TITO 2
2
Na hagesuringa koro
1Ma ki tuguhigo, go hagesurira na enoni renigi na marâ, ga râ suria na hagesuringa koro. 2Gu vi tangara na meraha, ke oto surira mareta, ke marape, ma ke bâbâ tarata; ke gatagata igê na morana na tongesuriha, ma igê na morana na hetakuiha, ma ke piringiape. 3I tagenana ma, go vi tangara nikâ na gemêa, ka paronga, manga i marisita na gete, ga hanetasia God. Siana ka tamasi erasira na enoni, se vi ge voravora re na gete ni tonoha. I tuguhira, viga hagesurira na gete haoru renigi na marâ, ga koro, 4hanana ga hagaotora, ka takuira na mane iata ma na kareta, 5ka bâbâ tarata, ma ka matarotaro, ma ka katogi maninga na tagaraha, ga marisita na gete êragi, ga têtê viteata na mane iata. Manga ngekana, ki asa ta na enoni, vi ge page visia ta na marâ era renia na taroha iana God.
6I tagenana ma, go kanukanura na mane haoru, hanana ga bâbâ tarata. 7Igê na ara ni marâ ki tuguhigo, vi go hagabângenigi na parongamu koro igê na tagaraha koro. Igê na hagesuringa iamu siana ko nakanaka igê ta na marâ getea, ma ko marape hete. 8Go visigi na tamasinga, ga koro, hanana siana na enoni ka hehegi. Igê na tarana ngekana igo ko hagamakira na merongamu, suria ngaira ka pe tarahua ta na marâ era, hanana vi ge visigia renia.
9Na enoni vurivuri ki tuguhira, vi ga têtê viteata na araha iata, ma ka hagakoro obata igê na ara ni marâ. Siana ka aramira bê aporo, 10se vi ga hanago tenira. Ma ki tuguhira hete, ga hagabângenia, vi ngaira ka koro, ma na araha iata ka hagêguritogo renira tare, hanana vi igê na ara ni marâ, ga tanugi, ngaira ka katora na enoni, ka hanetasia na hagesuringa renia God, na Hagamauri iaka.
11Renia God ki bani hagabângenia na korohana, i hagatahira na enoni hato. 12Na korohana ngekê ki hagesurigia, hanana vi ga nakagi vê na ogaha ma na teniha, ga pe râ suria na tamasinga iana God, ma ki hagesurigia, ka bâbâ taraka, ka ototo, ma ka mauri koro ma ka ototo i maana God, matena igia ka gâga i maveta ikê. 13Suria i maveta ikê igia ka ogakaria na tangiana, i page tarahugia igê na vagevageha, ga bani naasia: igê na tangiana ngekê ki page arâ me igê o Jesu Kirisito, na God raha ma na Hagamauri iaka. 14Ngaia ki kasi manavana tangagia, hanana i hagatahigia tenigi na ara ni eraha, ma ki katogia, ka voravora re na kariana matarotaro, na anina ma ngaia, ma ka agana nga, ka tanugi na tarani ga koro.
15Go hagesurira na enoni renigi na tarani ngegana, ma igê na raramohamu hagenani ko hagaramonira, ma ko kanukanura, hanana vi siana hagetage ta na hitangita, ki ruhigo.
Currently Selected:
TITO 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific