SIRAKE 51
51
Na ki ni visiha koro
1Inê be visigo koro, igo na Araha ma na maneraha iaku.
Inê be hagarahasigo, igo na God ma na Hagamauri iaku.
Inê be visia raha na atamu,
2suria igo ko tamaniê ma ko anumasiê.
Igo ko hagatahiê tenia na mera
tenigi na etu iata na enoni
ga hagaparu reniê ma ka hagatoraiê.
3Matena na enoni ka merongasiê, igo ko ngahisiê.
Suria i raha teha na hetakiha iamu
tahema igo ko hagatahiê
tenira na ani ga gamorahiê manga na laione
tenigi na rimata na ani ga merongasiê vigê meme,
tenigi na manibagabevoani ga tarahuê,
4tenia na robona na gi i hagaboeê,
tenia na gupuna na gi gê pe tanga inê,
5tenia na agua iata na ani ga bani me,
tenigi na hagatorainga reniê tanga na maneraha.
6Ta na tangiana gê haga ni me
ma kê aporo i maana na kiru.
7Na merongaku ka rihuiê.
I mareha rârâ ta na enoni vige tamaniê.
Inê kê bâbâ ma ki mareha.
8Hoi, Araha, ma inê kê takusigi na hetakiha iamu
ma na tauhamu koro ga bani oga me kerevê noga.
Inê kê takusigo, go tamanira na ani ga hagêguritogo renigo
ma ko hagatahira tenigi na rimata na merongata.
9Tahema, matena gê haga ni me, inê kê avarasigo,
hanana vi go hagatahiê tenia na mera.
10Inê kê avarasigo, Araha, kê vi:
“Igo ka no vaemaku.
Siana ko rumakaka reniê igê na bagabevoani ngegê,
matena na merongaku paroparo ka hagamamasiagê ngavê.
Inê gitageku ma, ma ki bara tangê.
11Inê be hagarahasigo tare ma be ki be visigo koro.”
Igo ko aganaria na avarasiha iaku,
12ma ko hagatahiê tenia na perenga ni mera,
tenia na matena ni eraha.
Tahema inê kê visigo koro ma kê hagarahasigo.
Araha, inê kê visia raha na atamu.
Tangasia na takoha mataha
13Matena gê karekare mênga
ma kê mamênga vi ve arâhigi na agua getigi,
inê kê nungia ototo râ nga God renia na takoha mataha.
14I ruma ni rotu inê kê nungia God renia
ma kê ama ni rapasia nga na takoha mataha
igê na ogaha iaku hagenani.
15Inê kê vagevagesia na takoha mataha,
matena i raharaha manga na guana na apinige,
i haganega tenia na takana mataro me ki matamata.
Inê kê harisuria tare,
haganega me tenia na matena gê karekare mênga.
16Haganega tenia na matena gê karinga na takoha mataha,
ngaia ki hagesuriê
ma ki haganahuniê renia na aitangisiha raha.
17Suria ngaia tahema na aitangisiha iaku ki ama ni akê me nga.
Inê be hagarahasia nga na ani i hagesuriê.
18Inê kê togeaga kê hagaotoa nga tare
na ogaha iaku suria na takoha mataha.
Inê kê uhungia tare kê katogi na tarani ga koro
ma ki asa vi ve page maki renia.
19Inê kê rapasia nga na takoha mataha
ma kê marupegi maninga na ramata.
Matena gê nunginungi, inê kê tangahuriê,
suria gê pe nahuni takoha mataha maninga.
20Henaka, ma inê kê ama ni rapasia nga
ma kê tarahua, suria gê hinarugi na tasi.
Haganega me tenia na matena gê tarahua moramora igê,
na aitangisiha iaku ki ama ni raharaha nga.
Tahema inê ki asa vi ve rumakaka renia.
21Suria gê tangasia ngavê, tahema inê kê garia.
Vikana inê kê babarisi ngavê renia.
22Tahema na Araha ki vuriê bâkoro,
suria i katoê kê girara bâkoro manga ko hanana gê tamasi.
Tahema inê kê page hagarahasia tare renia ngaia na meaku.
23Igamu hato mu bono bê, mu râ me i pasiku
ma kamu banu igê na ruma ni hagesuri iaku.
24Tanu hega kanigamu hagagege vi igamu kamu bono bê
ma kamu nakagi na aitangihami ka ama ni magê nga?
25Inê kê vi vikê:
Rapasia nga na takoha mataha.
I mareha vigamu garigari haga tanga ngekana.
26Mu totora gapara renia na takoha mataha
ma kamu aganaria nga na hagesuringa iana.
Ngaia ki hagarangi so ma.
I mareha vigamu arisia.
27Mu girara mu bâsiê re maami maremi,
vi inê kê pe hagesuri bâraha ngavê
ma na aitangihaku ki togo.
28Henaka i kere bara vari tangagamu,
mu banu igê na hagesuri,
hanana mu page nahunia na marâ koro teha ngavê
mangani rako na siliva ma na golo.
29Mu ageagesia na takiha iana na Araha
ma kamu visia koro renia.
Siana kamu maki vigamu hagarahasia.
30Mu tanugi na tagaraha iami igê na matena tange
ma na Araha ki page vurigamu
igê na matena ngaia i takusia.
Currently Selected:
SIRAKE 51: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific