RANGANIHA 7

Na Kariana God ka tahi

1Ma hemuri inê kê bâsira na angelo ge he, ga ura tonganigi na ariruguni ge he na maveta, ma ka hagabarasigi na maani na tangi ge he, hanana siana ta na roga ki hihisia na ano, se vi na asi, se vi na apinige. 2Ma inê kê bâsia nikâ ta na angelo getea, i so me tenia i kere kê, i merâ me na marâ, ga segea renia na girarana na God mamauri. Ngaia ki ngirira raha na angelo ge he, na angelo, God i bani vatera renia na ramoha, hanana vi ga erasirerua na ano ma na asi renia. 3Na angelo ki vi: “Siana kamu erasigi na ano, se vi na asi, se vi na apinige, mataro me igami kami segea hato na segesegeha iana God igê na raeta na kariana na God iaka.” 4Ma kê rongoa, vi na ani gi hita ka segegi na raeta renia na girarana na God: ngaira ka na rehagaro tangarê gi tage ma na tangahuru ge he matara ke he tenigi na ara ni varo ninuni iata na Isiraelita. 5Ga bani segera

na rehagaro tangahuru matarerua

tenia na varo ninuni iana o Juta;

na rehagaro tangahuru matarerua

tenia na varo ninuni iana o Rubeni;

na rehagaro tangahuru matarerua

tenia na varo ninuni iana o Gata;

6na rehagaro tangahuru matarerua

tenia na varo ninuni iana o Asere;

na rehagaro tangahuru matarerua

tenia na varo ninuni iana o Napatali;

na rehagaro tangahuru matarerua

tenia na varo ninuni iana o Manase;

7na rehagaro tangahuru matarerua

tenia na varo ninuni iana o Simeone;

na rehagaro tangahuru matarerua

tenia na varo ninuni iana o Levi;

na rehagaro tangahuru matarerua

tenia na varo ninuni iana o Isakare;

8na rehagaro tangahuru matarerua

tenia na varo ninuni iana o Sebuluni;

na rehagaro tangahuru matarerua

tenia na varo ninuni iana o Josepo;

ma na rehagaro tangahuru matarerua

tenia na varo ninuni iana o Benamino.

Na rehagaro raha teha ngavê

9Ma i hemuri inê kê bâsira na rehagaro raha teha ngavê. I bara tanga ta na enoni, vi ge tomanira. Ngaira ka râ me tenigi na ara ni agua i maveta tenigi na ara ni varo ninuni hehegitigi iata na enoni, tenira na ara ni enoni, ga bâ hehegitigi, ma tenigi na ara ni tamasinga hehegitigi. Ngaira ka ura i maaterua na atohana raha ma na Karena Sipi. Ngaira ka tuguni siki, ma ka têgi na nini i rimata, suria ngaira ka teha. 10Ngaira ka ngerengere raha, ka vivi: “Na tahingamami ki râ me tenia na God iamami, i oga so igê na atohanana raha, ma tenia na Karena Sipi!” 11Na angelo hato, na meraha, ma na marâ mamauri ge he ka ura rihia na atohana raha. Ngaira ka susure ka abahigi na maata i maana na atohana raha, ma ka rahesia God. 12Ngaira ka vi:

“Monari!

Tare ma tare ma

ka visia raha God ma ka kasia akê,

ka visia koro ma ka hagarahasia,

ma têtê viteana na God iaka,

i takotako mataha ngavê,

ma ki raramohaga hunia!

Monari!”

13Ta na hitangita na meraha ki hagateê, ki vi, “Ti ka na enoni, ga tuguni siki? Ngaira ka râ me tenia i he?” 14Inê kê arami, kê vi: “Uva, pe hagare, araha. Igo ko girara.” Ngaia ki vi tangê, ki vi: “Ngaira ka na enoni, ga bani tahi tenia na bagabevoana raha. Na tuguni iata ka siki, suria ga tananigi renia na gapuna na Karena Sipi. 15Tahema ngaira ka ura i maana na atohana raha God, ma ka rahesia i ruma ni rotu iana tare, na tangiani ma na bungiani. Ma na ani, i oga so igê na atohana raha, ki page gâga henira, ma ki page anumasira. 16Ngaira ki hato hagetage, vi ge page magê, se vi ge page mamata na riota. Ma ki hato nikâ na arito, se na ani mavê na bababana raha, vi ge page singira. 17Renia na Karena Sipi, i oga i utumigana na atohana raha, ki page marupera manga na avanuta na sipi, ma ki page bêngenira tange na ve banga ni mêriha. Ma God ki page taruhigi râ na ara ni tavoni na maata.”

Currently Selected:

RANGANIHA 7: KCB

Highlight

Copy

Compare