AITANGISIHA 19
19
Na Asi Memera: na mera ma na tahinga
1Tangara na enoni ga pe botage renigo, Araha,
na mangariaganiha iamu, i pe hetaki, ki hitarira ngavê.
Igo ko bani giraragi hagenago, vi na ta kani ngaira ga page katogi.
2Igo ko bani girara, vi ngaira ka page urisi parongata
ma ka page tarigenira na kariamu nikâ,
henaka ga nakara vê ka arâ ma ka tugurira ka hatani huhura.
3Matena ga angisira mênga na kareta ga me
ma ka angiangi maramara igê na anoanota,
ta na takoha bekabekaga ki râ me igê na aitangihata.
Henaka ga tugurira ka hatani hura,
ma ngaira ka haganega ka tarigenira na kariamu
manga vi ngaira ka gava.
4Na gunaha iata ki katora vikana
ma ki bugurenira tanga na hagaitangiha i ararira.
Ngaia ki katora ka bonotenigi na mamasiaganiha ga bani tarahura i nago,
hanana viga hatamia na hagaitangiha
i hagatonganigi kê nikâ na ani ngegana.
5Ngaira ka me igê na tarana i tora getea ngavê
ma na kariamu ka ama ni tavoraha asitatara nga hete.
6Na ara ni marâ i maveta ka urusigi na tauhani,
suria go bonasigi vigana,
hanana na kariamu ka asitatara.
7Ngaira ka bâsia na vaha puru, i râ me ki buhia na tênga iata
ma ka bâsia na tara mamata
i vaga me igê na agua i oga i nago igê na asi.
Na Asi Memera ki vora re na tara manamanaga.
Na asi ramo ki vora re na bena ni go.
8Na kariamu hato ga oga i na ababa ni rimamu
ka bâsia na mena iamu ma ka tarê tanga ta apanena.
9Ngaira ka mangara na hosi igê na pariki ni go.
Ngaira ka asireke rârâ mangara na kareta na sipi,
matena ga ki ka hagarahasigo, Araha,
suria go hagatahira.
10Ngaira ka takusia mênga na bani ogaha iata,
matena ga kare rakuraku mênga,
ma manga i he na ano ki hagarakonira na namu
ma manga i he na ve ki momoatenira na bera ma na bera na êrê
ma ki mareha vi na ega.
11Hemuri, matena ga pasi ngê na ganiani koro ngavê,
ngaira ka bâsia na tarana haoru
ga vora me renira na manu,
12suria na manu ka hura me tenia na asi,
hanana ga hatungia na magêha iata.
Na mane ngegana ka pe bani bâsira me i nago.
13Na ania ka hagananêra na enoni tasi ngegana
renia na hgaitangiha i page tarahura.
Ngaira ka mamasiaga meni na bagatauhata,
suria ngaira ka ruhira ngavê na mahuara.
14Na agua getera ka usitenira na enoni ga pe girarara,
na mahuara ga arâ me i pasita,
ma ngaira ka katora ka kare rakuraku iata
na mahuara ga koro tangara ma ka tamanira.
15Na hagaitangiha ki page tarahura na enoni hato,
naka ma o ti, ga pe unira banu na mahuara.
16Ma na enoni ngegana, ga unira banu hagenago na mahuara
tanga na magotoha ma ka katora ka tagenata henira,
ngaira ka hagamamasiagara ngavê hagemuri.
17Tahema na enoni ngegana ka oga igê na mengo meni na bagatauhata
mangara na me ni Sotome i maani ruma iana o Loti na mane koro.
Na mengo ki baraira
ma na ara ni hitangita ki arâ tatagara rârâ tanga na ruma iana marena.
Na hatungina na buka
18Na ara ni varo igê na gita ki nahunia na ringena marena
ma na matena ngaigi ki akê me haku
na ringeni ka rongorongo hehegitigi ma ka arâ kasikasi.
I tagenana ma igê na mateni ngegana,
matena na marâ ka akê me haku
igê na tarani ga tora getigi tenia i nago.
19Bâ, na marâ mamauri i bemu ka vora re na ega
ma na ega ka vora re na marâ mamauri i bemu.
20Na raramohana na gi ki teharia na raramohana na ve,
suria na ve ki bara vige sirihia na gi.
21Na vavatani na gi ki asa vige haganoroa
na hasigota na marâ mamauri ga girara ga titihu,
henaka ngaira ka arârâ igê.
Ma na gi ki asa vige hagamagahurua na ngêra
God i hagatorangenia me.
Henaka ma ngaia ki magahuru manga na kârupu
igê na bababana manga bani hanana,
ma i ngekê ki mareha.
22I monari, Araha.
Igê na ara ni tarani igo ko bani hagarakonira na kariamu
ma ki rongo raha na atata.
Igo ki asa vigu rumakaka renira.
Igo ko bani tamanira tare ma i na ara ni agua.
Currently Selected:
AITANGISIHA 19: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific