JOSUA 1
1
God ki bonasia o Josua ki parênia i Kanani
1I murina i me o Moise na kariana koro na Araha, na Araha ki tamasi tanga o Josua o karena o Nune. O Josua ki na tamana o Moise. 2Na Araha ki vi tanga, ki vi: “Na kariaku koro o Moise ki bani me. Hoi, mu nanê, igo ma na Isiraelita hato, ma kamu tarêhia na ve i Jotano, ma kamu bêbanu igê na agua, gê sugi haganahunigamu renia. 3Inê kê bani visia tanga o Moise, vi inê kê haganahunigamu, igo ma na kariaku hato, renia na agua hagenani, mu sugi ogasia. 4Na pereperegani na apanena hagenani iami ki manga ikê: I haganega tenia na bagamasusu raha i Negeve ki râ ki tariha igê na hungani i Libanone; tenia Uparatesi na ve raha i kerekê ki aharêvoro i na apanena iata na Hitita ki tariha igê na asi kereso. 5Josua, i asa ngavê ta na enoni vige teharigo suria na ogaha hagenani iamu. Inê be ngahisigo manga gê bani ngahisia noga o Moise. Inê be tamanigo tare. I asa be kasi renigo. 6Gu togeaga nga ma ko ramoramo, suria igo ko page bêngenira na Isiraelita, matena ga parênia na agua, gê bani surua tangara na êvarita. 7Go togeaga ma ko ramoramo. Go marupegi nga na ramata hato, na kariaku koro o Moise ki bani vatego renigi. Siana ko hagêrahusia ta na ramata, ma hanana go page tavoraha bâkoro igê na tagaraha iamu. 8Go tomania tare na buka na ramata igê na hagarahenga iami. Go takotako renigi tare i na mani tangiani ma na bungiani. Go arâ surigi nga na ara ni marâ hato i rarona na buka. Vikana igo ko page tavoraha bâkoro ma ko page gâga igê na ramana. 9Go takusia tare, vi inê kanigê bonasigo ko togeaga ma ko ramoramo. Siana ko magu se vigo bagahagêguri, suria inênga, nga na Araha God iami, inê be ngahisigo tare igê na ara ni tagaraha hato iamu.”
O Josua ki hagananêra na Isiraelita
10O Josua ki bonasira na enoni raha iata na Isiraelita, 11ka râhia na tênga ma ka hagananêra na enoni, ka vi: “Mu nanê renigi na ngauha, suria i murini na tangiani gi oru igamu kamu page tarêhia na ve i Jotano, hanana mu parênia na agua, na Araha God iami ki sugi vategamu renia.”
12O Josua ki vi tangara na varo ninuni iaterua hehegitigi o Rubeni mo Gati ma tapanena na varo ninuni iana o Manase, ki vi: 13“Hoi, mu bani girara, vi o Moise na kariana koro na Araha ki bani hagarongogamu, vi na Araha God iami ki page haganahunigamu renia na apanena kê me ikê i Jotano. 14Na gete iami, na karemi ma na togoha iami ka goga so ikê, ma na mane ni me iami ka page tangaru ni hearihatana ma ka page nanago ka tarêhia i Jotano tarata na goata na Isiraelita, hanana ga tamanira, 15mataro me ka parênia na apanena kereso i Jotano, na Araha God iami ki bani hêtata renia. Matena na Araha ki haganahunira hato na raraha hato iana o Isiraele renigi na agua koro ka gâga igê, hoi, mu kahu aporo me ma kamu ogasia na apanena iami kerekê me ikê i Jotano, o Moise na kariana koro na Araha ki haganahunigamu renia.”
16Ngaira ka aramia o Josua, ka vi: “Hoi, suria go bonasigami vikana, igami kami girara mi arâ surigi na tamasinga iamu. Na agua mavê go vi tangagami vigami arâ igê, igami kami girara mi arâ igê. 17Igami kami têtê viteamu, manga mi bani têtê viteana tare o Moise. Na Araha God iamu ke ngahisigo manga i ngahisia o Moise! 18Na anima na enoni i guguruga tangago ma ki pe arâ suria ta na tamasinga iamu, igami kami page nahuia ki meme. Go togeaga ma ko ramoramo!”
Currently Selected:
JOSUA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific