TOBITI 1
1
Ti ka no Tobiti
1Inê o Tobiti. Ikê nga ka na sihonga renia na ogaha iaku. O vaemaku ka no Tobiele. O viraku ka no Ananiele. O vaemana o viraku ka no Atuele. O vaemana o Atuele ka no Gabaele. O virana o Gabaele ka no Rapaele. Ma o vaemana o Rapaele ka no Raguele. Ngaia ka na apaparaha iana o Asiele, tenia na varo ninuni iana o Napatali.
2Matena o Salamanasere i maneraha i Asiria, ngaira ka henahurauê i pasiku i Tisibe. I Tisibe i Galilea hagarangia i Ketesi i na apanena i Napatali, kereso i Hasore ma ki pe hagatê tenia i Pogore.
3Suria na ogaha iaku hagenani inê kê râ suria na tara ni monariha ma ni otoha. Hagarako inê kê mahatangenigi na haga iaku tangara na goaku ma na tamaku na Siu ga matareha. Ga bani henahuraugami haku tanga i Nineve na hinua raha i Asiria.
4Matena gê karekare mênga ma kê gâga mênga i pasiku i Isiraele, na raraha hato iana o Napatali na êvariku ka nakara hura mareta tenia na ruma ni rotu i Jerusaleme ma tenira na maneraha na raraha iana o Tavite, tenia i Jerusaleme na hinua God i bani atea i berarogani na hinua hato iata na varo ninuni iana o Isiraele, hanana ngaira hato ka vogasia igê na Araha. I ngekana ki oga igê na ruma ni rotu iana God raramohaga hunia, na ruma hagahu iana. 5Tagenana mangara na raraha hato iana o Napatali, ga bani nakara hura mareta tenia i Jerusaleme, na ruma iaku nikâ ka râ i hinua i Tane igê na hungani i Galilea, hanana ga vogasia igê na nununa na golo na puruka mane o Bala, o Jerobeama na maneraha i Isiraele i bani hagêrasia i ngekana.
6Ma inê geteê ma i ruma iaku, inê kê arâ tare i Jerusaleme, hanana gê hagarahasigi igê na tangiani raha ni rotu, manga na ramata iana o Moise i bani bonasira na Isiraelita hato. Inê kê migirâ nga i Jerusaleme na nagoni na mu iaku, na kareta hagâkani na togoha iaku, na tangahuruta na puruka iaku, ma na varehuta na sipi gê tapurura haoru. I maana na bea ni vogasiha inê kê tagarenigi igê na votovoto ngegana tangara na mane ni vogasiha na raraha iana o Aroni. 7Inê kê tagarenigi na tangahuruta na koni, na vaini, na oile ni olive, na fiki, na guani na apinige ni ngauha getigi tangara na mane ni hagarahenga, ga tagara tanga God i Jerusaleme. I na ara ni harisi, nga noga ma na pita na harisi, matena i mamaro na mako, inê kê hagavuringenigi na ruata na tangahuruta na nahuninga iaku ma na haga kê vurigi re na marâ i Jerusaleme tanga na ngêra ni tangiani raha.
8Igê na ara ni oruta na harisi inê kê tagarenigi na oruta na tangahuruta tangara na gete na nâ, na kare banogo ma na mahuara ga oga i berarogata na kariaku, ma igami haku kami ngaua na ngêra ni tangiana raha. Inê kê kato vikana, suria na ramata iana o Moise, ka Tebora kenana o Ananiele o viraku ki hagesuriê, hanana vigê arâ suria. Matena o vaemaku ki me, inê kê vora re na kare banogo.
9Matena gê raha me, inê kê êragia ka Ana na raraha iana o Napatali manga inê. Igamirua kamuru apara na kare mane ma kamuru hêtana vi o Tobiasi. 10Hemuri ka henahurauê tanga i Asiria. Tahema inê kê oga i Nineve.
Matena igami kami oga i Nineve, na goaku hato ma na tamaku na Siu ka ngaugi tare na ngêra iata na ai ahuroto ga oga i ngekana, 11ma inê kê usi. 12Suria inê kê marupegi maninga na ramata iana God, 13tahema ngaia ki katoa na maneraha o Salamanasere ki hagahigasiê ma ki ateê, hanana gê vurivuri na marâ hato na maneraha i obanigi.
14Matena i tahitahi mênga na maneraha, inê kê arâ hagarako i na agua i Metia, hanana gê vurivuri igê na marâ tanga. Ta na tangiana, matena gê oga i Ragesi i Metia, inê kê panigi tani na anga ni haga iaku i ngekana i pasina o Gabaele veogana o Gabiria, ma kê vi tanga hanana vi nakanaka tangê. Igê na anga ngegana ka oga igê na 300 na kilo na maani na siliva. 15Matena i me o Salamanasere, o Saneheribe o karena ki maneraha urusia. Ki page arihu ma na tara i Metia ka hagamamagura hanana vige arâ igê. Tahema ki bara tangê vi ve râ i ngekana.
16Matena o Salamanasere ki maneraha mênga, inê kê tamanira na tamaku na Siu, matena ga obania na hetamaniha. 17Matena ga magê, inê kê meratongani na ngêra iaku. Matena ga rupaturi, inê kê meratongani na gahu iaku. Matena gê bâsia na gahuana ta na tamaku na Siu ga kasia hura i metara na para ni hinua, inê kê bagia maninga.
18Ta na tangiana o Saneheribe ki tamasi erasia na Araha God. God ki hagaitangia renia ma ki katoa o Saneheribe ki gavatenia i Juta. Matena i gava tanga i Metia, ngaia ki mangariaga ngavê ma ki nahu hunira rako na Isiraelita. Inê kê toregi râ pinihi na gahuata ma kê bagigi. Ma hemuri o Saneheribe ki bâbâ renigi na gahuata ma ki pe tarahugi.
19Hemuri ta na enoni i Nineve ki hagarongoa na maneraha, vi inê kanigê bagigi na gahuata na Isiraelita i nahu hunira. Inê kê kahu tahetara, vi na maneraha ki gariê, hanana vi nahuiê kê meme. Inê kê magu. Vikê inê kê gava ma kê ahi. 20Na mane ga bâsurigi na ruruguha iana na maneraha ka toregi vê hato na ara ni nahuninga iaku. Inê ki pe tongasiê rârâ ta na marâ, nga noga ma ka Ana na gete iaku ma o Tobiasi o kareku.
21Ki rârâ ki hato na viki ge ono, na vererua tani o karena o Saneheribe karu nahu hunia o vaematerua ma karu gava tangagi na hungani i Ararata. O Sageratone tani o karena ki maneraha urusia o vaemata. Ngaia ki kasia o Agiagaro o karena o Anaele o goana ki bâsurigi na haga hato igê na gavumane iana na maneraha. 22Ngaia ki na ruata na matena ga kasia o Agiagaro igê na tagaraha ngekana, suria igê na matena o Saneheribe ki maneraha i Asiria, ka bani atea o Agiagaro ki bâsurigi na vaini, na ruruguha, na haga ma na ringi i oga igê na nununa na maneraha, hanana i purugenia igê na ara ni pepa iana na maneraha. Suria o Agiagaro ki na goaku i hagahigasiê, ngaia ki metamasi bâkoro na maneraha reniê, hanana i hagamarumungeniê kê aporo tanga i Nineve. Ma ngaia ki hagamarumungeniê.
Currently Selected:
TOBITI 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific