Jiin. 40

Yus Shiir Awajtai̱ Je̱a̱ je̱a̱mma

1Nuyá̱ Uunt Yus Muisaisan chicharuk 2“Emka nantu tsawantri̱ yama juármanum Yus Shiir Awajtai̱ Je̱a̱ je̱a̱mtarum” tímiayi.

3-5 Yus Aentsja̱i̱ Chícham Najanamu Eṉketai̱ nuyá̱ ekentsa yurumtai̱, shirikip ekentai̱, kuṉkuin áestutai̱ tura wá̱i̱ti̱a̱i̱nmaya̱ tarach nui̱ ikiusarta.

6-8 Yus áestutai̱ takamtsuk súsatniua nú áestutai̱ ukunmaani̱ apujsata tura nijiamatai̱ Yus Shiir Awajtai̱ Je̱a̱ eem apujsata tura náṉkatkamunmaṉka á̱a̱ri̱n tarach ashí téntatkamunam wá̱i̱ti̱a̱i̱ri̱ya̱ nui̱ apujsata.

9-11 Nuyá̱ ukattai̱ asuiti achikta. Túram Yus Shiir Awajtai̱ Je̱a̱ tura nui̱ ashí írunna nu ukatkarta. Núnismek Yus áestakur takakmatai̱ ainia nu tura nijiamatai̱sha ukatkata.

12-15 Nuyá̱ Yus Shiir Awajtai̱ Je̱a̱ nuna wá̱i̱ti̱a̱i̱ri̱n Araun ni uchirí̱ji̱a̱i̱ itiantarta túram entsaja̱i̱ nijiararta. Tura Yusan shiir awajsataj tusa entsatai̱ pushí Araun áentsrata. Nuyá̱ uchirí̱sha núnismek túrawarta. Tú turunawar ukunmasha iniaṉnatsuk Yúsnan pujurin ártatui.

16Uunt Yus Muisaisan timia nuja̱i̱ métek umikiarmiayi. 17Kame jimiará uwí jeamunam,#40:17 Jimiará uwitin Ejiptunmaya̱ jíinkiarman tawai emka nantu juármanun tsawant chikichkitin Yus Shiir Awajtai̱ Je̱a̱ je̱a̱mar umikiarmiayi. 18Tura Muisais Yus Shiir Awajtai̱ Je̱a̱ je̱a̱muk pauri̱ ekentratniuri̱n apujtur nuyá̱ numi nakarmáncha winiantar tura nui̱ pauri̱ ekenar awajaimiayi. 19Nuya̱ṉka Uunt Yus Muisaisan jintintramia ímiatrusaṉ je̱a̱ ukurmanum nuapen ayapá̱r nukukmiayi.

20Nuna tura Muisais akupkámu chicham kayanam áarmauya nuna Yúsna Eṉketainiam eṉkesmiayi. Nuyá̱ Eṉketai̱ yanakar júkitniuri̱ncha wearak tura etektutai̱ri̱n Tunaan Akikmatrukmatai Tsaṉkurnartai̱ etektukmiayi. 21Núnisaṉ Uunt Yus Muisaisan timia ímiatrusaṉ nu Eṉketai̱sha Yus Shiir Awajtai̱ Je̱e̱n awayá̱ init apujas ajapén tesamunam tarachin ejamiayi. 22Nuyá̱ paṉ awa̱tai̱ncha Yus Shiir Awajtai̱ Je̱e̱n arakaani̱ tarach ajamunam á̱a̱wini̱ ayaam apujsamiayi. 23Tura Uunt Yus Muisaisan túrata timia ímiatrusaṉ Yus súamu páṉkan pekak nui̱ Yus íimmianum awa̱rmiayi. 24Yus Shiir Awajtai̱ Je̱e̱n paṉ awa̱tai pujumia nui̱, nuṉkaani̱ naka ekentrar ekemátaincha apujsamiayi. 25Tura Yus Muisaisan túrata timia nútiksaṉ Uunt Yus íimmianum ekemátaincha ekemármiayi. 26Núnisaṉ kuṉkuin áestutai̱ kúriji̱a̱i̱ najanamun tarach ejamunam naka Yus Shiir Awajtai̱ Je̱e̱n apujsamiayi. 27Nui̱ Uunt Yus Muisaisan timia nútiksaṉ kuṉkuinian áestuamiayi. 28Núnisaṉ Yus Shiir Awajtai̱ Je̱a̱ wá̱i̱ti̱a̱i̱ri̱n tarachin ajamiayi. 29Nuya̱ṉka Yus timia ímiatrusaṉ, Uunt Yus Shiir Awajtai̱ Je̱a̱ wá̱i̱ti̱a̱i̱ri̱n taṉku maar áestutai̱n apujas, taṉkun maa takamtsuk aestua nuyá̱ araka peṉkeri̱ncha áestuamiayi.

30Yus Shiir Awajtai̱ Je̱a̱ja̱i̱ taṉku maar áestutai̱ ajapén nijiamatai̱n apujas entsan yarakmiayi. 31Nui̱ Muisaissha tura Arauncha núnisaṉ ni uchirí̱sha ikijmiar nawe̱ncha nijiarmiayi. 32Uunt Yus Muisaisan jintintramia nuja̱i̱ métek Yus Shiir Awajtai̱ Je̱e̱n wainiak núnisaṉ taṉku maar áestutai̱niam weanainiaksha nijiamarmiayi.

33Muisais Yus Shiir Awajtai̱ Je̱e̱n wenui̱ téntak wá̱i̱ti̱a̱i̱ri̱nkia tarachi̱n ajá ni takatri̱nkia mash amukmiayi.

Yus Shiir Awajtai̱ Je̱e̱n yuraṉkim kauntramu

34Nuiṉkia Yus Shiir Awajtai̱ Je̱e̱n yuraṉkim káunar amuamiayi. Túruna initkia Uunt Yusa tsáapnintri̱ piákmiayi. 35Kame yuraṉmisha Yus Shiir Awajtai̱ Je̱e̱n amúa Uunt Yusa tsáapnintri̱ piákmatai Muisaiska waya̱tniun tujintkiamiayi.

36Núnisaṉ Yus Shiir Awajtai̱ Jé̱e̱nmaya̱ yuraṉkim urutái takuni̱ wétata nui̱ṉkia Israer shuarsha ashiniarmiayi. 37Tura yuraṉkim takunchakuiṉkia takuni̱ wéakui wetái tusar naka wéarmiayi. 38Kame wekasarmia tímianai Uunt Yusa yuraṉmiri̱ṉkia tsawai̱kia Yus Shiir Awajtai̱ Je̱e̱ṉ amúa aa wémiayi. Tura ashí Israer shuarnumia̱ṉka kashi keemia núnaka paant wáinkiarmiayi.

Currently Selected:

Jiin. 40: jiv

Highlight

Copy

Compare