KI 68
68
God ki anumasira ma ki bêngenira na kariana#Na vivita ma na ki iana o Tavite.
1God ki râ me ki tokorenira na merongana.
Na enoni, ga kitenia, ka gavagava tenia,
suria i teharira.
2Ngaia ki sikirenira, manga na roga,
i rogatenia na robona na gi raha.
Manga na girisi i ronu renia na gi ramo,
vikê na enoni era ka magahuru vikana nikâ
i maana God na Araha.
3Ma na enoni, ga tê viteana, ka obakoro,
ma ka vagevage i maana.
Ngaira ka obakoro
ma ka ngerengere vagevage.
4Mu kiria God ma kamu kasia akê.
Mu hagatatara na tara tanga God,
i goga igê na vaha.
Na Araha ka na atana!
Mu vagevage i maana!
5God ki goga i pasina, na Ruma ni Rotu apuna.
Ngaia ki anumasira na gete na nâ
ma ki marupera na kare banogo.
6Ngaia ki vatera na enoni mahuara
na ruma ka goga igê.
Ngaia ki torera hura na enoni
tenia na ruma ni hagaitangiha,
hanana ga apeape tatara, ka nahunia na ramana.
Ma na enoni, ga aharêngegi na ramata,
ka goga igê na masusu na mako avagavaga.
7God, igo ko bêngenira na kariamu,
ma ko aharêvoro igê na masusu.
8Matena ngekana na ano ki gisigisi,#Ex 19.16-25
ma ki rangi bâraha tenia na vavearo.
Na hungana i Sinai ki gisigisi i maamu,
suria go râ me, igo God,
ga rahesigo na Isiraelita.
9Igo ko katoa, ki rangirangi raha,
ma ko hagakoroa aporo na marê aruga iamu.
10Na kariamu ka nahunia na agua ni suruha.
Ma igo ko marupera na enoni matareha
renia na korohamu.
11Na Araha ki ngere ki hagagava.
Ma rako na gete ka tarohenia, ka vi:
12“Ngaira na maneraha ma na me iata ka gava.”
Na gete, ga oga i hinua, ka tonganigi na marâ,
na mane ka henahuraugi.
13Ngaira ka tonganigi na nunuta na kuvê,
ga puruigi na apeta renia na siliva
ma na gagahata renia na golo.
Renia ta na hitangimi ka migioga so na pena ni sipi
igê na tangiana ni hearihatana?
14God raramohaga hunia ki tokorenira na maneraha
igê na hungana i Salamone.
Ngaia ki katoa na rangi, ki magarisi ngavê,
ma ki agorata manga na hê na aisi.
15Na hungana i Basani ki na apena bagabarana raha teha
ma ka rako ngavê igê na botoni.
16Igo na barana, go nahunigi rako na botoni,
renia ta go hengaria na hungana i Sione,
God ki atea, vi goga igê?
Na Araha ki page goga i ngekana
tare, mareha ki hatohato.
17Na Araha ki râ me tenia i Sinai tanga na agua apuna
henigi rako na rehagaro na kati ni hearihatana,
suria i bani teha.
18Ngaia ki tagere igê na hungana i Sione.#Eph 4.8
Ngaia ki merarâ rako na enoni, i henahuraura.
Ma na merongana ka mahatangenigi nikâ na votovoto tanga.
Na Araha God ki page goga i ngekana.
19Ka hagarahasia na Araha,
i hagamahagia i na ara ni tangiani,
suria ngaia ki na God, i hagatahigia.
20God iaka ki na tahingaka.
Ngaia ki na Araha, na Araha iaka,
i hagatahigia tenia na mera.
21I monari, God ki page botagigi na bêta na merongana,
na bêta na enoni, ga usi, vige urisi parongata.
22Na Araha ki bani vi: “Inê kê page henahuraura na merongami.
Inê kê page mera aporo tenia na hungana i Basani
ma tenigi na matava tara.
23Vikê igamu kamu page uru igê na gaputa,
ma na o iami ka page naminami masu.”
24God, na kariamu hato ka vagevagesia na aporoha me iamu,
suria go teha.
Ngaira ka vagevagesia na râha me iana God, na maneraha iaku,
tanga na ruma ni rotu iana.
25Na enoni, ga kiki, ka nanago,
ma na ani ga êhihi, se ga tarugi ta na marâ,
ka mumuri.
Ma ka rararo na kere gete,
ga tahuru kasikasi henigi na ringe.
26“Igamu na kariana God, mu visia raha,
matena mu hakuhaku me tanga na hagarahenga.
Igamu hato na raraha iana o Jakobo,
mu visia raha na Araha.”
27I hagenago me na kere raraha iana o Benamino,
ma hemuri ngaira na maneraha ni Juta henira na kareta,
ma hemuri tatare na maneraha ni Sibuluni me Napatali.
28God, gu hagabângenia na raramohamu raha,
na ramoha, go bani tamanigami renia i nago.
29Gu hagabângenia tenia na Ruma ni Rotu iamu i Jerusaleme,
hanana na maneraha ka mahatangenigi igê
na votovoto iata tangago.
30Gu ramonia i Esipito na marâ vasiga ngekana,
i oga igê na mani asire igê na sugu.
Gu ramonira na enoni, ga pe rahesigo,
na totoha ni puruka mane ngegana
henira na kareta.
Gu purira so na enoni, ga vanasigi na haga,
ma ku tokorenira na enoni ngegana,
ga tenia tare na hearihatana.
31Vikê i Esipito ki page mahatangenigi na votovoto tangago,
ma i Etiopia ki page rahesigo, Araha.
32Mu kiria God, igamu hato na maneraha i maveta.
Mu kiki kamu visia raha na Araha.
33Mu hagarahasia God, i oga igê na vavearo,
i bani oga me i nago kere vê noga.
Mu rongoa, ngaia ki ngerengere
igê na ringena, i rongo raha teha.
34Mu tarohenia, vi God ki raramohaga hunia.
Ngaia ki marungia i Isiraele
ma nikâ na vavearo i ruguhana.
35Na enoni hato ka magu bâraha,
matena God i hura me tenia na atohana apuna,
na God na Isiraelita ka rahesia.
Ngaia ki hagaramonira na kariana ma ki hagagatagatanira.
Ka visia raha God na Araha.
Currently Selected:
KI 68: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
