱ṉ juak “Atumí yachi̱ntjiai” tusa paant awajmámsamiayi. 2Nuna tura tí utmiayi. Tura tí útun Ejiptu aentssha antukarmiayi. Tura ímia úunt akupin Parauṉka je̱e̱n pujuarmia nusha anturarmiayi. 3Kame níjia̱i̱ṉ pujusár Jusesha ni yachi̱n chicharainiak “Nekas wisha Juseetjai. ¿Winia aparsha iwiaakukait?” tímiayi. Tura yachi̱sha nuna anturkar ti sapijmiakar ái̱ktinniasha peṉké tujintkiarmiayi. 4Tura Jusesha chichaak “Waitneasrum tantatarum” tímiayi. Tura nisha tántarmatai chicharainiak “Wisha ti nekas atumí yachi̱ntjiai. Juseetjai. Ejiptunam wetí tusarum yaunchu átum surutkamiarum núitjiai. 5Warí wíniaka tsukái jákara̱i̱ṉ tusa Yus emka ju̱i̱ akuptúkuiti. Tuma asamtai surutkaitkiurmesha itiurchat enentáimtumasrum kúntuts pujusairap. 6Ju̱na tájarme yamaikia jú̱ nuṉkanam jimiará uwí tsukamnaayi. Tura tuke seṉku uwí tsuka átatui. Takakmainiaksha júukchartatui. 7Tuma asamtai tsukái átum jáka̱i̱rum antsu pampaṉkuk tusa émtikrukmiayi. Tura átumka jú̱ nuṉkanmaṉka táatsrumni̱ṉ tsukanmaya̱ uwemtikrarmi tusa wíniaka Yus akuptúkmiayi. 8Páantchakait, átumka ju̱i̱ṉkia akuptúkchaitrume antsu Yusak akuptúkuiti. Kame Parauṉkan enentáimtikin atí tusa núnisaṉ je̱á̱ uuntri̱ átinniasha tura ashí Ejiptunam akupin ajastinniasha Yusak apujtusuiti. 9Wats winia aparuí̱ wárik waketkirum ju̱ ujatruktarum ‘Jusé ame uchiram chichartamuk “Yus wíniaka ashí Ejiptu nuṉka uuntri̱ awajtúsuiti. Tuma asamtai wárik winí̱ iiraiti” turammayi. 10Ashí uchirtiuk tiraṉkri̱ntiuk ashí taṉkurtiuk ashí ni takakna nuja̱i̱ mash yarumak winití, Kusen nuṉkanam winí̱ tíjiu̱ch pujusat. 11Warí tíjiu̱ch pujakuiṉkia tsukái wáitsara̱i̱ṉ tusan ashí niji̱a̱i̱ írutra ainia nunasha yurumkanka súsartatjai. Warí tuke seṉku uwí tsukaja̱i̱ wáitniaschattuak túramui’ titiarum. 12Tura chichaajna ju̱ka wíkitjiai Jusé. Atumsha tura winia yatsur Piṉjiamíncha paant nekararme. 13Wi Ejiptu nuṉkan akupniúri̱ ajasmásha tura átum ashí ju̱i̱ wainkiarum nusha winia apar ujaktarum. Wats wárik werum winia apar uturtitiarum” tímiayi Jusé.

14Tura Piṉjiamíncha Juseja̱i̱ miniaknaikiar mái̱ metek e̱a̱nairarmiayi. 15Nuya̱ṉka Jusé ashí ni yachi̱n ti shiir enentáimtuiniak útkamaikia miniakak yapiniam mukunáwarmiayi. Nui̱ṉkia ni yachi̱sha Jusenka arantutsuk áujsarmiayi.

16Parauṉka je̱e̱ncha Jusé yachi̱ káunkarai tama tí warik antuukamiayi. Nuna antuk Parauṉsha ashí ni yaintri̱ armia nuja̱i̱ warasarmiayi. 17Tura Parauṉ Jusen chicharuk “Ame yatsumsha umpururmin yurumak áentsrarum Kanaannum waketratarum tiartá. 18Tura ame apancha ní shuari̱ntiuk itiarti. Ejiptunam péṉker nuṉka nui̱ yurumáwarat tusan wi súsartatjai. 19Tura tájame kareta Ejiptunmaya̱ jukirum atumí nuwe̱sha uchirí̱sha tura apasha itiatárum tusam akupkarta. 20Nuyá̱ takakainia núnaka enentáimtukiara̱i̱ṉ. Warí Ejiptunam tí peṉker kuítriniamnia ainia nuka atumnia áiniawai” tímiayi Parauṉ.

21Tura Israera uchirí̱sha Parauṉ timia nuna túrawarmiayi. Jusesha Parauṉ timia nútiksaṉ karetancha tura jintiá yurumátniuncha súsarmiayi. 22Núnisaṉ entsatái̱n yamarman súsarmiayi. Antsu Piṉjiamínnaka traisiantu kuítniasha tura seṉku pushincha suramiayi. 23Tura Ejiptunam tí peṉker irunmia nuna tias umpurun áentsak nuyá̱ chíkich tias umpuruncha yurumkan áentsak winia apar jintiá winis yurumáti tusa páṉnasha tura chíkich yurumkancha akuptúkmiayi. 24Nuya̱ṉka Jusesha yachi̱ wénakui chicharainiak “Jintiá wésarum kajernaikirum weerap” tinia akupkarmiayi. 25Tura Ejiptunmaya̱ jíinkiar Kanaannum ni aparí̱ Jakupai̱ jeawarmiayi. 26Tura jear aparí̱n ujainiak “Juseka iwiaakui. Ashí Ejiptu nuṉkanam akupniuiti” tiármiayi. Tutai Jakupka nekaspashit tusa jaka enentáimiá ajamiayi. 27Túrasha Jusé chichaman akatmampramun mash ujakam tura ni junaktin kareta akuprámun wainiak kakaram waari enentáimpramiayi. 28Tura chichaak “Ayu, máakete. Winia uchir Jusé tuke iwiaakui. Iwiaakajna ju̱i̱ṉkia uchirun iyutjai” tímiayi.

Currently Selected:

Naṉ. 45: jiv

Highlight

Copy

Compare