Tan. 4
4
Napukutunusúr ataksháa mesekrampramu
1Wi akupin Napukutunusúr ujaajrumna nu nekaatarum. Ashí aentstiram núnisaṉ mátsatkamu uunt nuṉkanmaya̱tirmesha tura chíkich chíkich chichamtin árumna nútirmesha shiir aṉkant matsamsatarum tajai. 2Kame Ashí Naṉkamantu Yus winia aents túrachminian tura nekaachminian iniaktursama nuna ujaktinian wakerajrume.
3¡Warí, Niṉkia aents nekaachminia nu túramuri̱sha
tura iniakmamuri̱sha ti uunt tura ti kakaram áiniawai!
Nuyá̱ Ni akupeamuri̱sha yáunchusha tura yamaisha akupniuiti.
Nuyá̱ ukunam aents pujuartatna ímianaisha tuke Niṉki akupkáttawai.
4Wi Napukutunusúr winia je̱a̱r timiá shiir akuptáirui̱ pujumjai. 5Nuya̱ṉka winia peakruí̱ kanú tepesan mesekranam aya awaktúkmai. Tura wáinmiaj nusha winia enentáimtai̱rui̱ peṉké yajauch awajtúsmai. 6Nuna túrunan Papirúnianmaya̱ ashí nekamin ainia nuna mesekran ujatkarat tusan untsukarmajai. 7Nuya̱ṉka uwishniusha, yaaja̱i̱ nekamniusha, nekamin Kartíu tura jaká untsuusha káunkarmai. Túramtai wi mesekrampramaj nuna ashí ujakármajai. Túramaitiat mesekran nekaacharmai. 8Túmainiai̱ tunaarincha Yusa Wakaní̱ pimiutkamuya̱ nu Taniar chíkich náari̱nkia winia yusur Pirtisasár anaikiamu tarutmiai. Tura wi mesekrampramun ashí ujakmajai. 9Yamaikia Pirtisasárá, ashí neka ainia nuna úuntri̱nme tura tunaarincha Yusa Wakaní̱ pimiutkamuitmena nuna nékajai. Tuma asam nekaachminia nusha paant awajniuitme. Wi mesekranam wáiniaj nu warinia nakumea nu paant ujatkata. 10Winia peakruí̱ kanú tepesan wáinmiaj nusha ju̱i̱ti. Ju̱ nuṉka náṉkatkamu ajapéri̱n numi uunt ti yakí̱ tsakaru wajan wáinmiajai.
11Nu numisha tsakaki̱ wéak tí kampuram ajasmai.
Tura tsakari̱sha nayaimpiniam jeamai.
Tuma asa ashí nuṉka náṉkatramunmaya̱ iismasha wainniamai.
12Nu numi nuke̱sha shíirmach tura tí nukap nerekuyi.
Nuya̱nak ashí yurumátin armai.
Ashí yajasma kampunniunmaya̱sha nu numi mikintrari̱n ejamiarmai.
Núnisaṉ chiṉkisha ni kanawe̱n tuke matsamniuyi.
Ashí iwiaaku ainia nusha nuya̱nak yurumiarmai.
13Kame winia peakruí̱ kanú tepesan aya aneachma nayaimpinmaya̱ wáinin tunaarincha nu táarun wáinmiajai. 14Nisha kakantar chichaak
“Ju̱ numikia ajaktarum.
Túrarum kanawe̱ tsupirarum nuke̱sha utsaṉkrum nere̱nka tsakiṉmaktarum.
Túrunamtai yajasma nui̱ weatáiniasha tura chiṉkisha kanawe̱n eketainia tsakiṉmakarti.
15Antsu ajiṉkiári̱ṉkia kaṉkaptuk jiru chapikji̱a̱i̱ kaki jiṉkiarum sá̱a̱knium jiṉkiatarum.
Tura saana ukattí núnisaṉ yajasmaja̱i̱ métek sa̱a̱kin yuatí.
16Núnisaṉ aents enentáimtai̱n yapaji̱á
yajasma enentáimtai̱n enentáimti.
Túruna siati uwí pujusti.
17Wats, Ashí Naṉkamantu Yusa nuke aentsu akupeamuri̱i̱n nekas akupniuiti.
Tuma asamtai ni wakera nuna anainiuiti.
Núnisaṉ ashí aentsnumia̱ péejchachia nuna akupin awajeawai.
Tuma asamtai asutniana nuka nayaimpinmaya̱ wáinin akupkarma
nuyá̱ tunaarincha ainia nuka etserkarma nuna
ashí aents nekaawarat tusa uminkiattawai” tímiayi.
Mesekran Taniar paant awajma
18Wi úunt akupin Napukutunusúr chichaakun “Ju̱i̱ti Pirtisasárá wi mesekrampramun ujakjamna nu, chíkich nekauka peṉké ujatkacharai. Tuma asamtai yamaikia ame tunaarincha Yusa Wakaní̱ pimiutkamu asam wi mesekranam wainkiamu warinia nakumea nu mash ujatkata” tímiayi.
19Nuyá̱ Taniar chíkich naari̱ Pirtisasár ti sapijmiak jaka enentáimiá pujumiayi. Túmakui̱ úunt akupin chicharuk “Pirtisasárá mesekrampramun ujakjamna nuja̱i̱ tí kuntuts enentáimsaip” takui̱ Pirtisasár aya̱k “Uuntru, ju̱ mesekrampramusha áminkia túrutmatsuk antsu nemasrumin túrunaṉka maak ainti. 20Kame nu numi tsakaki̱ wéak tí kampuram ajasmai. Tura tsakari̱sha nayaimpiniam jeamai. Tuma asamtai ashí nuṉka náṉkatramunmaya̱sha wainiainia íimiame. 21Tura numi nuke̱sha shíirmach tura tí nukap nerekuyi. Nuya̱nak ashí yurumátin armai. Ashí yajasma kampunniunmaya̱sha nu numi mikintrari̱n ejamiarmai. Núnisaṉ chiṉkisha ni kanawe̱n tuke matsamniuyi. Ashí iwiaaku ainia nusha nuya̱nak yurumáinia wáinmiame. 22Uunt akupniu, nekas ti émkaitme tura kakaram ajasuitmena nuka ameketme. Nuyá̱ ame akupeamurmesha naṉkamantu ajasam nayaimpiniam jeatak ajasuíti. Tura ashí nuṉkanmaya̱sha akupniuitme. 23Kame úunt akupniu peakrumin kanú tepesam aya aneachma nayaimpinmaya̱ wáinin tunaarincha taaru wáinmiame. Nisha kakantar chichaak ‘Ju̱ numikia ajaktarum. Antsu ajiṉkiári̱ṉkia kaṉkaptuk jirú chapikji̱a̱i̱ kaki jiṉkiarum sá̱a̱knium jiṉkiatarum. Tura saana ukattí núnisaṉ waakaja̱i̱ métek sa̱a̱kin yuatí. Túruna siati uwí pujusti’ tau wainkiamame. 24Uunt akupniu, nu mesekrampramuka Ashí Naṉkamantu Yus asutiámatta nuna paant ujatmawai. 25Tura áminkia aentsnumia̱ṉka ji̱i̱ki̱ ajunmiartatui. Túrutmawarmatai kampunniunmaya̱ yajasmaja̱i̱ tsaniṉkiam pujuttame. Túmakum waakaja̱i̱ métek sa̱a̱k yútatme. Núnisaṉ saana iniji̱á̱tmattawai. Ashí Naṉkamantu Yus akupin ainia nuna Úunt Akupniuri̱nti tura yana wakera nuna súwiti tu enentáimtumam nuní̱ túrunam siati uwí pujustatme. 26Nuyá̱ numi ajiṉkiári̱ṉkia kaṉkaptuk iniaisatarum tiarma nuka nayaimpinmaya̱ Yusak ashí akupin ainia nuna úunt akupniuri̱nti tu enentáimtusakmin aṉkant awajtámsamtai ataksha akupin ajastatmena nuna paant ujatmawai. 27Kame nu asamtai akupniu, winia chichamur antukam métek péṉker túrakum nu tunaaka tsaṉkurnartatme. Núnisaṉ ame yajauch túrutairmesha iniaisam kuítri̱ncha ainia nu waitnentram yáiniakum péṉker pujuschatameash” tímiayi Taniar.
Napukutunusúr yajasma nuní̱ iira ajasma
28Kame akupin Napukutunusúr mesekrampramuka níni̱ṉ tímiatrusaṉ uminkiamiayi. 29Nuyá̱ chikichik uwí naṉkaamasu ai̱ akupniúsha Papirúnianam ni akuptai̱ je̱e̱ yantamén kuku̱j írunun ii wekas 30chichaak “Ju̱ka wi naṉkamantu enentáimtair páantin atí tusan winia kakarmarja̱i̱ṉ uunt Papirúnian akupin pujustinian je̱a̱mkamiaj ¿núchakait?” tímiayi.
31Kame akupniúka chicháa wajai̱ṉ nayaimpinmaya̱ chicharuk “Akupin Napukutunusúrá ju̱ antukta. Yamaikia ámeka akupniuchuitme. 32Tura aentsnumia̱sha ji̱i̱ki̱ ajunmiartatui. Túrutmawarmatai kampunniunmaya̱ yajasmaja̱i̱ tsaniṉkiam pujuttame. Túmakum waakaja̱i̱ métek sa̱a̱k yútatme. Ashí Naṉkamantu Yus akupin ainia nuna Úunt Akupniuri̱nti tura yana wakera nuna súwiti tu enentáimtumam siati uwí pujustatme” tímiayi. 33Tura akupin Napukutunusúran túrunattame timia nuka nú chichamaik uminkiamiayi. Nu asamtai aentsnumia̱ṉka ji̱i̱ki̱ aju̱i̱niarmiayi. Kame intiashí̱sha churuwia ure̱ya ánin jiintiurmiayi tura nanchikí̱nkia nanamtinian nanchikí̱ya núnin ajasmiayi. Tura waakaja̱i̱ métek sa̱a̱kin yúmiayi núnisaṉ saana iniji̱á̱i̱miayi.
Napukutunusúr ataksha aentsua núnikma
34Tura tsawant naṉkaamarmatai wi Napukutunusúr nayaimpinmaani̱ nakaasan iimiai̱ ataksha aentsua núnis enentáimtikrurmai. Túrutamtai Ashí Naṉkamantu Yusan tuke pujú asamtai shiir awajeakun tura naṉkamantu enentáimtakun yumiṉsamjai.
Warí, Ni akupeamuri̱sha peṉké amukashtiniaiti.
Tura ukunam aents matsamiartatna nui̱sha tuke átiniaiti.
35Ju̱ nuṉkanam aents matsatainia nusha Niji̱a̱i̱ íismaka peṉké ántar áiniawai.
Nayaimpinmasha ashí kakaram ainia nuja̱i̱
tura nuṉkanmasha ashí aentsja̱i̱sha Ni wakeramuja̱i̱ métek túriniaiti.
Nuna túrakuisha yaaksha suritkiachminiaiti
núnisaṉ ¿urukamtai áitkiam? nunaksha tíchamniaiti.
36Tura nu chichamaik aentsua núnis ataksha enentáimtikrurmatai winia páantniursha tura winia péṉkerusha yáunchuyajna núnisaṉ ajasármatai winia akupeamursha tímiatrusaṉ ajasmai. Nuya̱ṉka anairamu tura páantin armia nusha e̱a̱tkarmai. Túrutawar yaunchu akupniúyajna núnisaṉ awajtúsarmatai yáunchuyajna nuna naṉkaamas ajasmajai. 37Yamaikia wi Napukutunusúr, nayaimpinmaya̱ Úunt Akupniun shiir awajeakun tura naṉkamantu enentáimtakun yúmiṉkiajai. Warí, Ni najankamuri̱sha timiá nekas péṉker ásarmatai Ni túrutairi̱sha nekas naka áiniawai. Tura naṉkamantu enentáimtumainia nunasha Niṉki péejchach awajsámniaiti tájarme. Tu chichakmiayi Napukutunusúr.
Currently Selected:
Tan. 4: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
