KI 71
71
Na nungi iana na bani nuni
1Araha, inê kê gava i pasimu, ko anumasiê,
hanana siana kê maki.
2Gu tamaniê ma ku hagatahiê.
Gu aganariê ma ku ura pusiê,
suria ga oto tare na tauhamu.
3Igo ki na tahingaku koro.
Gu anumasiê manga na ruma nganganihaga,
suria igo ki na tahingaku ma ko ura pusiê.
4God, gu hagatahiê tenira na enoni era,
tenira na enoni, ga aharêngegi na ramata,
ma ka katogi na mamasiaganiha.
5Inê kê hagêguri togo renigo, Araha.
Inê kê bani raroni togo renigo,
haganega me tenia gê sisite.
6Inê kê bani hagêguri togo suria na maurihaku hagenani.
Igo ko bani marupeê, haganega me matena gê vora me.
Inê be visigo raha tare.
7Na mêrihaku ki na hagararinga koro tangara rako na enoni,
suria igo ko ama ni anumasiê nga.
8Inê kê visigo raha na ara ni tangiani,
ma kê hagarahasigo tare.
9Siana ko kasi reniê,
matena i ngekê gê vora na bani nuni.
Siana ko paniê,
matena i ngekê gê pe ramo.
10Na merongaku ka teniê, viga nahuiê kê meme.
Ngaira ka haku, ka harikato reniê.
11Ngaira ka vi: “God ki bani kasi renia.
Ge tarigenia ke têa.
I asa ta na enoni, vige hagatahia.”
12God, siana ko hagarisiê.
Gu rêrête me, ku tamaniê, God iaku!
13Gu teharira ma ku erasira ngavê
na enoni, ga torahuriê.
Gu hagamakira ma ku hagaruruhi apeta
na enoni, ga rapasiê.
14Inê be ama ni hagêguri togo nga renigo.
Inê be hagarahasigo bâraha tare.
15Inê be tarohenigi tare na korohamu
ma na tarani ni tahinga iamu,
naka ma gê pe giraragi bâkoro.
16Araha God, inê be tarohenigo,
vi go raramohaga hunigo,
ma ko oto ma koro, igo getego.
17Igo ko bani hagesuriê,
haganega me tenia gê sisite,
ma kê tarohenigi mênga na mena iamu.
18God, siana ko paniê i ngekê,
matena gê vora na bani nuni
ma kê gohogohoraga.
Gu oga heniê,
matena gê tarohenigi na raramohamu raha
tangara na ara ni raraha hato i muri me.
19God, na raramohana na otohamu ki raha teharia na vavearo.
Na tagaraha iamu ka bagaraha teha.
Ti ki maratoramu?
20Igo ko bani hagamamasiagê ma ko haganumanumaê.
Ma igo ko page hagaramoniê aporo,
ma ko page anumasiê tenia na matahu.
21Igo ko page haganaku parongaku,
ma ko page hagarahasiê nga.
22Inê be visigo raha, God, igê na gita iaku.
Inê be hagarahasigo,
renia go hagamonarigi tare na tamasinga iamu.
Inê be kirigo igê na gita iaku,
God, na Isiraelita ka rahesigo.
23Inê be ngere vagevage, matena gê kirigo.
Inê be kirigo igê na mêrihaku hagenani,
suria go hagatahiê.
24Inê be tarohenigi tare na korohamu ma na otohamu,
suria go hagamakira ma ko hagaruruhi apeta
na enoni, ga rapasiê.
Currently Selected:
KI 71: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
