SAKARIA 2
2
Na oruta na maruteha: na varo ni hagevovo
1Inê kê marute nikâ, ma kê bâsia na mane, i merâ na varo ni hagevovo. 2Inê kê hagatea, kê vi: “Go arâ i he?” Ngaia ki arami, ki vi: “Inê kê arâ kê hagevovoa Jerusaleme, manga i he ki borahu ma ki aberabera.”
3Ma na angero, i meêtamasi tare, ki vora me nikâ henia tani na angero, i râ me vurusia, 4ma ki vi tanga, ki vi: “Garigari, gu vi tanga na mane, i hagevovo, vi i ngekana i Jerusaleme ka rako teha ngavê na enoni ma na puruka ma na sipi ma na marâ vigana, ma ki raha era, hanana vige tagarahia na para rihuia. 5Na Araha ki bani vi, vi ngaia marena ki page anumasia na hinua manga na para na gi, ma ki page oga i ngekana henia na raramohana raha.”
God ki bonasira na kariana ka aporo i pasita
6Na Araha ki bonasira na kariana, i vi: “Garigari, mu gavatenia i Babilonia. I nago inê kê bani tokorenigamu surigi na ara ni agua, matena na ai ni Babilonia ka henahuraugamu. 7Ma i ngekê inê kê bonasigamu, mu hata ni aporo i Jerusaleme. 8Na ani ma na enoni, i hagatanu tangagamu, ngaia ki hagatanu tangê inê, suria inê kê tanugamu re na rokoku. Ngaia kani gê visia, inê na Araha raramohaga huniê.”
Vikê na Araha raramohaga hunia ki hagatorangeniê, hanana gê hagarongora na enoni, ga henahuraura na kariana, renia na tamasinga ikê: 9“Na Araha marena ki page megamuheariha, ma na enoni, mu bani henahuraura, ngaira ka page henahuraugamu nogata.”
Igê na matena ngekana na enoni hato ka page girara, vi na Araha raramohaga hunia kani hagatorangeniê.
10Na Araha ki vi: “Igamu i Jerusaleme, mu ki vagevage! Inê be ngahisigamu!”
11I na matena ngekana rako na agua getegi ka page hakunia na Araha, ma ka page vora na kariana. Ngaia ki page oga henigamu, ma igamu kamu page girara, vi ngaia kani hagatorangeniê tangagamu. 12Na Araha ki page nahunia aporo i Juta, na nahuninga manimani iana igê na apanena apuna iana. Ngaia ki page takuia aporo na hinua i Jerusaleme teharigi na ani getigi.
13Igamu hato mu muni i maana na Araha, suria ngaia ki râ me tenia na agua apuna iana.
Currently Selected:
SAKARIA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
