MATEO 5

O Jesu ki ateate igê na hungana

(Lk 6.20-23)

1O Jesu ki bâsira na hakuta raha na enoni ma ki tagere igê na kere hungana, ma ki oga so i ngekana. Na kariana ka râ me ma ka oga henia. 2Ma ngaia ki haganega ki hagesurira, ki vi: 3“Ga babarisi na enoni,

ga matareha i maana God ma ka hagêguritogo renia,

suria ngaira ka tê oga igê na Arahanga iana God.

4Ga babarisi na enoni,

ga mamasiaga ma ki rugu na obata,

suria God ki page hagamanapura.

5Ga babarisi na enoni,

ga haritagi,

suria ngaira ka page nahunigi na marâ,

God i bani surugi.

6Ga babarisi na enoni,

ga magêsigi ma ka tangasigi bâraha na marâ,

ga oto ma koro i maana God,

suria God ki page hagamasura ngavê.

7Ga babarisi na enoni,

ga takuira na enoni getera,

suria God ki takuira nogata.

8Ga babarisi na enoni,

ga matarotaro na aitangihata,

suria ngaira ka page bâsia God.

9Ga babarisi na enoni,

ga tagara tanga na marapeha,

suria God ki page visira, vi na karena.

10Ga babarisi na enoni,

ga hatamigi na mamasiaganiha

renigi na marâ, ga koro ma ka oto i maana God,

suria ngaira ka oga igê na Arahanga iana God.

11“Igamu kamu babarisi, matena na enoni ka guharigamu, ma ka katogamu bera, ma ka hagaerasigamu igê na ani mavê na hagaparunga renigamu, suria igamu ki na kariaku. 12Mu ageage ma kamu vagevage renia, suria i raha teha na vurimi i pasina God. Suria igê na tarana ngekana na enoni ka bani katora bera na poropete i nago tarami.

Na solo ma na laiti

(Mk 9.50; Lk 14.34-35)

13“Igamu kamu manga na solo tangara na enoni hato i maveta. Ma ki manga i pe marasiga, ngaia ki asa, vi ge page marasiga aporo. I hato, vi ge tari nikâ renia. Vikê ka kasia râ ma, ma na enoni ka puria.

14“Igamu kamu manga na laiti tangara na enoni hato i maveta hagenani. Na hinua raha, ga bani torea igê na kere hungana, ki asa, vi ge oga pinihi. 15I asa ta na enoni, vi ge tanga na laiti ma ke naka i ruguhana na apira. Ngaia ki naka hete igê na atohana na laiti, hanana i mavesira na ara ni enoni i rarona na ruma. 16I tagenana ma i tuguhigamu, mu mavesira na enoni manga na laiti, hanana ngaira ka page bâsigi na parongami koro ma ka visia raha God na Vaemami.

Na hagesuringa renigi na ramata igê na Buka Apuna

17“Siana kamu takusia, vi inê kê râ me, hanana vi gê hagamagahurigi na Ramata iana o Moise ma na hagesuringa iata na poropete. Inê kê pe râ me, hanana vi ve hagamagahurigi, ma kê migirâ me hete na morani na girarani. 18Mu rongo! Na ara ni taromegani na Ramata ka page goga tare, mataro me karu magahuru na vavearo ma na maveta, ma mataro me ka bani voravora me na ara ni marâ hato na Buka ni Ramata i visigi. 19Tahema, na ani ma na enoni, i pe arâ suria na kere taromegana ngavê na ramata, ma ki hagesurira na enoni getera, ka katokato vikana nogata, ngaia ki page hagemurira na enoni hato i pasina God na Araha. Ma na enoni, i arâ surigi na Ramata i na Buka Apu ma ki hagesurira na enoni getera, ka katokato vikana nogata, ngaia ki page teha i pasina God na Araha. 20Hoi, mu rongo! Igamu kamu girara ma, mu page bêbanu i pasina God na Araha, manga vi igamu ma kamu marupegi nga na tamasinga iana God teharira na Pariseo ma na mane ni hagesuringa ni rotu.

Na hagesuringa renia na mangariaganiha

21“Igamu kamu bani girara, i nago ka vi tangara na enoni, ka vi, ‘Siana kamu nahu enoni. Ma na ani mavê na enoni, i nahuia na enoni, ka page hagatamasia.’ 22Hoi, be vi tangagamu: na ani mavê na enoni, i mangariaga tanga na enoni getea, ka page hagatamasia. Ma na enoni, i guharia na enoni getera, ka page hagatamasia igê na kotiha raha na Kaunselo. Ma na ani mavê na enoni, i visia na enoni getera vi ‘Beka’, ngaia ki page hatamia na mamasiaganiha renia na gi igê na agua ni hagaitangiha. 23Vikê, manga go tagarenia noga na votovoto iamu tanga God igê na bea ni vogasiha, ma i ngekana ko takusia aporo igê, ta na enoni i mangariaga tangago, 24go naka so noga na votovoto iamu i maana na bea ni vogasiha ma ko arâ ototo râ, ko hagakorokoro tanga na enoni akana. Ma hemuri ko aporo ma ko tagarenia na votovoto iamu tanga God.

25“Manga na enoni, ma ki hagarongo renigo tanga na koti, i koro, ko hagaotoa rêrê henia, matena muru tavoraha tanga na kotiha, suria i manga vi go aropere igê na kotiha, ngaia ki page hagasurigo i pasina na maneraha igê na kotiha, ma na maneraha igê na kotiha ki page tagarenigo tanga na mane, i anumasia na ruma ni hagaitangiha, ma ngaia ki page kasigo igê na ruma ni hagaitangiha. 26Be vi tangagamu: igo ko page goga i ngekana, mataro me ko kasikasi hagahatungia pusigo renia na haga, manga i bani visia tangago na maneraha igê na kotiha.

Na hagesuringa renia na gamogamoha

27“Igamu kamu bani girara na ramata i vi, ‘Siana ko gamogamo.’ 28Hoi, be vi tangagamu: na anima na enoni, i rengasi maa tanga na gete, hanana vi tanua ta na marâ era henia, ngaia ki bani gamogamo henia igê na aitangihana. 29Vikê, manga na maamu na otomu, ma ki hagatasigo, go akangia ma ko kasia râ. Igo ki koro tangago, vi go hagasiba na apemu, ma ki pe koro tangago, vi ga kasia na apemu hagenani igê na agua ni hagaitangiha tarema. 30Manga na rimamu na otomu, ma ki hagatasigo, go retea ma ko kasia râ. Igo ki koro tangago, vigo hagasiba na rimamu, ma ki pe koro tangago, vi ga kasia na apemu hagenani, ki arâ igê na agua ni hagaitangiha tarema.

Na hagesuringa renia na hekasigi

(Mt 19.9; Mk 10.11-12; Lk 16.18)

31“Ga bani vi nikâ, vi, ‘Na anima na mane, i kasia kaniana, ki tuguhia, i segea na pepa ni hekasigi ma ki vatea.’ 32Hoi, be vi tangagamu: manga na mane, ma ki kasia na gete iana, nga noga ma igê na êragiha na ramata ka manimania, ngaia na mane ki katoa na gete ki gamogamo, manga vi na gete ki auragi nikâ; ma na mane, i auragia na gete ngekana, ngaia ki gamogamo nikâ.

Na hagesuringa renia na tohenga

33“Igamu kamu bani girara, i nago ka bani vi tangara na enoni, ka vi, ‘Siana ko tohetohe, ma ki tuguhigo hete, go tanua na marâ, go tohe renia i maana na Araha.’ 34Hoi, be vi tangagamu: siana hagetage kamu tohetohe, matena mu surusuru. Siana kamu tohetohe renia na vavearo, suria na vavearo ki na âgâga iana God. 35Siana kamu tohetohe renia na maveta, suria na maveta ki na uguga iana God. Siana kamu tohetohe renia i Jerusaleme, suria ngaia ki na hinua raha iana na Araha raha. 36Siana kamu tohetohe renigi na bêmi, suria i asa iami, vi gamu katoa na ani gi tage ma na varehu ke siki se vige masuri. 37Mu vivi ma hete ‘Ua’ se ‘Mareha’. Manga mu visia râ nikâ ta na tarana, na tarana ngekana ki râ me tenia Satana.

Na hagesuringa renia na siva

(Lk 6.29-30)

38“Igamu kamu bani girara, ga vi, ‘Na maana tanga na maana, ma na rivona tanga na rivona.’ 39Hoi, be vi tangagamu: siana kamu naka na siva tanga na enoni, i aerasigamu. Manga ta na enoni, ma ki hitabaria na parimu na otomu, go naka, ki hitabaria nikâ na parimu i mahamu. 40Manga ta na enoni, ma ki torego igê na kotiha, hanana vi torea na gahu iamu, go naka, ki torea nikâ na tuguni iamu. 41Ma ki manga ta na merongamu, ma ki tugurigo, ko torea na anga iana tanga i ta na agua, go torea ko me teha râ nga tanga na agua getea nikâ. 42Manga ta na enoni, ma ki nungia ta na marâ tenigo, gu vatea. Manga ta na enoni, ma ki nungia noga ta na marâ tenigo, gu hagamageta tanga.

Takuira na merongami

(Lk6.27-28, 32-36)

43“Igamu kamu bani girara, ga vi, ‘Takuira na tamami, ma kamu kikitenira na merongami.’ 44Hoi, be vi tangagamu: mu takuira na merongami, ma kamu nunginungi tangara na enoni, ga katogamu bera, 45hanana mu paronga manga God Vaemami. Suria ngaia ki katoa na arito, ki mavesira tagenata na enoni koro ma na enoni era, ma ki hagatorangenia me na rangi tangara tagenata na enoni, ga oto i maana, ma tangara na enoni, ga pe oto i maana. 46Suria i hega kanimi obania, vi God ki vurigamu, manga vi igamu kamu takuira ma na enoni, ga takuigamu bê me? E, na enoni, ga totora takesi, ngaira ka katokato vikana nogata! 47Ma ki manga mu meratamasi ma na enoni, ga koro tangagamu, ki hega, mu takusia vari, vi igamu kamu katoa na tarana, i tora getea? E, na enoni, ga pe Siu, ka katokato vikana nogata! 48I tuguhigamu, mu korokoro teha manga God Vaemami, i koro teha.

Currently Selected:

MATEO 5: KCB

Highlight

Copy

Compare