MALAKI 2
2
1Inê na Araha raramohaga huniê, inê kê haganunugamu mane ni vogasiha. “I tuguhigamu, 2mu hagahigasiê maninga renigi na parongami. Manga mu pe têtê viteaku, inê kê page hagaitangigamu. Inê kê page hagaerasigi na marâ mu mauri re. Ma kê bani haganega nga, suria mu guguruga tangê. 3Inê be hagaitangira na karemi, ma be suhenigi na maami igê na aeta na sipi ma na puruka, mu vogasiê renira, ma ka page okeke babahenigamu tanga na maniae, hanana viga kasigamu igê. 4Ma igamu kamu kahu tahetara, vi inê kê vategamu na ramata ngekê, hanana i nganganihaga tare na suruheri iaku henia o Levi, na êvarimi na mane ni vogasiha. Ngaia kani gê visia, inê na Araha raramohaga huniê.
5“Igê na suruheri iaku henia inê kê surugi na mêriha ma na ramana tangara ngaia ma na raraha iana, ma kê vatera renigi, hanana vi ngaira ka hagahigasiê maninga. Ma ngaira i na matena ngekana ka hagahigasiê ma ka maguteniê. 6Ngaira ka hagesurira na enoni renigi na tarani, ga oto, mareha vi renigi na tarani, ga pe oto. Ngaira ka obahahaku heniê, ma nikâ ngaira ka tamanira na enoni, hanana ga urisi parongata. 7Na mane ni vogasiha ki tuguhira, viga hagesurira na enoni renia na monariha reniê. Ma ki manga na enoni, ma ka hagatera renigi na obaniha iaku, ngaira ki tuguhira, viga aramira igê na monariha, suria ngaira ka na mane tora tamasinga iaku, inê na Araha raramohaga huniê.
8“Ma i ngekê nga igamu na mane ni vogasiha, kamu bani kasigi na tarani, ga oto. Na hagesuringa iami ki bani katora rako na enoni, ka râ tasi. Igamu kamu bani aharêngia na suruheri iaku henigamu. 9Tahema inê nogaku be katora na enoni, ke ruhigamu ma ke hagahigamu, suria mu pe tê viteaku, ma na matena mu hagesurira na kariaku, igamu kamu pe katora maninga tagenata.”
Na enoni ka pe toto suria na Araha
10I hega, igia hato ka pe nahunia vari na vaemaka gi tage togo? I hega, na God gi tage togo ki pe hagavoragia vari igia hato? Hoi, tanu hega, igia ka suruheri hagaparu ma ka pe toto suria na suruheri iana God henira na uvarika? 11Na ai ni Juta ka pe toto suria God. Na ai ni Jerusaleme ma na ai ni Isiraele hagenani ka bani tanugi na tarani, ga erataga ngavê i maana God. Ngaira ka pe hanetasia na Ruma ni Rotu manimani iana na Araha. Ngaira ka êragira na gete ahuroto, ga vogasira na ataro. 12I araria, vi na Araha ke kasira hura tenia na haku iata na Isiraelita na ara ni enoni, ga kato vikana, ma ki hato, vige page vogasia nikâ na Araha raramohaga hunia henira na enoni.
13Ta na marâ nikâ: igamu kamu hagaruhusia na bea ni vogasiha renigi na tavoni na maami. Igamu kamu angiangi ma ki rugurugu na obami, suria ngaia ki usitenigi na vogasiha iami ma ki pe aganarigamu. 14Ma igamu kamu hagate, kamu vivi, “Tanu hega kani kato vikana?” Ngaia ki kato vikana, suria i bani girara, vi igamu kamu pe toto surira na gete iami, mu êragira matena mu karekare mênga. Matena mu êragi, igamu kamu suru i maana God, vigamu toto surira. Ngaira ka na gete iami, ma igamu kamu pe hagamonaria na suruha iami tangara. 15God ki pe katogamu vari kamu obahaku ma kamu vora renia na vere tage togo? Na ta ki na girarana na tarana ngekê? I tuguhigamu, vigamu aparara na kare, ga tototo suria maninga God. Tahema siana hagetage, kamu aharêngia na suruha iami tangara na gete iami. 16Na Araha raramohaga hunia, ga rahesia na Isiraelita, ki vi: “Inê kê ngaritenia hagetage na hekasigi. Inê kê ngaritenia hagetage, vi na hitangimi ki kasia na gete iana ma ki hagamamasiaga apena. I tuguhigamu, mu hagamonaria na suruha iami, hanana mu tototo surira na gete iami.”
Na tangiana ni suriha ki hagarangi me noga
17Igamu kamu hagame apena na Araha renigi na tamasinga purua ma iami. Ma kamu hagate, kamu vivi: “Manga i he ngekana?” Suria igamu kamu vivi: “I maana na Araha na enoni, ga tasi, ngaira ka koro ma, ma ngaia ki vagevagesira. Manga i mareha, tanu hega ngaia ki pe hagaitangira?”
Currently Selected:
MALAKI 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
