SIRAKE 36
36
Na avarasiana na Araha tanga i Isiraele
1Araha, God, gu takigami ma ku takuigami,
suria go marungira na ara ni marâ hato ga oga.
Gu katora na ara ni agua getera hato ke magutenigo.
2Gu hagagirarara
ma ku hagaitangira renia na raramohamu.
3Renigami igami igo ko bani hagabângenia tangara ngaira,
vi igo ko apuna teha ngavê.
Hoi, i ngekê renira ngaira gu hagabângenia tangagami igami,
vi igo ko bâ hahanetaga ngavê.
4Araha, gu hagagirarara ngaira manga igami,
vi igo getego ma ko God, mareha vi tani râ nikâ.
5Gu katogi na tagaraha haoru ma na mena haoru,
hanana gami tahetara renia na raramohamu raha
ma ke rongo raha na atamu.
6Ge akê me na mangariaganiha iamu ma ke raboa.
Gu mutera ngavê na merongamu
ma ngaira hato ga hagamamasiagagami.
7Ge hatani akê me na tangiana ni suriha.
Gu hagamonaria na tohenga iamu,
hanana na enoni hato ke tamasigi na tagaraha raha iamu.
8Na ani ga uhungia viga gavagava tenigo
ke ngêra na gi na mangariaganiha iamu
ma ke me na ani ga hagamamasiagagami na kariamu.
9Gu rumurumugigi na bêta na maneraha
ga merongasigami ma ka vi:
“Igami nga kanigami teha! Mareha vi o ti nikâ!”
10Gu hagahakura aporo na raraha iana o Isiraele
ma ku haganahunira aporo renia na agua,
go bani haganahunira renia kere vê noga.
11Araha, gu takira na Isiraelita, na enoni na marahumu,
gu kasira akê ke bêbê ni kare iamu.
12Gu takia i Jerusaleme na hinua apuna iamu
go bani atea hanana vigo gâga igê.
13I Sione ge rongo raha renigi na mena iamu
ma na bâbâhamu raha ke raro i ruma ni rotu iamu.
14Gu pane henira na ani go hagavorara hagenago tatare.
Gu hagamonarigi na tamasinga iata na poropete iamu.
15Go vurira na ani ga tongesurigo
ma ku hagatanga monari,
vi na poropete iamu ka tamasi igê na monariha.
16Araha, gu aganarigi na avarasiha iamami na kariamu
manga bani hanamu.
17Vikana na enoni hato i maveta ka page tahetara,
vi igo nga kanigo Araha, ko God
go bani oga hagahu me tare ki bê ki arâ.
Na ateha ni êragiha
18Na ara ni ngêra ka soso i manavaka
ma tani na ngêra ka koro teharigi tani.
19Na meana na enoni ki girara i namigi anaki na ganiani.
I tagenana ma na enoni i karinga hahutogo.
Ngaia ki tarahugi na hagaparunga.
20Na enoni ni siruguhinga
ki hagamamasiagara na enoni getera.
Ma na enoni i aitangisia na tarana ngekana
ngaia ki girara i vatea bê aporo.
21Na gete ki tâ tanga na anima na mane vi auragia
ma na mane ki atea nga na ani ta na gete kani auragia.
22Na bâkorohana na gete ki hagavagevagesia na mane.
Ngaia ki pasi bâsia teharigi na ani getigi na marâ.
23Na mane ki babarisi ngavê
manga vi na gete ki arâ manâhi na tamasinga iana.
24Na mane i auragi,
ngaia ki nahunia na hunana na ogaha iana
hanana i tavoraha bâkoro,
suria kaniana ki na tamana i araria ma ki gatagata renia.
25Manga na nahuninga ma ka pe parapararihia
na mane hanago ka page hanagoa.
Manga na mane ma ki pe auragi,
ngaia ki ata ni arârâ mavê ma ki obaera.
26Ti ki hagêguritogo renira na manero
ga totora hanago surigi na hinua?
I tagenana ma tanga na mane i pe nahuni ruma
ma ki bagamamêruha rârâ, matena i bungisia.
Currently Selected:
SIRAKE 36: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific