Tan. 2
2
Úunt akupin Napukutunusúr mesekramma
1Kame Napukutunusúr úunt akupin ajas jimiará uwí pujus mesekrampramiayi. Tura wáurkamnia nekapeak kánichmiayi. 2Túruna úunt akupin ni mesekrampramun nekartuawarat tusa neka armia nuna tura yáaja̱i̱ṉᵏⁱ nekamin armia nunasha nuyá̱ uwishniuncha tura nekamin Kartíuncha mash untsukarmiayi. Túram úunt akupin pujamunam táarmiayi. 3Tura úunt akupin chichaak “Mesekrampramaj nuna nekaataj tusan wáurkamnia ajá pujajai” tímiayi. 4Nu tutai nekamin Kartíu Aram chichamja̱i̱ akupniun chicharainiak “Úunt akupniu tuke arantúkma atá. Tura ame takartámin mesekrampramuram ujakárta, nu antukar wariṉ tu mesekrampram nu paant ujaktatji” tiármiayi.
5Nuna tuíniakui úunt akupin nekamin Kartíu chicharenak “Winia mesekrampramur nekas péṉker nekaarum ujateachkurmeka átumka asantrattarme. Tura atumí je̱e̱sha emesnaktatui. 6Antsu wi mesekrampramua nu péṉker nekaarum ujatkákrumni̱ṉkia ántran súsatniuncha tura waitnentran núnisnak wakerarmena nunasha amastatjarme túran páantin awajsattajrume. Tuma asamtai wi mesekrampramusha tura warinia nakumea nu paant ujatkatarum” tímiayi. 7Nu tutai nekamin armia nu ataksha aimiainiak “Ame takartámin ame mesekrampramuram ujakárta. Nu antukar wariṉ tu mesekrampram nu paant ujaktatji” tiármiayi. 8Nuna tuíniakui úunt akupin Napukutunusúr chicharainiak “Nekas wi atumín tájarmena nuíchuk wárik ujattsuk setukar wéarum. 9Kame wi mesekrampramur paant ujatchakrumka átum asutniátniuka iwiaramuiti. Antsu waitruarum ti yajauchia nu ujatkatai tusarum atumí enentái̱ji̱a̱i̱ṉ itiur títiatjia tu enentáimkiuram wari ujattsurme. Yamaikia mesekrampramur ujatkatarum. Túrawakrumni̱ṉkia wi mesekrampramurun nekas nekartuarume títiatjarme” tímiayi.
10Nuya̱ṉka nekamin Kartíu úunt akupniun chicharainiak “Ju̱ nuṉka pujuinia nuka úunt akupniunka yaaksha ujakchamniaiti. Warí, timiá ju̱ itiurchatnaka úunt akupniuksha tura chíkich úuntkesha neka áiniana nuna tura yaa unuimiátkaruncha núnisaṉ Kartíu aentsnasha yáunchusha peṉké anintruscharuiti. 11Warí, úunt akupniu, ame seammena nú nekaatniuka peṉké itiurchataiti. Warí, úunt akupin tana nuna paant awajtúsminkia peṉké atsawai antsu yúskechuk nekaamniait. Antsu nu yuska áentsja̱i̱ṉkia pujatsui” tiármiayi. 12Nu tutai úunt akupin ti kajek Papirúnianmaya̱ nekamin pujuinia nuka mash mátarum tusa akupkámiayi. 13Nuya̱ṉka neka ainia nuka ashí mantamnawarti tusa etserarmiayi. Tura Taniarnasha ni írutramurtiuk maatai tusar e̱a̱karmiayi.
Uunt Yus Taniaran ujaamu
14Tuma asamtai Taniarsha Papirúnianmaya̱ neka ainia nu maatá tusar akupniu suntari̱ uuntri̱ Ariuk akupkámuya̱ nuna péṉker enentáimtur áujsamiayi. 15Tura akupniu suntari̱ úuntri̱n Ariukan anintrak “¿Warinma nekamin ainia nu mantamnawartin chichamnasha imiá wáriksha najana?” takui̱ Ariuk nu itiurchat chichaman Taniaran ujakmiayi. 16Nu ujakam Taniar úunt akupniun werí tsawant áṉturata tusa seamiayi. Ame mesekrampramu warinia nakumea nuna ujaktájme titiaj tusa werimiayi.
17Nuna tura Taniar ni je̱e̱n waketki̱ itiurchat chicham túrunamun ni amikri̱n Ananíasan, Misaíran, Asaríasan mash ujakmiayi.
18Kame Papirúnianmaya̱ nekamin ainia nuja̱i̱ métek mantamnawa̱i̱j tusa úunt akupin mesekrampramun Yus paant ujatmáktai tusar ni amikrí̱ji̱a̱i̱ iruntrar nayaimpinmaya̱ Yusa waitnenkartutairi̱n seawarmiayi. 19Tura kashi ímiaja̱i̱k iwiaintiuk nekaachminiuya nuna Taniaran paant nekamtikiamiayi. Túramu asa Taniarsha nayaimpinmaya̱ Yusan shiir awajsámiayi. 20Nui̱ Taniar chichaak
“Yusa náari̱ṉkia juármanumsha náṉkatkachu tura amúamunmasha náṉkatkachu tuke shiir awajsamu atí.
Warí, nekatai̱sha tura kaka̱a̱tai̱sha níniuchuk ainia.
21Niṉki uwincha tura tsawantnasha yapaji̱átsuk.
Tura úunt akupniu anaikiasha Niṉki yapajchakait.
Nékanka nekatai̱n súchakait
nuyá̱ enentáimniunka unuiniachukait.
22Peṉké nekaachmin tura u̱kma ainia nunasha Niṉki paant awajtsuk.
Núnisaṉ kiritniunam ana nunasha nékatsuk
tura tsáapnincha Níni̱ṉ átsuk.
23Maa, winia uuntru Yusri̱ya neka tura kakaram awajtúsu asakmin
yumiṉsan ti shiir awajeajme.
Tura yamaikia ii seammia winia nekamtikruame.
Warí, úunt akupin mesekrampramusha iin jintinkiartuachumek” tímiayi.
Akupin mesekrampramun Taniar ujaamu
24Nu naṉkaamasmatai úunt akupin ashí neka ainia nu Papirúnianmaya̱ mátarum tusa Ariukan akupkámia nuna werí Taniar chicharuk “Papirúnianmaya̱ neka ainia nuka máwaraip. Antsu úunt akupniúnam winia juruktia tura ni mesekrampramunka wi paant ujaktatjai” tímiayi. 25Nui̱ṉkia nu chichamtaik Ariuk úunt akupin pujamunam Taniaran ejé chicharuk “Jutanmaya̱ achirar ikiankamua nuyá̱ ame mesekrampramu ujatmáktinian wainkian itiajai” tímiayi. 26Nuiṉkia úunt akupin Taniaran Pirtisasár anaikiamia nuna chicharuk “¿Wi mesekranam wáinmiaj nusha wariṉkit? ¿Ame nu paant ujatkámniakaitiam?” tímiayi. 27Nu tutai Taniarsha úunt akupniun chicharuk “Uwishniusha nékaasha tura nekamniusha nuyá̱ yaa unuimiátka ainia nusha ame mesekrampramu nékainiatsna nuna ujatmákminkia peṉké atsawai. 28Antsu chikichik Yus nayaimpiniam pujana nuke nekaachminia nunasha paant awajniuiti. Tuma asa úunt akupin Napukutunusúrá, ukunam túrunattamna nuna paant iniakturmasai. Ame peakrumi tepesam mesekranam tura ímiaja̱i̱k wáinmiam nusha ju̱i̱ti. 29Úunt akupniu, ámeka peakrumin tepesam ukunam túrunattana nuna itiurak nekaawaintiaj tusam ti enentáimsame. Tura nekaachminian nekamtikniua nu ukunam túrunatta núnaka paant iniakturmasai. 30Tura wíniaka nú nekaachminian nékamtikruayi. Túrasha ashí aentsja̱i̱ naṉkaamas neka asamtainchu antsu ame mesekrampramu nékamtikiatniun tura ame enentáimmena nusha nekaak tusa winia nékamtikruayi” tímiayi.
31“Úunt akupniuá, aentsua núnis nakumkar uunt najanamu mesekranam ame waínmiame. Kame nu najanamuka ti úuntauyi nuyá̱ ni winchari̱sha naṉkamantuyi tura amiin naka wajamai núnisaṉ tí tsuumaiyi. 32Tura nú nakumkar najanamu muuke̱ṉka aya kúriji̱a̱i̱ṉ najanamu nuyá̱ netsepé̱ṉka tura kunturi̱sha kuít jiruja̱i̱ najanamu armai. Nuyá̱ wáke̱ṉka tura makui̱sha yaṉkú jiruja̱i̱ najanamuyi. 33Núnisaṉ ni kujapé̱ṉka jiruja̱i̱ nuyá̱ nawe̱sha jiruja̱i̱ṉ najaniatar nuwe̱ jiar iniarkámuja̱i̱ achimprar najanamuyi. 34Nu ii wajamin yaaksha urakchamaitiat kaya uranáak nakumka najanamu nawé̱ jiruja̱i̱ nuwe̱ iniarkar pachimprar najanamua nui̱ tukú tsai̱ tsai̱ awajsamai. 35Nuya̱ṉka jírusha nuwe̱ iniarkámusha yaṉkú jirusha kuitcha tura kurisha tsai̱ tsai̱niá ajasár trikiu saepe̱ esatái̱ urukawa núnis mash ajasármai. Nase umpuí yaruakma asa ni wajasmaka atakka peṉké wainniakchamai. Tura kaya tukuma nuka naint ti uunt ajas ashí nuṉkan anetkámai.
36Kame ame mesekrampramuka núiti tura yamaikia warinia nakumea nu akupniu ujaktatji. 37Úunt akupniu, áminkia Yusak chíkich nuṉkanmaya̱ úunt akupin ainia nunasha iniaṉkas páantin naṉkamaku kakaram ajastinian tsaṉkatramkaiti. 38Túrutma asa ashí nuṉkanam aents pujuinia nu tura ashí yajasma pujuinia nusha nuyá̱ nanamtin pujuinia nunasha ámin suramsaiti. Nuna tura ámin mash akupkarai tusa íkturmasuiti. Tura nu muuke̱ kuri ana nuka ámetme. 39Tura amiya̱ chíkich akupeamu weattsa átatui. Nuyá̱ yaṉkú jírua nuka menaint akupeamua núiti. Nuka ashí nuṉkanam akupkáttawai. 40Antsu kuátrunam akupea nuka ti kakaram namincha jírua núnis asa chíkich úunt akupin ártatna núnaka katsuram jiru miniarchinkia nekeṉ ju̱yu̱mna núnis ti kakaram asa chíkich úunt akupin ainia núnaka tsai̱ tsai̱ awajea nútikiattawai. 41Nuyá̱ nawe̱nam tura tsara nawe̱nam nuwe̱ jiámuja̱i̱ pachimprar najanamu nuka akupkámu kanakártinian nakumeawai. Túrasha namincha jírua nuka pachimpramu asa májattaku akupkáttawai. 42Tura tsara nawe̱ nuwe̱ jiámuja̱i̱ ikiaar namincha jiruja̱i̱ najanamu asa akupeamuri̱sha kakarmaitiat imiancha akuptiatui. 43Nuyá̱ namincha jíruja̱i̱ nuwe̱ ikiaar najanamu wáinmiamna nuka nuamtak aentsuk chichama najanawar nawamnaikiar pachiniairartatui. Túrasha nuwe̱ jíruja̱i̱ pachimpra najanamniakait núnis asa peṉké pachimnairachartatui.
44Tura nu úunt akupin pujuartatna nu tsawantin nayaimpinmaya̱ Yus chíkich akupeamu peṉké nupetkachminian apujsattawai. Antsu nuka ashí akupin ártatna núnaka tsai̱ tsai̱ awajsatniua núnis mash amú amus aya niṉki tuke akupin átatui. 45Kame naintia kaya yaaksha urakchamaitiat kaya uranáak namincha jirun tura yaṉkú jiru nuyá̱ kuítniasha kurincha tsai̱ tsai̱ awajsamu wainkiamamna. Núnaka, úunt akupniu, ukunam túrunatta nuna Yus imiá uunta nu ámin nekamtikramayi. Nuyá̱ nu mesekrasha ti nekasaiti. Tura ujakjamna tímiatrusaṉ uminkiattawai” tímiayi.
Napukutunusúr Taniaran anaiyamu
46Nuya̱ṉka úunt akupin Napukutunusúrsha Taniaran tikishmátar tsuntsumpruá shiir enentáimtusmiayi. Tura súsatniua nusha núnisaṉ yus sutai̱ armia nú kuṉkuincha Taniar susatarum tusa akupkámiayi. 47Nuna tura úunt akupin Taniaran chicharuk “Nekas ame Yúsrumka ashí ántar yus ainia nuna Yúsri̱nti tura ashí úunt akupin ainia nuna Úunt Akupniuri̱nti. Nekaachminia nuna Ni nekamtikniuiti. Warí, nekaachminia nu ámeka paant awajsáme” tímiayi. 48Kame nuna tinia úunt akupniusha Taniaran shiir enentáimtus ashí naṉkamantu awajás tí shiira nuna ántar súsatniun núkap suramiayi. Tura Papirúnia nuṉka uuntri̱ awajás núnisaṉ Papirúnianmaya̱ neka armia nuna uuntri̱ awajsámiayi. 49Nu túram Taniar úunt akupniun seamtai Shatraaknasha Mishaaknasha tura Awitníkiuncha Papirúnia nuṉka wainniuri̱ ártí tusa úunt akupin apujsarmiayi. Tura Taniarka akupin takatainiam pujusmiayi.
©2009 Avant Ministries in cooperation with Wycliffe Bible Translators, Inc. All rights reserved.