Tur. 4

Pítruncha Juáṉnasha kajerkámu

1-2Pítrusha Juaṉja̱i̱ Yusa Chichame̱n aentsun jintintiáiniak pujuarmiayi. Jesus nantakin asamtai aentssha nantaktin áiniawai, tiármiayi. Tura chichaak pujuiniai̱ Yúsnan pujurniu uuntri̱ táarmiayi. Tura Yusa Uunt Je̱e̱n wainniu úuntri̱sha Satuséu aentssha táarmiayi. Taar Pítruncha Juáṉnasha kajerkarmiayi, nisha Jesus nantakmia chichaman jintintinia asamtai. 3Yamaikia kí̱awai kashin iismí tusar achik sepunam eṉkea iniaisarmiayi. 4Tura Pítrun nuik anturkarmia nú aents untsurí Kristu nekasaiti tu enentáimtusar Yus shuar ajasármiayi. Ashí Yus shuar iruram ti untsurí ajasármiayi. Aya áishmaṉkak seṉku mir aents ármiayi.

5Kashin tsawa̱rmatai Israer shuara akupniúri̱, ni úuntri̱sha tura ni jintinniuri̱sha Jerusaréṉnum iruntrarmiayi. 6Nui̱sha Anassha, Yúsnan pujurniu uuntri̱ anaikiamu amia nu tura Kaipiassha, Juaṉsha, Arejántrusha tura ashí Yúsnan pujurniu uuntri̱ shuari̱sha iruntrarmiayi. 7Iruntrar Pítruncha Juáṉnasha utitiarum tusar akupkarmiayi. Tura itiarmatai ajapén awajsarmiayi. Tura aniasarmiayi “Kame ¿yana kakarmari̱ji̱a̱i̱, yana chichame̱ja̱i̱ túrarum?” tiármiayi. 8Tutai Pítiur ni enentái̱n Yusa Wakaní̱ pimiutkamu asa chicharainiak “Akupniútiram, tura úuntirmesha antuktarum. 9Jú̱ aishmaṉ nuik shutuap amia nu péṉker ajasmari̱ anintrarme. Kame itiurak péṉker ajasuit tátsurmek. 10Urukamtia ú̱ktataj. Anintrakrumin Israernumia̱ shuar ashí nekaawarat tusar iisha paant títiatji. Ju̱ aishmaṉ Jesukrístu kakarmari̱ji̱a̱i̱ péṉker ajasuíti. Nasarétnumia̱ Jesukrístun, átum mámurmena nuna, tura Yus jakamunmaya̱ iniantkímiania nuna tajai. 11Nú Jesuska kaya áintsaṉkete. Atumsha je̱a̱mniutiram, nú kaya yajauchiti Jesus, tímiarme. Túrasha túramaitiataṉ Nisha je̱a̱ emka apujtuamua núnisaṉ ajasuíti, tímiayi.YKan. 118:22 12Tura chíkichja̱i̱ uwempratin peṉké atsawai. Ju̱ nuṉkanam ii chikicha naari̱ pachisar uwempratin atsaji. Jesuskete ii uwemtikrampratniun Yus suramsamiaj nu” tímiayi Pítiur.

13Pítrusha Juaṉsha náṉkamas shuara áintsaṉ ármiayi. Núkap unuimiárcharu ármiayi. Tura unuimiárchaitiat arantutsuk etseriarmiayi. Aentsu uuntri̱ núnaka nekaawar “Nékachuitiat, itiura sapijmiatskesha chichainia” tiármiayi. Tura ju̱sha Jesusa nemari̱n armia núiti tiar nekaawarmiayi. 14Nuya̱sha áishmaṉ péṉker ajasmia nu niji̱a̱i̱ nui̱ wajamiayi. Tuma asamtai nisha ai̱ wajakui̱ Israer shuara úuntri̱ṉkia péṉker ajaschaiti titiái tukamá tujintkiarmiayi. 15Tuma ásar iik nuamtak áujmatsatai tusar Pítrusha Juaṉsha shutuapsha a̱a̱ awemartai 16áujmatainiak “Ju̱ Pítrusha ju̱ Juaṉsha itiurkatjik. Ju̱ uunt túrunamun Jerusaréṉnum matsatainia nu ashí nékainiatsuk. Wáitiaiti títin tujintiaji. 17Tura ashí aents nekaawara̱i̱ṉ tusar yamaik jiaktai. ‘Ju̱ Jesusa naari̱ pachisrum peṉké jintintiawairap’ titiái” tiármiayi.

18Tura árusaṉ Pítruncha Juáṉnasha shutuapnasha ataksha untsukarmiayi. Tura chicharainiak “Jesusa naari̱ peṉké áujmatsairap. Tura Jesusa túramuri̱ peṉké jintintiáwarairap” tiármiayi. 19Tutai Pítiur Juaṉja̱i̱ áimkiarmiayi “Enentáimpratarum. ¿Yus warinia wakera? ¿Iikia Yus umirtsuk atumí chichame̱ṉ umirkatniukaitiajⁱ? 20Nekaatarum. Iisha íisjinia nu tura antukjinia nusha ii etsertsuk pujustin tujintiaji.” Tu áimkiarmiayi.

21-22Shutuap péṉker ajasmia nu kuaraintia uwí naṉkaamas takakuyayi. Ni péṉker ajasmari̱n aents nekaawar “ju̱ka aentsti túrachminiaitji” tusar Yusa náari̱n uunt awajsarmiayi. Tuma asamtai aentsu uuntri̱ Pítruncha Juaṉnasha asutiátai tukamá aentsun ashamainiak áyatik chicharkar iniaisarmiayi.

Yus shuar Yusa kakarmari̱ seamu

23Pítiur Juaṉja̱i̱ aṉkant ajasár ni írutramuri̱i̱n waketkiarmiayi. Tura jeawar Yúsnan pujurniu uuntri̱ tura aentsu úuntri̱sha nin tiarmia nuna mash etserkarmiayi. 24Nu ujakam antukar métekrak Yusan áujuk tiármiayi “Winia Uunt Yusru, Amesha nayaimpisha nuṉkasha najanaitme. Nayantsasha tura ju̱i̱ írunna nusha najanamiame, Neem. 9:6 tiármiayi. 25Tura Tawit ámin umirtamin amia nu ju̱ áamtikramiame

‘¿Urukamtaitsuk uunt nuṉka mátsatkamunmaya̱sha charaatum ajainia?

¿Tura urukamtai ashí nuṉkanmaya̱ aents antra nuna enentáimiainia?

26 Warí ashí nuṉkanmaya̱ úunt akupniusha iruntrar

tura peṉkeri̱sha métekrak iruntrar Uunt Yusan kajerkarmiayi.

Ni anaikiamuri̱n Krístun nútiksaṉ kajerkarmiayi.’ YKan. 2:1-2 27Tu áarmaiti Uuntá tura nekasaiti. Irutis Punsiu Piratuja̱i̱ jú̱ péprunam iruntrarmiayi. Nisha yajaya̱ shuarja̱i̱ tura Israernumia̱ shuaraim nui̱m iruntrarmiayi. Ame Uchirmin tunaarincha Jesusan Ame anaikiamiamna nuna kajerkarmiayi. 28Tura Ame enentáimji̱a̱i̱ iwiaramamna nuna tímiannak umikiarmiayi. 29Uuntá, kajertamainiaj iisiá. Iis, Áminiu asakrin áujmatramtsujik. Túmaitkiuisha ame chichamem ii ashamtsuk etserkatin ame kakarmaram amasta. 30Tura ame kakarmarmiji̱a̱i̱ jaasha tsuártin amasta. Ame Uchiram Jesus tunaarincha nuja̱i̱ ii aentsti túrachmin túratniusha amasta. Aents Yusa kakarmari̱n nekaawarat tusam túrata” tiármiayi.

31Tura Yusan tú aujas umikmatai nui̱ṉ irunar pujuiniai̱ṉ ú̱u̱rkamiayi. Túrunamtai ashí shuara enentái̱n Yusa Wakaní̱ pimiutkarmiayi. Túmaitkiui ashamtsuk Yusa Chichame̱n etserkarmiayi.

Wíniakete tíchamu

32Yus shuar ajasármia nu tí untsuritiat ashí chikichík enentáiniak enentáimainiak ni takaku armia nuna aya wíniakete tútsuk ju̱sha ashí iiniu áiniawai tiármiayi.

33Tura Jesusa akatrámuri̱sha Yus ti yaya̱mu ásar Yusa kakarmari̱ji̱a̱i̱ Uunt Jesusa nantakmiari̱n tuke etseras pujuarmiayi. 34Tura ashí Yus shuarka nuṉkan takakusha je̱a̱n takaku armia nusha núnaka surukar kuítian itiariármiayi. 35Tura itiaar Jesusa akatrámuri̱n suármiayi. Akatrámusha susam nisha atsumainia nuna suármiayi. Tuma asamtai shuar atsumaka peṉké atsuarmiayi. 36Chikichík shuar ni naari̱ Jusé nuṉkan takakuyayi. Jesusa akatrámuri̱sha Jusen chíkich náari̱n apujtusarmiayi, Pirnapín. Nu náari̱sha shiir enentáimtikiartin tawai. Tura Pirnapísha Riwí aentsuyayi. Tura ni akiiniamuri̱ nuṉke̱nka Chípriyayi. 37Nisha ni nuṉke̱n surukmiayi. Tura nu kuítian itiá Jesusa akatrámuri̱n súsarmiayi.

Currently Selected:

Tur. 4: jiv

Highlight

Copy

Compare