RANGANIHA 2
2
Na taroha tangara na enoni kirisitiano i Epeso
1“Tanga na angelo iana na haku na enoni i Epeso, ga tongesuri, gu sege vikê tanga:
“Ikê ki na taroha tenia na ani, i têgi na higu gi pi i rimana i otona, ma ki arârâ i berarogani na laiti na golo gi pi igê na atohani. 2Inê kê bani girara na parongami. Inê kê girara, vi manga i he kani igamu mu bani tagara raha, ma ki manga i he kani igamu mu bani piringiape. Inê kê girara, vi igamu kamu usitenira na enoni era, ma kê girara, vi igamu kamu bani uhungira na ani, ga vi, vi ngaira ka na aposotolo, ma ki mareha. Igamu kamu bani tarahua, vi ngaira ka na enoni ni hagaparunga. 3Igamu kamu piringiape. Igamu kamu bani hatamia na mamasiaganiha tangê, ma kamu pe rumakaka. 4Ma tarana gê pe obanigamu renia kani ikê: igamu kamu kahu pe takuiê i ngekê, manga mu bani takuiê i nago. 5Mu takusia, manga i he kani igamu mu kahu mameaga ngavê. Mu murisigegi na tasi iami, ma kamu urisi parongami, ma kamu katogi aporo na marâ, mu bani katogi i nago. Manga i mareha, inê kê page arâ vê i pasimi, ma kê page tavoa râ na laiti iami tenia na atohana. 6Ma na tarana koro i pasimi kani ikê: igamu kamu kitenigi ngavê nogami manga inê na marâ, na kariana o Nikola ga katogi.
7“Manga mu girara mu karinga, mu karinga na marâ na Higona Apu i visia tangara na haku na enoni, ga tongesuri!
“Tanga na ani, i teha, inê kê page hagamarumungenia, ki ngaua na guana na apinige na mauriha, i gâga i Paratiso, na mu iana God.
Na taroha tangara na enoni kirisitiano i Simirina
8“Tanga na angelo iana na haku na enoni i Simirina, ga tongesuri, gu sege vikê tanga:
Ikê ki na taroha tenia na ani, i hagenago ma ki hagemuri, i me ma ki mêri aporo. 9Inê kê bani giraragi na mamasiaganiha iami. Inê kê girara, vi igamu kamu matareha, ma igamu kamu ruruguha hete. Inê kê girara, ga tamasi erasigamu na ani, ga vi, vi ngaira ka Siu, ma ki mareha. Ngaira ka na kariana Satana. 10Siana kamu magutenigi na ani mavê na mamasiaganiha, ga sugi tarahugamu. Mu rongo! Satana ki page kasira tani na hitangimi i ruma ni hagaitangiha, hanana vi uhungigamu. Na mamasiaganiha iami ka page gâga surigi na tangiani tangahuru gi tage. Mu ama ni tongesuri nga, mataro me mu meme, ma inê kê page hagamahegamu renia na mauriha, suria mu teha. 11“Manga mu girara mu karinga, mu karinga na marâ, i visia na Higona Apu tangara na haku na enoni, ga tongesuri!
“Na ruata na mera ki asa, vi ge erasia na ani, i teha.
Na taroha tangara na enoni kirisitiano i Peregamo
12“Tanga na angelo iana na haku na enoni i Peregamo, ga tongesuri, gu sege vikê tanga:
“Ikê ki na taroha tenia na ani, i nahunia na tatapa borahu, i masi heri. 13Inê kê bani girara i pasimi. Ngaia ki na agua, i oga igê na atohana raha Satana. Mu taresuriê tare, ma kamu ama ni tongesuriê nga, naka ma na matena, ga nahuia igê o Antipa, i taroheniê bâkoro. Ngaira ka nahuia igê na agua, i goga igê Satana. 14Ma igê kani tani na tarani, gê pe obanigamu renigi: i pasimi ka oga igê tani, ga râ suria na hagesuringa iana o Balama, i bani hagesuria o Balaka, ki hagatasira na Isiraelita, suria i katora, ka ngêgi na ngêra, ga bani vogasira na ataro renigi, ma ka paronga era. 15Ma ki tagenana ma nikâ, ga oga i pasimi tani na enoni, ga râ suria na hagesuringa iana o Nikola. 16Hoi, mu murisigegi na tasi iami, ma kamu urisi parongami. Manga i mareha, inê ki sugia ma, vi ve râ vê i pasimi, ma be meraheariha na enoni renia na tatapa, i huhura me i haraku.
17“Manga mu girara mu karinga, mu karinga na marâ, i visia na Higona Apu tangara na haku na enoni, ga tongesuri!
“Tangara na ani, ga teha, inê kê page vatera renigi tani na ngêra na mana, i gâga pinihi. Ma nikâ gê page tonganira renigi na hê siki. Ma igê na hê ngegana ka bani segegi igê na atata haoru. Mareha rârâ ta na enoni, vi ge giraragi, nga noga ma ngaira mareta hegitigi ga nahunigi.
Na taroha tangara na enoni kirisitiano i Tiatira
18“Tanga na angelo iana na haku na enoni i Tiatira, ga tongesuri, gu sege vikê tanga:
“Ikê ki na taroha tenia o Karena God. Na maana karu vavata manga na gi, ma na êgana karu togatoga manga na barasi, i togatoga. 19Inê kê bani giraragi na parongami. Inê kê giraragi na hetakuiha iami, na tongesuriha iami, na hetamaniha iami, ma na piringiapeha iami. Inê kê girara, vi igamu kamu tagara bâkoro teharia i nago. 20Ma ikê kani na tarana gê pe obanigamu renia: igamu kamu naka mavê kani akana ka Jesabele, ki visia marena, vi na poropete. Ngaia ki hagesurira, ma ki hagabekasira na kariaku, ka paronga era, ma ka ngêgi na ngêra, ga bani vogasira na ataro renigi. 21Inê kê bani naka na matora tanga, hanana vi ge murisigegi na tasi iana, ma ke urisi parongana, ma ngaia ki usi, vi ge murisigea na parongana era. 22Tahema inê kê page kasia so, igê ta na bea, hanana ngaia ma na enoni, ga rongo era henia, ka hatamia bâraha na mamasiaganiha igê. I ngekê be kato vikana, manga vi ngaira, ma ka pe urusi parongata, ma ka pe murisigegi na marâ era, ga tanugi henia. 23Nikâ inê kê page nahuira na karena, hanana ngaira hato na haku na enoni, ga tongesuri, ka page tahetara vi inê ki na ani, gê giraragi na takotako ma na obaniha iata na enoni. Inê kê page vuria na ara ni hitangita suria na tauhana.
24“Ma tangagamu i Tiatira, na ani, mu pe râ suria na hagesuringa era ngekana, ma kamu pe hagesuringenia na marâ, na enoni getera ga visia, vi ‘na katoha pinihi ngavê’ iana Satana, inê kê vi tangagamu, inê ki asa, vive hagahigegamu renia nikâ ta na marâ. 25Ma kamu taua gatagata nga na marâ, mu bani nahunia, mataro me na matena gê page arâ me igê. 26Ma tanga na ani, i teha, ma ki ama ni tanugi tare nga na marâ, gê obanigi, inê kê page vatea renia na ramoha, hanana i marungira na enoni, ga pe tongesuri. 27Ngaia ki page marungira renia na vato na aiani, ma ki page kamakamarira mangagi na apira na hê. 28Na ramoha ngekê ki tagenana manga na ramoha, o Vaemaku i bani vateê renia. Ma nikâ inê kê page vatera renia na higu ni tangi.
29“Manga mu girara mu karinga, mu karinga na marâ, i visia na Higona Apu tangara na haku na enoni, ga tongesuri!
Currently Selected:
RANGANIHA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
