TOMAHA NINUNI 4
4
Na tagaraha iata na raraha iana o Levi tenia na varo ninuni iana o Kehata
1Na Araha ki bonasia o Moise, 2ki tomanira na raraha iana o Levi tenia na varo ninuni iana o Kehata surigi na hagosi ninuni ma na ahemata iata, 3ma ki segera so na mane hato ga tonga na harisi tangahuru gi oru iata ki tariha igê na tangahuru gi rima na harisi ma ka arari ni tagaraha i ruma na gahu apuna iana na Araha. 4Na tagaraha iata ngaira ka bâsurigi na marâ apuna ngavê.
5Na Araha ki vatea o Moise renigi na ramata igê. Igê na matena ga raragea igê na tênga, o Aroni mo karena ka bêbanu nga i rarona na ruma na gahu apuna, ka tavoa râ na gahu i kuku i maana na bokesi na suruheri ma ka buhia renia. 6Ngaira ka buhia nga renia na bubuhina bâkoro na gavona na puruka, ka gasia na gahu maravarava igê ma ka suvarenirerua na apinige ni tugiha igê na kakavina.
7Ngaira ka vatarangenia nga na gahu maravarava igê na bea ni bereti iana na Araha ma ka nakagi igê na apira, na apira ga sungigi igê na marâ i sigini koro, na kâkâ ga vogasi igê ma na pi tanga na vogasiha ni vaini. Na bereti ka ama ni tâtâ nga tare igê na bea. 8Ngaira ka vatarangenia nga na gahu memera igê ma ka buhigi renia na bubuhina na gavona bâkoro na puruka ma ka suvarenirerua na apinige ni tugiha igê na kakavina.
9Ngaira ka buhigi nga na atohana na laiti henigi na laiti igê, na eahi, na apira ni gi ma na pi hato ni oile ni olive. 10Ngaira ka baraigi na marâ hato ngegana renia na gavona bâkoro na puruka ma ka naka igê na bea ni tugiha.
11Hemuri ngaira ka vatarangenia na gahu memera igê na bea na golo ga vogasi igê, ka buhia renia na bubuhina bâkoro na gavona na puruka ma ka suvarenirerua na apinige ni tugiha igê na kakavina. 12Ngaira ka baraigi na marâ apuna tanga na hagarahenga i rarona na kiboru apuna renia na gahu maravarava, ka buhigi renia na gavona bâkoro na puruka ma ka nakagi igê na bea ni tugiha. 13Ngaira ka raguigi râ na rahu monamonaga tenia na bea ni vogasiha ma ka vatarangenia na gahu rotorotoaga memera igê. 14Ngaira ka nakagi nga igê na marâ hato tanga: na apira ni gi, na eahi, na maevo ma na apira. Hemuri ngaira ka buhigi nga renia na gavona bâkoro na puruka ma ka suvarenirerua na apinige ni tugiha igê na kakavina. 15Igê na matena ga raragea na tênga, na varo ninuni iana o Kehata ki arâ me nga, hanana ga tugigi na marâ apuna ngegana i murina ma o Aroni mo karena ka buhigi hato na marâ hato ngegana. Na varo ninuni iana o Kehata ki apu tangara, vige hatarigi na marâ apuna ngegana, i era ma ka meme. Ngaigi nga ka na tagaraha iata na varo ninuni iana o Kehata i na ara ni mateni ga raragea igê na ruma na gahu apuna.
16Na tagaraha iana o Eleasare karena o Aroni na mane ni vogasiha, ngaia ki bâbâsurigi nga na ruma na gahu apuna hagenani, na oile tangagi na laita, na marâ i sigini koro ni sungiha, na palaua ni vogasiha, na oile ni moneha ma na ara ni marâ getigi igê na ruma na gahu apuna ga bani hagapunarigi tanga na Araha.
17Na Araha ki vi tangarerua o Moise mo Aroni, ki vi: 18“Muru bâsira na varo ninuni iana o Kehata, 19siana ka hatarigi na marâ apuna ngegana, i era ma ka meme. Hanana vi siana ki akê me na tarana ngekana, o Aroni mo karena ka bêbanu nga igê na ruma na gahu apuna ma ka votogi na tagaraha tangara na ara ni hitangita na mane ma na ta ka na tagaraha iana. 20Manga vi na hitangita na varo ninuni iana o Kehata ma ki bêbanu igê na ruma na gahu apuna ki bâsira na mane ni vogasiha ga hagarurugu renigi na marâ apuna, ngaira ka page meme râ nga.”
Na tagaraha iata na raraha iana o Levi tenia na varo ninuni iana o Geresone
21Na Araha ki bonasia o Moise, 22ki tomanira na raraha iana o Levi tenia na varo ninuni iana o Geresone surigi na hagosi ninuni ma na ahemata iata 23ma ki segera so na mane hato ga tonga na harisi tangahuru gi oru iata ki râ ki tariha igê na tangahuru gi rima na harisi ma ka arari ni tagaraha igê na ruma na gahu apuna iana na Araha. 24Na tagaraha iata ngaira ka toregi nga na marâ igê: 25na ruma na gahu apuna henirerua na bubuhina ma na gerina henia na bubuhina na gavona bâkoro na puruka igê na gerina, na gahu i kuku i maana, 26ngaigi na gahu henigi na varo tanga na mahera rihirerua na ruma na gahu apuna ma na bea ni vogasiha, ngaigi na gahu ga kuku i maana na mahera henigi na ara ni marâ tanga ga hagêrasigi renigi. Ngaigi nga ka na tagaraha iata. 27O Moise mo Aroni karu bâsurira nga na varo ninuni iana o Geresone ka katogi maninga na tagaraha iata ma na toraha iata, garu votogi tangara. 28Ngaigi nga ka na tagaraha iata na varo ninuni iana o Geresone igê na ruma na gahu apuna ma ka katogi nga maninga i ruguhana o Itamare karena o Aroni na mane ni vogasiha.
Na tagaraha iata na raraha iana o Levi tenia na varo ninuni iana o Merari
29Na Araha ki bonasia o Moise ki tomanira na raraha iana o Levi tenia na varo ninuni iana o Merari surigi na hagosi ninuni ma na ahemata iata, 30ma ki segera so na mane hato ga tonga na tangahuru gi oru na harisi iata ki tariha igê na tangahuru gi rima na harisi ma ka arari ni tagaraha igê na ruma na gahu apuna iana na Araha. 31Na tagaraha iata ngaira ka toregi nga na apinige na apê, na bênivoro, na u henigi na kiru tangagi tanga na ruma na gahu apuna, 32ma na u henigi na kiru tangagi, na rapurapu ma na varo tanga na mahera rihia na ruma na gahu apuna henigi na marâ hato tanga ga hagêrasigi renigi. Na ara ni mane ki toregi ma na marâ ga tâ tanga vi toregi. 33Ngaigi nga ka na tagaraha iata na varo ninuni iana o Merari. Ngaira ka katogi nga i ruguhana o Itamare karena o Aroni na mane ni vogasiha.
Na tomaniana na raraha iana o Levi
34-48Suria na bonasiha iana na Araha o Moise mo Aroni ma na bêni na hakuta ninuni, ngaira ka tomanira na raraha iana o Levi tenigi na varo ninuni iata o Kehata, o Geresone ma o Merari surigi na hagosi ninuni ma na ahemata iata. Ngaira ka segera so na mane hato, ga tonga na harisi tangahuru gi oru iata ki tariha igê na harisi tangahuru gi rima ma ka arari ni tagaraha igê na ruma na gahu apuna iana na Araha. Ngaira kani igê:
| -tenia na varo ninuni iana o Kehata | 2, 750 |
|---|---|
| -tenia na varo ninuni iana o Geresone | 2, 630 |
| -tenia na varo ninuni iana o Merari | 3, 200 |
| Ngaira hato ka vora na | 8, 580 |
49Na ara ni mane hato ka segea so suria na bonasiha iana na Araha tanga o Moise ma ki nahunigi na tagaraha ma na toraha iana marena, o Moise i vutungira hehegitigi renigi.
© 2011 Bible Society of the South Pacific