TOBITI 2
2
O Tobiti ki guru na maana
1Matena gê aporo i ruma iaku i Nineve, inê kê oga aporo henirerua ka Ana kaniaku mo Tobiasi o kareku. Igê na tangiani raha ni Pentekosite iamami, ga visigi nikâ vi na viki ni vagevageha renigi na nagoni na mu, igami kami magoto. 2Matena gê bâsigi rako na ngêra igê na bea ni ngêra, inê kê vi tanga o Tobiasi, kê vi: “O kareku, gu hura ma ko garia me ta na tamaka na Siu i matareha ga henahuraua me ikê, na ani i marupegi maninga na ramata iana God. Go aporo me henia, hanana i vagevagesia na magotoha henigia. Go atata aporo me ma ka kahu ngêngê.”
3Vikê o Tobiasi ki hura ki garia na enoni ngekana. Ma ngaia ki hatani aporo me ma ki ngere ki vi: “Mama! Mama!” Ma inê kê hagatea, kê vi: “Na tao?”
Ma ngaia ki vi: “Ta na tamaka na Siu ka nahuia râ ma ki me! Ta na enoni ki herekonokonoa ki me ma ki kasia so na gahuana igê na mahera.”
4Inê kê pe ngê ma kê aharaga ototo râ ma. Inê kê torea vê na gahuana ma kê merâ tanga na kere ruhu. Inê kê naka igê ma kê pania vê igê mataro me ki bungi ma kê kahu bagia. 5Inê kê aporo i ruma ma kê mamanu, hanana gê hagamatarotaroê mareku. Inê kê ngê ma kê hetaki ngavê. 6Inê kê takusia aporo na tamasinga iana na poropete o Amose tangara na ai ni Betele, i vi:
“Na tangiani ni vagevageha iami
ka page vora re na tangiani ni angiha maramara,
ma na ki ni vagevageha iami
ka page vora re na ki ni angiha maramara.”
Ngekana inê kê angi.
7Matena i bungi me, inê kê hura, kê oparia na kiru ma kê bagia na gahuana. 8Na enoni gê merabasigu hetanga ka vi ma, vi inê kê beka, ka vi: ‘I nago ka bani bâbâ renigo, viga nahuigo ko meme, suria go bagira na enoni. Ma ngaira ka pe nahu hunigo, suria go gava. Ma i ngekê ko katoa akê nikâ na tarana ngekana! Igo ko pe bani girara?’
9I na bungiana ngekana inê kê mamanu, hanana gê hagamatarotaroê mareku. Hemuri inê kê hura tanga na mamarupa, hanana gê mauru hagarangia na apê. Ngaia ki na bungiana i mahanaga. Tahema inê kê pe aruha na bêku. 10Na gapagapêsu ka oga igê na apê i avoraku utumigana na bêku. Ma inê kê pe hagare. Na aeta mahana ka hita i maaku ma ka katorerua na maaku karu reo. Inê kê râ i pasita na mane mangata na ani ea ma na ani ea. Ngaira ka ama ni mangategi nga na maaku ma na maaku ka ama ni guruguru ngavê nga. Ki rârâ ma kê kahu guru taropuru ngavê.
Surigi na harisi ge he inê kê pe bâsigi rârâ na marâ. Na goaku ka tako bâraha reniê. O Agiagaro ki marupeê surirerua na harisi gi rua ma ki kahu râ tanga i Elama.
11I murina i râ o Agiagaro, ka Ana kaniaku ki haganega ki tagara meni haga. Ngaia ki poroporogi na varehuta na sipi ma ki hêrigi na rupini na gahu renigi. 12Matena i hêria hato na tangahana gi hita na gahu na enoni ga hagatora renia, ngaia ki toregi râ tangara ma ngaira ka vuria renigi.
I ta na tangiana igê na hagahisi ngaia ki retea râ tagua na gahu tenia na rupina ma ki torea râ tangara na enoni ga hagatora renia. Ngaira ka vuria renia na mena hagenani ma ka mahatangenia nikâ na goti tanga.
13Matena ka Ana ki meata me na goti, na goti ki haganega ki angiangi. Inê kê hagate, kê vi: “Na goti i râ me i he? Go hanagoa iê? Gu meaporo ototo râ tangara na avanuna. I pe oto vige ngaugi na ngêra ga hanagogi!”
14Ka Ana ki arami, ki vi: “Mareha nge! Na mahatanga ma ngekana i râ me henia na mena na gahu.” Ma inê kê pe tongesuria. Inê kê maki bâraha renia na tarana i katoa. Tahema inê kê bonasia ki meaporo na goti tangara na avanuna. Ma ngaia ki hagamuniê me ki vi: “I hega na mahatanga iamu tangara na enoni matareha? I hega na tagaraha koro go katogi? Hoi, inê kê kahu girarago!”
Currently Selected:
TOBITI 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific